Read Mizo_Old_version LEHKHABU PAHNIHNA SAMUELA 17 Bible Online

LEHKHABU PAHNIHNA SAMUELA 17 - Mizo_Old_version bible

LEHKHABU PAHNIHNA SAMUELA 17

¹Tin, chûng lo pawh chu Absaloma hnênah Ahithophela chuan, “Mi sîngkhat leh sânghnih ka thlang chhuak ang a; tin, zâninah hian Davida ûmin ka thawk ang e.

²A chauh lai leh a chak loh lai tak ka va nangchîng ang a, ka va tihlau vang e. Tichuan, a hnêna mi awm zawng zawng chu an tlân bo vang a; tichuan, lal chauh chu ka va that mai ang e.

³Tin, mipuite chu i hnênah ka rawn hruai kîr vek ang. I mi zawna tih loh mi zawng zawng an lo kîr chuan mi zawng zawng inremin an awm ang,” a ti a.

⁴Tichuan, chumi thu chuan Absaloma leh Israel upaho zawng zawngte chu a tilâwm ta hle a.

⁵Chutichuan, Absaloma chuan, “Ark mi Husaia chu ko ve phawt ula, a sawi ve dân i lo ngaithla teh ang u,” a ti a.

⁶Tin, Husaian Absaloma hnên a lo thlen chuan Absaloma chuan, “Ahithophela chuan hetiang hian a sawi a, a sawi ang hian kan ti dâwn em ni ang? Ti dâwn lo ila, nangin han sawi ve teh khai,” tiin a lo bia a.

⁷Tin, Husaia chuan Absaloma hnênah, “Tûn ṭuma Ahithophela remruat hi a ṭha lo a ni,” a ti a.

⁸Tin, Husaia chuan, “I pa leh a mite chu i hria a, sipai huai tak, mi kawlhsen tak, phûla savawm, a no lâksak ang mai an ni a; tin, i pa chu indo mi a ni a, mipui zîngah a riak kher lo vang.

⁹Ngai teh, tûnah pawh khawii lai khuarkhurumah emaw, khawii hmunah emaw a biru reng ang. Tin, heti hi a ni ang a, an inbeih tirhah mi ṭhenkhat an tlûk nual chuan a hria apiangin, ‘Absaloma zuitute chu an that chiam mai,’ an ti mai ang a.

¹⁰Tichuan, mi huaisen tak, sakeibaknei rilru ang pu mi meuh pawh a lo zâm hle mai ang a; Israel mi zawng zawng lah chuan i pa chu sipai huai tak a nih leh a hnêna mi awmte chu mi huaisen tak tak an nih an hre vek si a.

¹¹Keia remruat ve dân chu, Israel mite zawng zawng chu Dan aṭangin Beer-seba thleng rawkin tuifinriata ṭiau zât zetin i hnênah ko khâwm vek ila; tin, indonaah chuan nangmah meuh kal ve la.

¹²Chutichuan, khawii hmunah pawh kan tawn fuhna apiangah leia dai tla ang maiin kan bawh ang a; tin, amah leh a hnêna mi awm zawng zawngte chu pakhat mah kan zuah lo vang.

¹³“Chu lovah pawh, khuaah a luh chuan Israel mi zawng zawng, hruizên kengin chumi khuaah chuan kan va kal ang a, lung tê tak tê pawh awm hauh lo khawpin luiah kan hnûk thla vek ang,” a ti leh nghâl bawk a.

¹⁴Tichuan, Absaloma leh Israel mi zawng zawngte chuan, “Ark mi Husaia remruat chu Ahithophela remruat ai chuan a ṭha zâwk,” an ti ta a. LALPA chuan Ahithophela remruat ṭha tak chu letthla tûrin a lo ruat tawh rêng a ni.

¹⁵Chutichuan, Husaia chuan puithiam Zadoka leh Abiathara hnênah, “Chutiang khatiang chuan Ahithophela chuan Absaloma leh Israel upate rem a ruatsak a; tin, keiin chutiang khatiang chuan rem ka ruat a.

¹⁶Chuvângin, ‘Zanin chu thlalêra lui kaiahte riak tawh lovin kân ngei ngei rawh; chuti lo chuan, lal leh a hnêna awm zawng zawngte chu an tiboral vek dah ang e,’ tiin Davida hrilhtîr thuai rawh u khai,” a ti a.

¹⁷Jonathana leh Ahimaaza chu En-rogel-ah an awm a, bawihnu pakhat hian anni chu a va hrilh ṭhîn a; tin, anni chuan Lal Davida chu an va hrilh lehchhâwng ṭhîn a. Khawpuia an lût chu tu ma hmuh loh tûr a ni a.

¹⁸Nimahsela, naupangin a lo hmu a, Absaloma a hrilh a; tichuan, an pahnihin an tlân bo ta thuai a, Bahurim-a mi pakhat, a tuala tuichhunchhuah nei inah an va kal a, tuichhunchhuahah chuan an lût ta a.

¹⁹Tin, hmeichhiain tuichhunchhuah chhinnain a chhîn a, a chungah chuan buh a pho va, tu ma hriat theih a ni lo.

²⁰Tin, Absaloma chhiahhlawhte chu ina hmeichhe hnênah chuan an va kal a; “Ahimaaza leh Jonathana-te kha khawiah nge?” an ti a. Tin, hmeichhia chuan an hnênah, “Lui an kân tawh ang,” a lo ti a. Tin, an va zawng a, an hmu lo va, Jerusalem-ah an kîr leh ta a.

²¹Tin, heti hi a ni a, an kal liam hnu chuan tuichhunchhuah ata chu an lo chhuak a, Lal Davida chu an va hrilh a; Davida hnênah chuan, “Chhuak ula, lui chu kân thuai rawh u; hetiang hian Ahithophela chuan a phiar che u a ni,” an ti a.

²²Chutichuan, Davida leh a hnêna mi awm zawng zawng chu an chhuak a, Jordan lui an kân a; khua a lo var chuan pakhat mah Jordan lui kân lo an awm lo.

²³Tin, Ahithophelan a remruat ang chu an zâwm lo tih a hriatin a sabengtung chu a thuam a, a chhuak a, a khaw lamah a haw a, a chhûngte khawsak dân tûr a ruatsak diam a, a inâwk hlum ta a; tichuan, a thi a, a pa thlânah an phûm ta a.

²⁴Chutichuan, Davida chuan Mahanaim a va thleng a. Tin, Absaloma chuan a hnêna Israel mi zawng zawngte nên Jordan lui an kân a.

²⁵Tin, Absaloma chuan Joaba aiah Amasa chu sipaite hotuah a dah a. Amasa chu, mi pakhat a hming Ithra, Israel mi Joaba nu Zeruii laizâwn Nahasi fanu Abigaili pâwltu fapa a ni a.

²⁶Tin, Israel mite leh Absaloma chuan Gilead ramah ṭanhmun an va khuar a.

²⁷Tin, heti hi a ni a, Davidan Mahanaim a thlen chuan Amona thlah Raba khuaa mi Nahasa fapa Sobia te, Lo-debar khuaa mi Amiela fapa Makira te, Rogelim khuaa Gilead mi Barzilaia te chuan,

²⁸“Mipuite chu thlalêrah chuan an rilṭâmin an chauvin, an tuihâl tawh êm êm a ni,” an tih avânga khum te, maihûn te, hlum bêl te, buh te, barli te, chhangphut te, vai te, be te, dailuah te, be kan ro te, khawizû te, bâwnghnute khal te, berâm leh bâwnghnute khal uih te, Davida leh a hnêna mi awmte ei tûrin an rawn keng a.