Read Mizo_Old_version LEHKHABU PAHNIHNA SAMUELA 19 Bible Online

LEHKHABU PAHNIHNA SAMUELA 19 - Mizo_Old_version bible

LEHKHABU PAHNIHNA SAMUELA 19

¹Chutichuan, Joaba chu an hrilh a, “Ngai teh, lal chuan Absaloma chu a ṭah a, a sûn e,” an ti a.

²Tichuan, chumi nia an hnehna chu mi zawng zawng tân sûnna a lo ni ta zâwk a. “Lal chu a fapa avâng chuan a lungngai êm êm mai,” an tih chu chumi ni chuan mipuite chuan an lo hre ta si a.

³Tin, mipuite chu indonaa mi an tlân bo, an zah avânga a rûka an kal bo angin chumi ni chuan a rûkin khawpuiah an lût a.

⁴Tin, lal chuan a hmai a hup a, “Aw ka fapa Absalom! Aw Absalom, ka fapa, ka fapa!” tiin lal chu a ṭap hawm hawm a.

⁵Tin, Joaba chu inah lal hnênah chuan a lût a, “I nunna te, i fapate leh i fanute nunna leh i nupuite leh i hmeite nunna chhanhimtute chu vawiinah hian zak takin i siam tâk hi;

⁶nangmah hawtute chu i hmangaiha, nangmah hmangaihtute i huat tlat maiah hian. Hotute leh sipaite chu i tân eng mah ni lo angin vawiinah hian i tilang ta a; Absaloma chu dam sela, keini zawng zawng hi vawiinah hian thi ta vek zâwk ni ila, chu chu i lâwm zâwng tak ni âwmin vawiinah hian ka hria a ni.

⁷Chuvangin, tho la, chhuak la, i mite tilungawi zâwng takin thu sawi rawh. I chhuah loh chuan LALPA chhâlin chhia ka chham a ni, mi pakhat mah zâninah hian i hnêna awm an awm lo vang. Tin, chu chu i tân i tleirâwl ata tûn thlenga i chunga thil ṭha lo lo thleng zawng ai mahin a ṭha lo zâwk ang,” a ti a.

⁸Chutichuan, lal chu a tho va, kulh kawngkaah chuan a ṭhu a. “Ngai teh u, lal chu kulh kawngkaah chuan a ṭhu e,” tiin mipui zawng zawng chu an hrilh a. Tin, mipui zawng zawng chu lal hmaah chuan an va kal ta a. Israel-ho erawh chu mahni puan in ṭheuhvah an tlân haw ta a.

⁹“Lal chuan kan hmêlmate kut ata min chhanchhuak a, Philistia mite kut ata min chhandam ta a; tin, tûnah hian he ram aṭang hian Absaloma chu a tlân chhuahsan a.

¹⁰Tin, Absaloma, kan lal atâna hriak kan thiha chu indonaah a thi ta si a. Engati nge lal chu kam khat maha koh kîr zai in rêl loh?” tiin Israel mite zawng zawng chu an inhnial ta mur mur mai a.

¹¹Chutichuan, Lal Davida chuan puithiam Zadoka leh Abiathara hnênah chuan, “Juda upate hnênah chuan, ‘Engati nge lal chu a in lama hruai kîr thu-ah a zawiawi berah in ṭan? Israel miten lal hruai kîr thu an sawi chu lal hnên a thleng tawh si a.

¹²Ka unaute in ni a, ka thisen zawmpui in ni si a, engati nge ni a zawiawi bera in ṭan chu ni ngai le?’ tiin sawi rawh u.

¹³Tin, Amasa hnênah, ‘Ka thisen zawmpui i ni lâwm ni? Joaba aiah ka hmaa sipaite hotua ka siam lohva ka siam loh che chuan, Pathianin a tih tihin min ti mai sela, chu aia nasa pawhin,’ a ti e, va ti rawh u,” tiin mi a tîr a.

¹⁴Chutichuan, Juda mite zawng zawng rilru chu mi pakhat rilru ang maiin a tithle ta dual a; tichuan, lal hnênah, “I mite zawng zawng nên khân lo haw leh rawh u,” ti tûrin mi an tîr a.

¹⁵Chutichuan, lal chu a haw leh a, Jordan a va thleng a. Tin, Juda-te chu lal lo hmuaka, lal chu Jordan-a lo hruai kai tûrin Gilgal-ah an kal a.

¹⁶Tin, Bahurim khuaa mi Benjamin mi Gera fapa Simeia chu hmanhmawh takin Lal Davida hmuak tûrin Juda-hote rualin a chhuk ve a.

¹⁷Tin, a hnênah Benjamin mi sâng nên, Saula chhûngte chhiahhlawh Ziba, a fapa sâwm leh panga leh a chhiahhlawh sawmhnih nên an tel ve a; tin, lal mit hmuhah chuan Jordan an kân hmawk hmawk a.

¹⁸Tin, lal chhûngte hruai kai nân leh ṭha a tih ang apianga a tih atân lawng an kal kaipui a. Tin, Jordan lui a han kai chuan Gera fapa Simeia chu lal hmaah chuan a bawkkhup a.

¹⁹Tin, lal hnênah chuan, “Ka pu chuan khawlohna neiah mi ruat lo hrâm sela, lalpa ka puin Jerusalem a chhuahsan nia i chhiahhlawhin dik lo taka a lo tih tâkte chu hre reng hek suh sela, lal chuan rilruah pai suh se.

²⁰I chhiahhlawh hian thil ka tisual tih ka inhria a; chuvângin, ngai teh, Josefa chhûng zawng zawngte zînga ka pu lalpa chu hmuak tûra vawiinah hian a lo chhuk hmasa bera ka ni nghe nghe asin,” a ti a.

²¹Nimahsela, Zeruii fapa Abisaia chuan a chhâng a, “LALPA hriak thiha chu ânchhia a lawh avângin Simeia hi tihhlum tûr a ni dâwn lâwm ni?” a ti a.

²²Tin, Davida chuan, “Nangni Zeruii fapate u, nangni hian mi lo hriatsak tûr eng nge awm? Vawiinah hian mi dotute in ni lâwm ni? Vawiinah hian Israel zinga mi rêng rêng tihhlum tûr em ni? Vawiinah hian Israel mite chungah lal ka nih hi ka hre lo vem ni?” a ti a.

²³Tin, lal chuan Simeia hnênah chuan, “I thi tawp lo vang,” a ti a. Lal chuan a hnênah chhia a chham a.

²⁴Tin, Saula fapa Mephibosetha chu lal hmuak tûrin a lo chhuk a; lal a kal chhuah ni aṭanga râlmuanga a lo haw leh ni thleng chuan a kete chu a chei lo va, a khabe hmul a chep rual lo va, a puante pawh a su hek lo.

²⁵Tin, heti hi a ni a, lal hmuak tûra Jerusalem-a a kal chu lalin a hnênah, “Mephiboseth, engati nge ka hnênah i kal ve loh?” a ti a.

²⁶Tin, ani chuan a chhâng a, “Aw lalpa, ka pu, ka chhiahhlawhin mi bum a ni. I chhiahhlawh chuan, ‘Lal hnêna kal tûra ka chuan nân sabengtung ka thuam ang e,’ ka ti a; i chhiahhlawh hi a ke a bai si a.

²⁷Tin, lalpa ka pu hnênah chuan i chhiahhlawh hi a hêk a; nimahsela, lalpa ka pu chu Pathian vântirhkoh ang a ni a. Chuvângin, ṭha i tih ang angin ti ang che.

²⁸Ka pa chhûngte zawng zawng chu lalpa ka pu hmaah chuan tihhlum vek âwm an ni ngei a; mahse, i chhiahhlawh hi i chaw kîlpuite zîngah i teltîr a. Chuvângin, lal hnênah hian thil dang phût ngam âwm ka la ni cheu vem ni?” a ti a.

²⁹Tin, lal chuan a hnênah, “I chungchâng thu hi engah nge i sawi leh ṭhin? ‘Nang leh Ziba chuan ram chu insem rawh u,’ ka ti e,” a ti a.

³⁰Tin, Mephibosetha chuan lal hnênah, “E, amahin nei vek rawh se, lalpa ka pu chu ama inah râlmuangin a lo thleng ta si a,” a ti a.

³¹Tin, Gilead mi Barzilaia chu Rogelim aṭangin a lo chhuk a; lal chu Jordan-a hruai kai tûrin a hnênah Jordan a kai ve a.

³²Barzilaia chu upa tak a ni a, kum sawmriat mi zet a ni a; Mahanaim-a lal awm chhûng khân ei tûrte a lo tum a, mi neinung tak a ni a.

³³Tin, lal chuan Barzilaia hnênah chuan, “Ka hnênah kai ve la, ka hnênah Jerusalem-ah ka châwm ang che,” a ti a.

³⁴Tin, Barzilaia chuan lal hnênah, “Eng chen la dam tûr nge ka niha, Jerusalem-a lal hnêna ka han chhoh vena tûr chu?

³⁵Tûnah hian kum sawmriat ka ni a; a chhia leh a ṭha pawh thlei thei em ka nih? I chhiahhlawh hian ka thil ei leh inte hi a tui leh tui loh pawh ka hre thei tawh em ni? Mipa leh hmeichheho hla sak ri pawh ka hre thei tawh em ni? Chuvângin, i chhiahhlawh hi eng atân nge lalpa ka pu tân phurrit ka nih mai ang?

³⁶I chhiahhlawh hian lal hnênah Jordan râl kai ve chauh ka tum a ni. Engah nge lal chuan chutianga ṭhat man mi rulh ve thung kher ang?

³⁷Khawngaih takin, i chhiahhlawh hi mi hawtîr leh mai la, ka nu leh ka pa thlân awmna keimahni khua ngeiah ka thi ang e. Amaherawhchu, en teh, i chhiahhlawh Chimhama hi; lalpa ka pu hnênah kai sela, a chungah ṭha i tih ang apiangin ti ang che,” a ti a.

³⁸Tin, lal chuan a chhâng a, “Chimhama chu ka hnênah a kal ve ang a, ṭha i tih ang zêlin a chungah ka ti ang; tin, thil eng pawh mi dil apiang chu ka tihsak zêl ang che,” a ti a.

³⁹Tin, mipui zawng zawngte chu Jordan râl an kai a; tin, lal chuan Barzilaia chu a fâwp a, mal a sâwm a; tin, ama hmun lamah a haw leh ta a.

⁴⁰Chutichuan, lal chu Gilgal-ah a kai a, Chimhama chu a hnênah chuan a kai ve a. Tin, Juda mi zawng zawng chuan lal chu an hruai kai a, Israel mi pawh a chanve an tel a.

⁴¹Tin, ngai teh, Israel mi zawng zawng chu lal hnênah an lo kal a, lal hnênah chuan, “Engati nge kan unau Juda mite hian an chan bîk chia, lal leh a chhûngte leh Davida mi zawng zawngte pawh Jordan râla an hruai tel vek mai?” an ti a.

⁴²Tin, Juda mi zawng zawngte chuan Israel mite chu an chhâng a, “Lal chu kan lamhnai a nih avâng a ni. Engati nge hemi thu-ah hian in thinrim mai? Lal neih ringa awm em kan nih tehlul? Thil pêk eng emaw te pawh min nei em ni?” an ti a.

⁴³Tin, Israel mite chuan Juda mite chu an chhâng a, “Lalah hian chan sâwm kan nei a; chuvângin, Davida-ah hian nangni aiin chanvo kan ngah zâwk asin. Engati nge min ngaihnêp mai? Lal hruai kîr thu hi rawt hmasatu kan ni lâwm ni kha?” an ti a. Chutichuan, Juda mite thu chu Israel mite thu ai chuan a rum ta zâwk a.