Read Mizo_Old_version LEHKHABU PAHNIHNA SAMUELA 20 Bible Online

LEHKHABU PAHNIHNA SAMUELA 20 - Mizo_Old_version bible

LEHKHABU PAHNIHNA SAMUELA 20

¹Tin, chutah chuan Benjamin mi, Bikria fapa a hming Seba, Beliala mi pakhat a lo awm kher a. Tawtawrâwt a hâm a, “Davida-ah hian chanvo kan nei lo va, Jesaia fapaah hian ro luah tûr kan nei hek lo; aw Israel mite u, in puan in lam ṭheuhvah haw rawh u,” a ti a.

²Chutichuan, Israel mi zawng zawngin Davida an zui chu an lêtsan a, Bikria fapa Seba chu an zui ta a. Juda mite erawh chuan Jordan aṭangin Jerusalem thlengin an lal chu an vuan ta tlat a.

³Chutichuan, Davida chuan Jerusalem-a a in chu a thleng a; tin, lal chuan hmeichhe sâwm, a hmeite, in nghâk atâna a dahte chu a hruai a, a khung a, an ei tûr a tum a; nimahsela, an hnênah a lût lo va. Tichuan, an thih ni thlenga khunga awmin hmeithaiin an awm ta a.

⁴Chutichuan, lal chuan Amasa hnênah, “Ni thum chhûngin Juda mite mi koh khâwmsak la; tin, nang pawh lo awm ve ang che,” a ti a.

⁵Chutichuan, Amasa chu Juda mite ko khâwm tûrin a kal ta a; amaherawhchu, a hun ruatsak aiin a va thang rei ta a.

⁶Tichuan, Davidan Abisaia hnênah chuan, “Bikria fapa Seba hian Absaloma ai mahin kan pawi a khawih dâwn alâwm le. I pu mite hruai la, ûm rawh u khai; chuti lo chuan, khaw kulh neiahte a lût hman ang a, kan hmuh phâk lohvah kan chhuah mai dah ang e,” a ti a.

⁷Tichuan, Joaba hote, Kereth mite, Peleth mite leh an mi chak zawng zawngte chuan amah an zui chhuak ta a. Jerusalem aṭang chuan Bikria fapa Seba ûm tûr chuan an chhuak ta a.

⁸Gibeon-a lungpui awmna an va thlen chuan Amasa chuan anmahni chu a lo hmuak a. Tin, Joaba chuan indona thuamhnaw a inbel a; tin, a chungah chuan khandaih a pai chawpin kâwnghrênah a pai a; tin, a kal zâwngin a dawk chhuak a.

⁹Tin, Joaba chuan Amasa hnênah chuan, “Unaupa, i ṭha rih alâwm maw?” a ti a. Tin, Joaba chuan Amasa chu fawh tumin a khabe hmul chu a kut ding lamin a chelh a.

¹⁰Nimahsela, Amasa chuan Joaban khandaih a ken chu a ngaihsak lo va. Chutichuan, a pumah chuan a vit a, a rilte chu a tithla nuaih mai a, a vit nawn leh ta lo va; tichuan, a thi ta a. Tichuan, Joaba leh a unaupa Abisaia chuan Bikria fapa Seba chu an ûm ta a.

¹¹Tin, a kiangah Joaba hote zînga tlangvâl pakhat chu a ding a, “Joaba lama ṭang leh Davida lama ṭang apiang chuan Joaba zui zêl rawh se,” a ti a.

¹²Tin, Amasa chu lamlian lai takah a thiin a lo bual nuaih mai a. Tin, chu mi chuan mi zawng zawng ding renga a hmuh chuan Amasa ruang chu lamlian ata phûl lamah sawnin puanin a khuh a, a kianga lo kal apiang an ding zêla a hmuh avângin.

¹³Tin, lamlian ata dah sawn a nih hnu chuan Bikria fapa Seba ûm tûrin mi zawng zawngin Joaba chu an zui ta a.

¹⁴Seba chuan Abel thleng leh Beth-maaka thlengin Israel hnam tin chu a tlawh vek a, Ber mite pawh a tlawh a; tichuan, mite chu an pung khâwm a, amah an zui ve ta a.

¹⁵Beth-maaka-ah chuan an rawn hual a; tin, a khaw hrûlah lei an tiang pâwng a, kulh hrûlah chuan an ding a. Tin, Joaba hnêna mi awm zawng zawngte chuan tichim tûrin kulh chu an chhu bur bur a.

¹⁶Chutichuan, hmeichhe fing pakhat khua aṭang chuan a lo au va, “Khai khai! Joaba hnênah, ‘Lo kal hnai rawh, i hnênah thu ka lo sawi teh ang,’ a ti, han ti rawh u khai,” a ti a.

¹⁷Tin, a hnênah chuan a va kal hnai a; tin, hmeichhia chuan, “Joaba i ni em?” a ti a. “Ni e,” a ti a, a chhâng a. Chutichuan, a hnênah, “I bawihnu thusawi hi ngaithla teh,” a ti a. Tin, ani chuan a chhâng a, “Ka ngaithla e,” a ti a.

¹⁸Chutichuan, “Hmânlai chuan, ‘Abel khuaah hian an inrâwn phawt ang,’ an ti ṭhîn a; chutiang chuan thu an titâwp ṭhîn.

¹⁹Kei hi Israel zînga inrem duh leh rinawm pâwla mi ka ni a. Nang chuan Israel khua, a khaw bulpui hi tihchhiat i tum a nih hi. LALPA ro chu engah nge tihmang i tum?” tiin a sawi a.

²⁰Tin, Joaba chuan a chhâng a, “Chutiang a ni awzâwng lo ve, tihmang emaw, tihchhiat emaw ka tum lo rêng rêng e.

²¹Chutiang lam thu chu a ni lo ve. Ephraim tlâng rama mi Bikria fapa a hming Seba chuan lal dodâlin, Davida ngei dodâlin a kut a lek a; amah chu min pe mai ula, khua chu ka chhuahsan mai ang e,” a ti a. Tin, hmeichhia chuan Joaba hnênah, “Ngai teh, a lu chu kulhah kan rawn paih liamsak ang che,” a ti a.

²²Chutichuan, hmeichhia chu a finna thawhin mipui zawng zawngte zîngah chuan a kal a. Tin, Bikria fapa Seba lu chu an tan a, Joaba hnên lamah chuan an theh chhuak a. Tin, tawtawrâwt a hâm a, mahni puan in lam ṭheuhvah khua ata chu an darh ta a. Tin, Joaba chu Jerusalem-ah lal hnênah chuan a haw leh ta a.

²³Joaba chu Israel sipai zawng zawng hotu a ni a; Jehoiada fapa Benaia chu Kereth mi leh Peleth mite hotu a ni a;

²⁴Adorama chu hnathawka rawih luihte hotu a ni a; Ahiluda fapa Jehosaphata chu chanchin ziaktu a ni a;

²⁵Seva chu lehkhaziaktu a ni a; Zadoka leh Abiathara chu puithiam an ni a;

²⁶tin, Jair mi Ira pawh chu Davida puithiam a ni.