Read Mizo_Old_version LEHKHABU PAHNIHNA SAMUELA 21 Bible Online

LEHKHABU PAHNIHNA SAMUELA 21 - Mizo_Old_version bible

LEHKHABU PAHNIHNA SAMUELA 21

¹Tin, Davida dam laiin a kum zâwnin kum thum ṭâm a tla a; tin, Davida chuan LALPA chu a râwn a. Tin, LALPA chuan, “Saula leh a chhûngte, thisen chhuahtute vâng a ni e, Gibeon mite a that mai si a,” a ti a.

²Tin, lal chuan Gibeon mite chu a ko va (Gibeon mite chu Israela thlahte an ni lo va, Amor mi la awm chhunte kha an ni zâwk a; Israel thlahte chuan an lakah chhia an lo chham tawh a; Saula chuan Israela thlahte leh Juda thlahte tâna ṭhahnem a ngaih avângin thah a tum ṭhîn mai a ni);

³Davida chuan Gibeon mite hnênah chuan. “Eng nge ka tihsak ang che u? LALPA ro chu mal in sâwm theih nân eng anga inremna nge ka siam ang?” a ti a.

⁴Tin, Gibeon mite chuan a hnênah, “Saula leh a chhûngte nêna kan chungthuah hian tangkarua leh rangkachak lam thu a ni lo va, Israel zîngah hian mi tihhlum theihna kan nei hek lo,” an ti a. Tin, ani chuan, “In sawi ang apiang chu ka tihsak ang che u,” a ti a.

⁵Tin, lal hnênah chuan, “Mi tiboraltu leh Israel ram chhûngah rêng rêng awm lova tiboral tûra mi phiartu chu,

⁶a fapa pasarihte min pe la, LALPA mi ruat Saula awmna Gibea khuaah chuan LALPA hmaah kan khai hlum ang e,” an ti a. Tin, lal chuan, “Pe ang hmiang,” a ti a.

⁷Nimahsela, lal chuan LALPA hnêna Davida leh Saula fapa Jonathana kâra, an pahniha kâra chhechhamna avângin Saula fapa Jonathana fapa Mephibosetha chu a hum a.

⁸Lal chuan Aii fanu Rizpiin Saula fapa pahnih a hrinsak Armonia leh Mephibosetha erawh chu a hruai a; tin, Meholath mi Barzilaia fapa Adriela, Saula fanu Mikalin fapa panga a hrinsakte nên;

⁹tin, Gibeon mite kutah chuan a hlân a; tin, anni chuan LALPA hmaah tlângah an khai hlum a. Tichuan, an pasarih chuan hmun khatah an thi za a, buh seng hun, barli seng ṭan tirh lai vêlin an tihlum a.

¹⁰Tin, Aii fanu Rizpi chuan saiip puan a la a, buh seng tirh ata vân aṭanga ruahin a rawn nan thlenga a awm nân lungpui chungah a inzâr a; an chunga chhûna chunglêng savate fûk leh zâna ramsate awm pawh a phal lo va.

¹¹Tin, Aii fanu, Saula hmeinu Rizpi thiltih chu Davida an hrilh a.

¹²Tin, Davida chu a kal a, Philistia miten Gilboa-a Saula an thah nia Philistia miten Beth-san mual laia an khai rutu, Jabes-gilead mite hnên ata Saula ruh leh a fapa Jonathana ruhte chu a la a.

¹³Chuta Saula ruhte leh a fapa Jonathana ruhte chu a la chho va; tichuan, an khaiate ruh chu an la khâwm a.

¹⁴Tin, Saula ruhte leh a fapa Jonathana ruhte chu Benjamin rama Zela khuaa a pa Kisa thlânah an phûm a. Tichuan, lal thupêk ang zêlin an ti a. Tin, chumi hnuah chuan chumi ram chungah chuan Pathian a lungawi ta a.

¹⁵Tin, Philistia mite chuan Israel mite chu an do leh a, Davida chu a mite nên an chhuk a, Philistia mite chu an zu bei a; tin, Davida chu a chau ta hle mai a.

¹⁶Tin, Isbi-benoba, mi lian fapate zînga mi, a fei rih lam dâr sekel zathum, ngûnhnâm thar pai chuan Davida chu thah a tum a.

¹⁷Nimahsela, Zeruii fapa Abisaian a chhan a, Philistia mi chu a bei a, a that ta a. Tin, Davida mite chuan, “Israel-te khâwnvâr i tihmih loh nân, indo tûrin kan hnênah i chhuak ve tawh hauh lo vang,” tiin a lakah chhia an chham a.

¹⁸Tin, heti hi a ni a, chumi hnuah chuan Philistia mite nên Gob khuaah indona a awm leh a. Chutichuan, Husath mi Sibekaia chuan mi lian fapate zînga mi Sapha a that a.

¹⁹Tin, Philistia mite nên Gob khuaah an indo leh a; tin, Bethlehem mi Jaare-oregima fapa Elhananan Git mi Goliatha a that a, a fei ngul chu themkawl ang a ni.

²⁰Tin, Gath khuaah indona a awm leh a, chutah chuan mi sâng tak mai, a kut lehlam lehlama zungṭang paruk, a ke lehlam lehlama zungṭang paruk, a vaia sawmhnih leh pali nei hi a awm a; ani pawh mi lian laka piang a ni.

²¹Tin, Israel mite chu a va cho va, Davida unau Simeia fapa Jonathana chuan a lo that a.

²²Tin, chûng palite chu Gath khuaah mi lian laka piang an ni a, chûng chu Davida leh a mite kutah an thi a.