Read Mizo_Old_version LEHKHABU PAHNIHNA SAMUELA 22 Bible Online

LEHKHABU PAHNIHNA SAMUELA 22 - Mizo_Old_version bible

LEHKHABU PAHNIHNA SAMUELA 22

¹Tin, Davida chuan a hmêlma zawng zawng kut ata leh Saula kut ata LALPAN a chhanchhuah ni chuan, he hla thu hi LALPA hnênah a sawi a.

²Tichuan, ani chuan, “LALPA chu ka lungpui leh ka kulhpui leh mi chhanhimtu a ni a, ka ta ngei a ni;

³Ka lungpui Pathian, amah chu ka ring ang; Ka phaw leh ka chhandamna ki, ka kulhbîng sâng leh ka inhumhimna a ni; Ka chhandamtu, nangin pâwngnawrna lak ata mi chhandam ṭhîn a.

⁴Fak tlâk LALPA chu ka ko vang a; Chutichuan, mi dotute lakah chhandamin ka awm ang.

⁵“Thihna fâwn chuan min hual vêl a, Pathian ngaihsak lohna tui lian chuan mi tihlau va.

⁶Seol hruihrualte chuan mi phuar vêl a; Thihna thangte chuan mi âwk a.

⁷Ka manganin LALPA chu ka ko ṭhîn a, A ni, ka Pathian chu ka au ṭhîn; Ani chuan a biak in aṭang chuan ka aw a hria a; Tin, ka au thâwm chu a bengah a lût ta a.

⁸“Chu veleh lei hi a nghîng a, a khûr ta a. A thinur avângin vân innghahnate lamin a khûrin a nghîng ta a.

⁹A hnâr aṭang chuan meikhu a chho ta ngut ngut a, A kaa chhuak mei chuan a kâng ta hluah hluah a; Chu chuan meihawl pawh a tialh ta dur dur a.

¹⁰Tin, ani chuan vânte pawh a tikûn a, a chhuk ta a; A ke hnuaiahte chuan thim chhah mup hi a awm a.

¹¹Cherub chungah a chuang a, a thlâwk ta a; A ni, thli thlaahte chuan an hmu a.

¹²Tin, thim chu amah hual vêlna bûktêah a siam a, Tuite, vâna chhûm chhah mupte chu fâwk khâwmin.

¹³A hmaa ênna avâng chuan Meilingte chu a alh a.

¹⁴“LALPA chu vânah khian a lo ri dur dur a, Chungnungbera chuan a aw a chhuah a.

¹⁵Tin, thalte chu a kâp chhuak a, anniho chu a tidarh a; Kâwl te a phêttîr a, a tibuai ta nuaih hlawm a.

¹⁶Chu veleh LALPA zilhhauna avânga, A hnâra thaw chhuakin a chhêm vak avâng chuan, Leilung nghahchhante chu tihlanin a awm ta a.

¹⁷“Ani chuan chung lam aṭangin a rawn ban a, mi chelh a; Tui tam tak ata mi hnûk chhuak a;

¹⁸Mi dotu chak tak lakah chuan mi chhanhim a, Mi hawtute lakah pawh; keia tân chuan an chak lutuk si a.

¹⁹Anni chuan ka vânduai ni chuan mi bei a; Nimahsela, LALPA chu ka innghahna ber a ni.

²⁰Ani chuan hmun thâwl takah mi hruai chhuak a; Ka chunga a lâwm avângin mi chhanhim ta a ni.

²¹“LALPA chuan ka felzia ang zêlin ka chungah a ti a; Ka kutte a thianghlimzia ang ngeiin mi rûl a ni.

²² LALPA kawngte chu ka zawh a, Ka Pathian hnên ata chu sual takin ka kal bo ngai si lo va.

²³A rorêlna zawng zawng chu ka hmaah a awm ṭhîn a; A thuruatte lah chu ka hawisan ngai si lo va.

²⁴Ama lakah chuan sawisêl bo ka ni bawk a, Ka khawlohna ata ka inthiarfihlîm ṭhîn a.

²⁵Chuvângin, LALPA chuan ka felzia ang zêlin mi lo rûl ta a; A mit hmuha ka thianghlimzia ang zêlin.

²⁶“Mi khawngaih thei tak lakah chuan khawngaih thei takin i intilang ang a, Mi ṭha famkim lakah chuan ṭha famkimin i intilang ang a;

²⁷Mi thianghlim lakah chuan thianghlimin i intilang ang a; Tin, mi luhlul lakah chuan luhlulin i intilang ang.

²⁸Hrehawm tuar mite chu i chhandam ang a; Mi chapote erawh chu i tihtlâwm theih nân an chungah i mit a fu reng a.

²⁹Aw LALPA, ka khâwnvâr i ni si a; LALPA chuan ka thimna hi a tiêng ang.

³⁰Nangma ṭanpuiin râl ka bawh si a; Ka Pathian ṭanpui bawkin kulh ka zuan khûm a ni.

³¹“Pathian zawng a kawng chu a ṭha famkim a; LALPA thu chu fiah a ni tawh; Amah ringtu zawng zawngte tân chuan ani chu phaw a ni.

³² LALPA lo chu tu nge Pathian awm ni? Kan Pathian lo chu tu nge lungpui awm ni?

³³Pathian chu ka kulhpui nghet tak a ni a, Ka kawng a tiṭha famkim ṭhîn.

³⁴Ka kete chu zukpui ke angin a siam a, Ka hmun sângahte mi awmtîr ṭhîn.

³⁵Ka kutte hi râl kâp tûrin a zirtîr ṭhîn a; Chutichuan, ka bânte hian dâr thalngul a kuai zo hial a.

³⁶“Nangin i chhandamna phaw chu mi pe bawk a; I inngaihtlâwmnain mi siam lian ta.

³⁷Ka hnuaia ka ke pênna chu i tizau va; Tichuan, ka kete hi a tleng lo.

³⁸Mi dotute chu ka ûmpha a, ka tiboral a; Tihboral dêra an awm hma loh chuan ka kîr hek lo.

³⁹An thawh leh theih lohna tûrin ka tiboral dêr a, ka sât chhawk a; A ni, ka ke hnuaiah an tlu ta a.

⁴⁰Nangin inbeihna atân chuan chaknain ka taiah mi hrêng si a; Mi rawn beitute chu ka hnuaiah i tudawl ta a.

⁴¹Mi hawtute chu ka tihboral theihna tûrin, Nangin mi dotute chu mi hnuchhawnin i awmtîr ta bawk a.

⁴²An hawi vêl a; nimahsela, chhandamtu tûr tu mah an awm lo va; LALPA ngei chu an han en a; nimahsela, a chhâng si lo.

⁴³Chu veleh leia vaivut ang maiin ka vaw sawm dep a; Kawtlai chirhdiak ang maiin ka tipherh a, ka theh darh vek a.

⁴⁴“Nangin ka mite sualna lakah pawh mi chhanhim ta a; Hnam tin lu ni tûrin mi vawng ṭha a. Ka hriat ngai loh hnam chuan ka rawng an bâwl tawh ang.

⁴⁵Hnam dangte chu ka hnênah an inpe ang a; Ka chanchin an hriat veleh ka thu an zâwm ang.

⁴⁶Hnam dangte chu an chuai ang a, An kulhbîng atate chu khûr chungin an lo chhuak ang.

⁴⁷“LALPA chu a nung reng e! Ka Lungpui chu fakin awm sela! Mi chhandamna Lungpui, Pathian chu chawimawiin awm rawh se!

⁴⁸Phuba mi lâksaktu leh Hnam tin ka hnuaia tudawltu Pathian ngei chu a ni;

⁴⁹Mi dotute lak ata mi la chhuak a. A ni, nangin mi beitute chung lamah chuan mi chawi kâng a; Mi nunrâwng lak ata chu mi chhanhim ṭhîn a.

⁵⁰Chuvângin, aw LALPA, hnam tin zîngah chuan lâwm thu ka hrilh ang chia, I hming fakin ka zai bawk ang.

⁵¹Ani chuan chhandamna ropui tak a lal a pe thîn a; A hriak thiha chungah, Davida leh a thlahte chung ngeiah chuan Kumkhuain a ngilneihzia a lantîr ang,” a ti a.