Read Mizo_Old_version LEHKHABU PAHNIHNA SAMUELA 23 Bible Online

LEHKHABU PAHNIHNA SAMUELA 23 - Mizo_Old_version bible

LEHKHABU PAHNIHNA SAMUELA 23

¹Hêng hi Davida thusawi hnuhnûng ber a ni. Jesaia fapa Davida, Sâng taka chawi sâna, Jakoba Pathian hriak thiha, Israel-te hla mawi tak phuahtu chuan a sawi a:

²“LALPA thlarau chuan keimah mi hmangin a sawi a, A thu chu ka leiah a awm a.

³Israel-te Pathian chuan a sawi a, Israel-te Lungpui chuan: ‘Mi chunga fel taka rorêl ṭhîna chu, Pathian ṭih chunga rorêl ṭhîna chu,

⁴Ni a lo chhuaha chhûm awm hauh lo Zîng êng ang hi a ni ang a, Ruah sûr hnua khaw lo thianga, Leia hlobet chawr no dep ang hi a ni ang.

⁵“ ‘Kan chhûngkua chu Pathian hnêna mi a ni lâwm ni? Chatuan thuthlung chu ka hnênah a thlung a, Engkim fel leh tinghet tlatin. Ka chhandamna kim leh duhthusâm kim, A chawr chhuahtîr lâwng maw?

⁶Mi suaksualte erawh chu an zain a hnâwla hnâwl bo mi, hlîng ang an ni ang a, Kuta lâk mi an ni si lo.

⁷A khawihtu tûr chuan thîr leh fei ngul rawih zâwk tûr a ni a; Tichuan, an hmunah hâl ral vek an ni ang,’ tiin mi bia a,” a ti a.

⁸Hêng hi Davida sipai huaisen hmingte chu a ni: Takemon mi Josebasebetha chu sipai hotute zînga hotu ber a ni a; ani chu ṭum khata mi zariat thattu Eznit mi Adinoa an tih bawk kha a ni.

⁹Tin, a dawttu chu Aho mi Dodova fapa Eleazara a ni a; chu mi chu Philistia mite indo tûra an pun khâwma, an chova, Israel mite an kal bo vek laia Davida hnêna sipai huaisen pathumte zînga pakhat kha a ni.

¹⁰Ani chu a tho va, Philistia mite chu a kut a khama a khandaih pawh thlah thei lo hial khawpin a that a. Chumi ni chuan LALPAN nasa takin a ngamsak a; tin, mipuite chu a hnungah râllâk thil la tûr ngawtin an lo kîr leh a.

¹¹Tin, chumi dawttu chu Harar mi Agea fapa Samma a ni a. Tin, dailuah awm chûkna hmunah Philistia mite chu lâk tumin an infâwk khâwm a; tin, mipuite chuan Philistia mite chu an tlânchhiatsan a.

¹²Nimahsela, ani chu chumi hmunah chuan a ding a, a vêng tlat a, Philistia mite chu a that a; tin, LALPAN nasa takin a ngamsak a.

¹³Tin, sipai huai huai sawmthum zînga pathumte chu an chhuk a, buh seng lai takin Davida hnênah Adulam pûkah an kal a; tin, Philistia sipaiho chuan Rephaim kâwnah ṭanhmun an khuar a.

¹⁴Tin, chutih lai chuan Davida chu kulhbîngah a awm a, chutih lai bawk chuan Philistia sipaiho chu Bethlehem-ah an awm a.

¹⁵Tin, Davida chuan tui a châk êm êm mai a, “Bethlehem-a tuichhunchhuah tui, kulh kawngkhâr kianga mi kha in tûra mi pe han awm teh sela aw!” a ti a.

¹⁶Chutichuan, sipai huaisen pathumte chuan Philistia sipaiho chu an tâwn tlang a, kulh kawngkhâr kianga mi Bethlehem-a tuichhunchhuah tui chu an va chawi a, an keng a, Davida hnênah an kalpui a; nimahsela, a lo in duh lo va, LALPA tân a bun chhuak ta zâwk a.

¹⁷“Aw LALPA, hei hi ka tih loh tûrzia mai chu! Thih huama kalte thisen chu ka in dâwn em ni?” a ti a; chutichuan, a in duh ta lo va. Chûng thilte chu sipai huaisen pathumte chuan an ti a ni.

¹⁸Zeruii fapa Joaba unau Abisaia chu an pathum zînga hotu ber a ni a. A feiin mi zathum a bei a, a that a, pathumte zîngah chuan hmingṭhat a hlawh a.

¹⁹Pathumte zîngah chuan chawimawi tlâk ber a ni lâwm ni? Chuvângin, an hotu atân an siam a; nimahsela, chungnung ber pathum zînga chhiar tel a kai lo.

²⁰Tin, Kebzeel mi huai fapa Jehoiada fapa Benaia, thil nasa tak titu chuan Moab mi huaisen Ariela fapate pahnih a that a; tin, a zuk chhuk a, vûr tlâk hun laiin khuarkhurumah sakeibaknei a zuk that bawk a.

²¹Tin, Aigupta mi, mi lian tak a that a. Aigupta mi chuan fei a keng a; nimahsela, Benaia chuan tiang kengin a zuk pan a, Aigupta mi fei ken chu a chhuhsak a, ama fei chuan a chhun hlum ta a.

²²Jehoiada fapa Benaia chuan chutiang thil chu a tih avângin sipai huaisen pathumte zîngah chuan hmingṭhat a hlawh a.

²³Mi sawmthumte ai chuan chawimawi tlâk a ni a; nimahsela, chungnung ber pathumte zînga chhiar tel a kai lo. Tin, Davida chuan amah vêngtu hotu atân a dah a.

²⁴Joaba unau Asahela chu sawmthum zînga pakhat a ni a; Bethlehem khuaa mi Dodova fapa Elhanana te,

²⁵Harod mi Sama te, Harod mi Elika te,

²⁶Pal mi Heleza te, Teko mi Ikesa fapa Ira te,

²⁷Anathoth mi Abiezera te, Husath mi Mebunaia te,

²⁸Aho mi Zalmona te, Netophath mi Maharaia te,

²⁹Netophath mi Baana fapa Heleba te, Benjamina thlah Gibea khuaa mi Ribaia fapa Ithaia te,

³⁰Pirathon mi Benaia te, Gaas-a luitea mi Hidaia te,

³¹Arbath mi Abi-albona te, Bahurim mi Azmavetha te,

³²Saalbon mi Eliaba te, Jasena fapate zînga Jonathana te,

³³Harar mi Sama te, Harar mi Sarara fapa Ahiama te,

³⁴Maakath mi Ahasbaia fapa Elipheleta te, Gilon mi Ahithophela fapa Eliama te,

³⁵Karmel mi Hezraia te, Arbit mi Paaraia te,

³⁶Zoba khuaa mi Nathana fapa Igala te, Gad mi Bania te,

³⁷Zeruii fapa Joaba râlthuam kengtu Amon mi Zeleka te, Beerot mi Naharaia te,

³⁸It mi Ira te, It mi Gareba te,

³⁹Hit mi Uria te an ni: an za chuan sawmthum leh pasarih an ni.