Read Mizo_Old_version LEHKHABU PAHNIHNA SAMUELA 24 Bible Online

LEHKHABU PAHNIHNA SAMUELA 24 - Mizo_Old_version bible

LEHKHABU PAHNIHNA SAMUELA 24

¹Tin, LALPA thinurna chu Israel-te chungah a lo thawk leh ta thut a, “Kal la, Israel mi leh Juda mite chhiar vek rawh,” tiin, Davida chu an pawi khawih tûrin a chawk tho va.

²Tin, lal chuan a hnêna awm sipai hotu Joaba hnênah chuan, “Israel hnam zawng zawng zîngah hian Dan aṭanga Beer-seba thlengin vâk vêl la, mi eng zât nge an nih ka hriat theih nân chhiar vek rawh u,” a ti a.

³Tin, Joaba chuan lal hnênah, “Lalpa i Pathian chuan mipuite tipungin, eng zâta tam pawh, a leh za pawh lalpa ka pu hian hmu hman rawh se; nimahsela, lalpa ka pu chuan chu chu engah nge maw hriat a châk le?” a ti a.

⁴Nimahsela, lal thu chuan Joaba leh sipai hotute chu a hneh ta a. Tichuan, Joaba leh sipai hotute chu Israel mite chhiar tûr chuan lal hnên ata chu an chhuak ta a.

⁵Tin, Jordan râl an va kai a; tin, Gad ruam lai tak ding lama khaw awm Aroer-ah chuan Jazer thlengin awmhmun an khuar a.

⁶Tin, Gilead ram leh Tahtim-hodsi ram an thleng a; tin, Dan-jaan an thleng a, Zidon panin an kal vel a;

⁷tin, Tura kulh te an va thleng a; tin, Hiv-ho leh Kanaan mite khua zawng zawng an thleng a; tin, Judai chhim lam Beer-seba-ah an kal a.

⁸Chutichuan, ram zawng zawng an fan chhuah hnu chuan thla kua leh ni sawmhnih ralah Jerusalem-ah an lo haw a.

⁹Tin, Joaba chuan mihring zât chin chu lal a pe a. Tin, Israel ramah chuan khandaih keng mi, mi huaisen nuai riat an awm a; tin, Juda mi chu nuai nga an awm a.

¹⁰Tin, mihring a han chhiar zawh chuan Davida thinlung chu a na ta hle mai a. Tin, Davida chuan LALPA hnênah, “Ka thiltihah hian nasa takin ka lo sual ta a ni; nimahsela, tûnah hian aw LALPA, i chhiahhlawh khawlohna hi dah bo tûrin ka ngên a che; âtthlâk takin ka lo ti ta a ni e,” a ti a.

¹¹Tin, zînga Davida a han thawh chuan Davida zâwlnei, zâwlnei Gada hnênah LALPA thu a lo thleng a,

¹²“Kal la, Davida hnênah, ‘LALPAN heti hian a ti: “Thil kawng thum ka ruatsak chia, i chunga ka tih tûrin pakhat thlang rawh,” a ti e,’” tiin.

¹³Chutichuan, Gada chu Davida hnênah a kal a, a hrilh a, a hnênah, “I ramah hian kum sarih ṭâm i chunga a lo tlâk nge, i hmêlma hmaa an ûm chhûng chea thla thum lo tlân bo rih nge, i rama ni thum hri lo lên? Mi tîrtu eng angin nge ka chhân dâwn inngaihtuah la, mi hrilh rawh khai,” a ti a.

¹⁴Tin, Davida chuan Gada hnênah, “Ka mang a ang hle mai. LALPA kutah tlu lût phawt mai ila, a zahngaihna chu a nasa hle si a; mihring kutah chuan mi tlûk luhtîr lul suh ang che,” a ti a.

¹⁵Chutichuan, LALPA chuan Israel mite chungah chuan zîng aṭangin hun ruat ang thleng chuan hri a lêntîr a; tichuan, mipui zînga mi chu Dan aṭangin Beer-seba thlengin mi sîngsarih an thi a.

¹⁶Tin, vântirhkohvin tichhe tûra Jerusalem lama a kut a han lek chuan, LALPAN thil ṭha lo tih a tum chu a lamlêt a, mite tiboraltu vântirhkoh hnênah chuan, “A tâwk tawh e; i kut lek tawh suh,” a ti a. Tin, LALPA vântirhkoh chu Jebus mi Arauna hruih bulah chuan a awm a.

¹⁷Tin, Davidan mi tihlumtu vântirhkoh a hmuh chuan LALPA a bia a, “Ngai teh, ka lo sual ta a, dik lo takin thil ka lo ti ta a ni; mahse, hêng berâmte hian eng thil nge an tih? I kut chuan keimah leh ka pa chhûngte mi khawih zâwk rawh se aw,” a ti a.

¹⁸Tin, chumi ni chuan Gada chu Davida hnênah a kal a, a hnênah, “Chho la, Jebus mi Arauna hruihah LALPA tân maichâm han siam rawh,” a ti a.

¹⁹Tin, Davida chu LALPAN thu a pêk anga Gadan a hrilh ang chuan a chho ta a.

²⁰Tin, Arauna chu a han hawi a, a lam pana lal leh a hote lo kal chu a hmu a. Tichuan, Arauna chu a chhuak a, a hmaia lei siin lal hmaah chuan a bawkkhup a.

²¹Tin, Arauna chuan, “Eng vângin nge lalpa ka pu chu a chhiahhlawh hnênah a lo kal le?” a ti a. Tin, Davida chuan, “Mipuite laka hri a kian theihna tûra LALPA tâna maichâm siam nâna i hruih lei tûrin,” a ti a.

²²Tin, Arauna chuan Davida hnênah, “LALPA ka pu chuan âwm a tih chu la sela, hlân ang hmiang. En teh, hâlrala hlan atân bâwngpate chu a awm a; tin, thing atân hruih hmanruate leh sebâwng thuamnate chu a awm a.

²³Aw lalpa, hêng zawng zawng hi Arauna chuan lal a pe vek e,” a ti a. Tin, Arauna chuan lal hnênah, “LALPA i Pathian chuan lo chhâng che rawh se,” a ti a.

²⁴Tin, lal chuan Arauna hnênah, “Ni lo ve a, man neiin a lei ngeiin ka leisak zâwk ang che; eng mah insêngso lovin LALPA ka Pathian hnênah hâlral thilhlante ka hlân tawp lo vang,” a ti a. Chutichuan, Davida chuan hruih leh sebâwngpate chu tangka sekel sawmngain a lei ta a.

²⁵Tin, Davidan chutah chuan LALPA tân maichâm a siam a, hâlral thilhlante leh remna thilhlante a hlân a. Chutichuan, LALPA chu an ram chungah chuan a lungawi a, Israel ram ata hri chu a kiang ta a.