Read Mizo_Old_version LEHKHABU PAHNIHNA SAMUELA 3 Bible Online

LEHKHABU PAHNIHNA SAMUELA 3 - Mizo_Old_version bible

LEHKHABU PAHNIHNA SAMUELA 3

¹Saula chhûngte leh Davida chhûngte chu rei tak an indo va; Davida chu a lo chak tial tial a, Saula chhûngte erawh chu an chak lo tial tial a.

²Davida chuan Hebron khuaah chuan fapate a nei a: a fa hmasa ber chu Amnona, Jezreel mi Ahinoami laka mi a ni;

³a dawttu chu Kileaba, Karmel mi Nabala nupui Abigaili laka mi a ni; a pathumna chu Absaloma, Gesur lal Talmaia fanu Maaki fapa a ni;

⁴a palina chu Adonija, Hagithi fapa a ni a; a pangana chu Sephatia, Abitali fapa a ni a;

⁵a parukna chu Ithreama, Davida nupui Ekli laka mi a ni. Hêngte hi Davida fa Hebron-a piangte chu an ni.

⁶Tin, heti hi a ni a, Saula chhûngte leh Davida chhûngte an indo chhûng chuan Abnera chu Saula chhûngte zîngah chuan a intichak deuh deuh va.

⁷Saula chuan hmei a nei a, a hming chu Rizpi a ni a, Aii fanu a ni. Tin, Isbosetha chuan Abnera hnênah, “Engati nge ka pa hmeinu hnênah i kal?” a ti a.

⁸Chutichuan, Isbosetha thusawi chuan Abnera chu a tithinur ta hle mai a. “Juda-ho uicho lu mai em ka nih ni? Vawiin thlengin i pa Saula chhûngte leh a unaute leh a ṭhiante chungah ngilneihna ka tilang a, Davida kutah ka hlân lo chia; nimahsela, nangin he hmeichhe chunga sualah hian mi puh ta mai a.

⁹Saula chhûngte lak ata ram chu lâksaka, Israel leh Juda-te chungah Dan aṭanga Beer-seba thlenga Davida lalṭhutthlêng tungding tûra LALPAN Davida hnêna chhia a chham anga ka tih loh chuan, Pathianin Abnera chu a tih tihin ti sela, chu aia nasa pawhin,” a ti a.

¹¹Tichuan, Abnera chu a hlauh avângin chhân rêng rêng a chhâng ngam ta lo va.

¹²Tin, Abnera chuan a aiah Davida hnênah, “He ram hi tu ta nge ni?” tiin mi a tîr a; tin, “Ka hnênah thu thlung rawh; tichuan, ngai teh, Israel mi zawng zawngte i hnên lama ṭang tûrin ka kut chu i lamah a ṭang ang,” tiin a sawi bawk a.

¹³Tin, ani chuan, “Aw le, i hnênah chuan thu ka thlung ang e; amaherawhchu, i lakah thil pakhat ka phût dâwn a ni: chu chu hei hi a ni, mi hmu tûra i lo kal hunah Saula fanu Mikali i rawn hruai phawt loh chuan ka hmêl i hmu thei lo vang,” a ti a.

¹⁴Tin, Davida chuan Saula fapa Isbosetha hnênah chuan, “Philistia mite serh vun zaa ka lei ka nupui Mikali chu mi rawn pe rawh,” tiin mi a tîr a.

¹⁵Tin, Isbosetha chuan mi a tîr a, a pasal Laisa fapa Paltiela ngei hnên ata chu an hruai ta a.

¹⁶Tin, a pasal chu a hnênah a kal a, ṭap chung zêlin a kal a, Bahurim thlengin a zui a. Chutichuan, Abneran a hnênah, “Kal rawh, kîr leh rawh,” a ti a; tin, a kîr leh ta a.

¹⁷Chutichuan, Abnera chuan Israel mite upaho chu a bia a, “Tûn hma khân Davida chu in lalah in duh ṭhîn a.

¹⁸Tûnah hian siam rawh u khai. LALPAN Davida chungchâng thu-ah chuan, ‘Ka chhiahhlawh Davida kutin ka mi Israel-te chu Philistia mite kut ata leh, an hmêlmate zawng zawng kut ata ka chhanchhuak ang,’ tiin a sawi e,” tiin.

¹⁹Tin, Abnera chuan Benjamin mite beng hriatah a sawi bawk a; tin, Abnera chu Israel mite leh Benjamina chhûng zawng zawngten ṭha an tih ang apiang, Hebron-a Davida beng hriatah sawi tûrin a kal bawk a.

²⁰Chutichuan, Abnera chu Hebron-a Davida hnênah mi sawmhnih nên an kal a. Tin, Davida chuan Abnera leh a hnêna mi sawmhnihte tân ruai a ṭheh a.

²¹Abnera chuan Davida hnênah, “Ka tho vang a, i hnêna thu an thlun theih nân leh i duhthusâm ang taka ro i rêl theih nân Israel mite zawng zawng ka lalpa hnêna kai khâwm tûrin ka kal tâng e,” a ti a. Tin, Davida chuan Abnera chu a kaltîr a; tichuan, thlamuang takin a kal ta a.

²²Tin, ngai teh, Davida mite leh Joaba rammu chu an lo haw a, râllâk sum tam tak an rawn hâwn a; nimahsela, Abnera chu Hebron-a Davida hnênah chuan a lo awm tawh lo, a lo kaltîr tawh si a, ani pawh thlamuang takin a kal ta a ni.

²³Joaba leh a hnêna mipui zawng zawng an lo thlen chuan, “Nera fapa Abnera chu lal hnênah a lo kal a, ani chuan a kaltîr leh ta a, thlamuang takin a kal ta,” tiin Joaba chu an hrilh a.

²⁴Chutichuan, Joaba chu lal hnênah a kal a, “I thil lo tih hi engtizia nge ni le? Ngai teh, Abnera chu i hnênah a lo kal a, engati nge i kal botîra, a kal tawh daih mai le?

²⁵Nera fapa Abnera chu i hria a, nangmah tihder tûrin, i chhuak lam leh i lût lam leh i thiltih apiang hriat tumin a lo kal a ni,” a ti a.

²⁶Tin, Davida hnên ata Joaba a lo chhuah chuan Abnera ûm tûrin mi a tîr a, Sira tuichhunchhuah aṭangin an rawn hruai kîr a; nimahsela, Davida chuan a hre lo.

²⁷Tin, Abneran Hebron a lo thlen chuan Joaba chuan kulh kawngkhârah biak rûk tûrin a hruai hrang a, a unau Asahela thisen chhuak thungrulh nân a pumah a vit hlum ta a.

²⁸Tin, nakina Davidan a han hriat chuan, “Nera fapa Abnera thisen chhuah thu-ah hian kei leh ka ram chu LALPA mit hmuhin kan thiang kumkhua ang a;

²⁹Joaba lu chungah tla sela, a pa chhûngte zawng zawng chungah nên; Joaba chhûngte zîngah chuan thi pût emaw, phâr emaw, tiang rinchhana awm mi emaw, khandaiha thi emaw, ṭâm emaw lo awm lovin awm suh se,” a ti a.

³⁰Chutichuan, an unaupa Asahela chu Gibeon-a indonaah a thah avângin, Joaba leh a unau Abisaia chuan Abnera chu an that ta a.

³¹Tin, Davida chuan Joaba leh a hnêna mipui awm zawng zawngte hnênah chuan, “In puante chu pawt thlêr ula, saiip puan sin ula, Abnera chu sûn rawh u,” a ti a. Tin, Davida chuan hlâng chu a zui a.

³²Tin, Abnera chu Hebron-ah chuan an phûm a; lal chuan a aw a chhuah a, Abnera thlânah chuan a ṭap ta a, mipui zawng zawng pawh an ṭap a.

³³Tin, lal chuan Abnera chu a ṭah a, “Abnera chu mi â thihin a thi dâwn em ni?

³⁴I kut chu phuar a ni lo va, i ke chu kawl bun a ni hek lo, Mi suaksual fate hmaa mi a tlu anga i tlûk tâk mai le?” a ti a. Tin, mi zawng zawng chuan an ṭah leh a.

³⁵Tichuan, chhûn a la nih laiin Davida chu chaw eitîr tûrin mi zawng zawng chu an lo kal a; nimahsela, Davida chuan, “Ni tlâk hmaa chaw emaw, thil dang emaw pawh a eia ka ei hlek chuan Pathianin a tih tihin mi ti rawh se, chu aia nasa pawhin,” tiin chhia a chham a.

³⁶Chu chu mi zawng zawngin an hriatin an lâwm êm êm a; lal thiltih apiang chuan mipui zawng zawngte chu a tilâwm zêl a.

³⁷Chutichuan, mipui zawng zawng leh Israel mi zawng zawng chuan, chumi ni chuan Nera fapa Abnera thah chu lal thu a ni lo tih an lo hre ta a.

³⁸Tin, lal chuan a mite hnênah chuan, “Vawiin hian Israel mi lian, mi ropui tak a thi tih in hre na nge?

³⁹Lal atâna hriak thih ni mah ila, vawiinah hian ka chak lo a ni; tin, hêng mi, Zeruii fapate hi ka tân tuar an har lutuk a ni. LALPAN thil ṭha lo titua chu a sualzia ang zêlin thungrûl rawh se,” a ti a.