Read Mizo_Old_version LEHKHABU PAHNIHNA SAMUELA 6 Bible Online

LEHKHABU PAHNIHNA SAMUELA 6 - Mizo_Old_version bible

LEHKHABU PAHNIHNA SAMUELA 6

¹Tin, Davida chuan Israel mite zînga mi thlan ṭhiau sîngthum a khâwm leh a.

²Tin, Davida chu a tho va, Judai rama Baale khua aṭangin, cherub-te chunga chuang sipaihote LALPA hming an puttîr Pathian bâwm chu la chho tûrin, a hnêna mi awm zawng zawngte nên chuan an thawk ta a.

³Tin, Pathian bâwm chu tawlailîr tharah an dah a, tlânga Abinadaba in ata an la chhuak a; Abinadaba fapa Uza leh Ahiova-te chuan tawlailîr thar chu an khalh a.

⁴Tin, tlânga Abinadaba in ata chu Pathian bâwm chawpin an la chhuak a; Ahiova chu Pathian bâwm hma lamah chuan a kal a.

⁵Tin, Davida leh Israel mi zawng zawngte chuan LALPA hmaah chuan thil ri thei chi hrang hrang - fâr thinga siam leh ṭingṭang te, perhkhuang te, khuangtê te, tawtawrâwt bi nei te, dârbenthek te an tum a.

⁶Tin, Nakona hruih zâwl an thlen chuan Uza chuan Pathian bâwm chu a han ban a, a chelh a; sebâwng chu a pai a pai avângin.

⁷Tin, LALPA thin chu Uza chungah chuan a ur ta thut a, a thiltih dik loh avâng chuan Pathianin chutah chuan a tihlum a, Pathian bâwm kiangah chuan a thi ta a.

⁸Tin, LALPA chu Uza chunga a ṭuan tâk avângin Davida chu a thinur a, chumi hmun chu Perez-uza a vuah a, tûn thleng hian a la ni ta reng a.

⁹Tin, chumi ni chuan Davida chuan Lalpa chu a hlau va; “Engtin nge LALPA bâwm chu ka hnên a lo thlen theih tâk ang?” a ti a.

¹⁰Chutichuan, Davida chuan LALPA bâwm chu Davida khuaa ama hnênah chuan a suan duh ta lo va; Davida chuan Git mi Obed-edoma in lamah a dah ta zâwk a.

¹¹Tin, LALPA bâwm chu Git mi Obed-edoma inah chuan thla thum a awm a; tichuan, Obed-edoma leh a chhûngte zawng zawng chu LALPAN mal a sâwm a.

¹²Tin, Lal Davida chu, “Pathian bâwm avângin Obed-edoma chhûngkua leh a in leh lo zawng zawng LALPAN mal a sâwm a ni,” tiin an hrilh a. Tichuan, Davida chuan Pathian bâwm chu Obed-edoma in ata Davida khuaah chuan lâwm takin a zuk la ta a.

¹³Tin, heti hi a ni a, LALPA bâwm zâwntute chu pên ruk an kal veleh sebâwngpa leh ran châwm thauvin an inthawi a.

¹⁴Tin, Davida chu a theihtâwpin LALPA hmaah a lâm a, Davida chuan puanzaisîn puithiam kawr a ha a.

¹⁵Chutichuan, Davida leh Israel mi zawng zawngte chuan au dur dur chung leh tawtawrâwt hâm ruai ruai chungin LALPA bâwm chu an la chho ta a.

¹⁶Tin, heti hi a ni a, LALPA bâwm chu Davida khuaa a luh lai chuan Saula fanu Mikali chuan tukverh aṭangin a lo thlîr a, LALPA hmaa Davida zuang leh lâm chu a hmu a, a hmusit rilru ta a.

¹⁷Tichuan, LALPA bâwm chu an la lût a, a dahna tûra Davidan a zâr, puan in chhûnga a hmun tûrah chuan an dah ta a; tin, Davida chuan hâlral thilhlante leh remna thilhlante LALPA hmaah chuan a hlân a.

¹⁸Tin, Davidan hâlral thilhlan leh remna thilhlante chu a hlan zawh chuan sipaihote LALPA hmingin mipuite chu mal a sâwm a.

¹⁹Tin, mipui zawng zawng, Israel pum puite chu a hmei a pain mi tin, chhang hlâwm khat leh sa hrang khat leh grêp rah pho ro bâwr khat a sem ṭheuh va.

²⁰Chutichuan, mi zawng zawng mahni in lam ṭheuhvah an haw ta a. Chutichuan, Davida chu a chhûngte malsâwm tûrin a haw leh ta a. Tin, Saula fanu Mikali chu Davida hmuak tûrin a lo chhuak a, “Vawiina Israel lal chu a va ropui ve le, mi ho tak, zah nachâng hre lo, saruaka awm ang maiin vawiinah a chhiahhlawh nulate mit hmuhah saruakin a awm kha le!” a lo ti a.

²¹Tin, Davida chuan Mikali hnênah chuan, “I pa leh a chhûngte zawng zawng aia mi thlanga, LALPA mi, Israel-te chunga lala mi ruattu LALPA hmaah asin. LALPA hmaah chuan lâm âwm rêng ka ni alâwm.

²²Hêng ai mah hian ka la zahpuiawm ang, keimah pawh ka la insit cheu vang; amaherawhchu, chûng chhiahhlawh nula i sawite chawimawi chuan ka awm ang,” a ti a.

²³Chutichuan, Saula fanu Mikali chuan a thih thlengin fa a nei lo va.