Read Mizo_Old_version LEHKHABU PAHNIHNA SAMUELA 7 Bible Online

LEHKHABU PAHNIHNA SAMUELA 7 - Mizo_Old_version bible

LEHKHABU PAHNIHNA SAMUELA 7

¹Tin, heti a ni a, lal chu a ina a awma, LALPAN an vêla a hmêlmate zawng zawng laka râlmuanga a awmtîr hnu chuan,

²lal chuan zâwlnei Nathana hnênah, “Hei, kei chu sidar thing inah ka awm a; nimahsela, Pathian bâwm chu puan in maiah a awm a,” a ti a.

³Tin, Nathana chuan lal hnênah, “I rilrua awm ang tak chuan va ti rawh, LALPA i hnênah a awm alâwm,” a ti a.

⁴Tin, heti a ni a, chumi zân vêk chuan Nathana hnênah,

⁵“Ka chhiahhlawh Davida chu va hrilh rawh, ‘LALPA chuan heti hian a ti: Ka awmna tûrin nangin in min saksak dâwn em ni?

⁶Israela thlahte Aigupta ram ata ka hruai chhuah aṭangin tûn thlengin inah ka awm lo va, puan inah leh biakbûkah ka awm zêl zâwk ṭhîn a.

⁷Israela thlahte zînga ka kalna zawng zawngah pawh, ka mi Israel-te châwm tûra thu ka pêk rorêltute hnênah, “Engati nge sidar thingin in min saksak loh?” tiin ka sawi ngai em ni?’

⁸“Chuvângin, ka chhiahhlawh Davida hnênah, ‘Sipaite LALPA chuan heti hian a ti a ni: Berâm tlatna hmun ata i berâm vêng lai chu ka mi Israel-te chunga hotu atân ka la chia.

⁹Tin, i kalna apiangah i hnênah ka awm zêl a, i hmaah chuan i hmêlmate ka tibo zêl a; leia mi ropui takte hming ang hming ropui tak ka siam che a.

¹⁰Chu bâkah chuan, ka mi Israel-te tân hmun ka ruat ang a, anmahni pual hmunah an awma, an insuan tawh loh nân anni chu ka phun ang a; tûn hma ang khân suahsualna faten an tirethei tawh lo vang a, ka mi Israel-te chunga rorêltute ka ruat lai ang kha a ni tawh hek lo vang;

¹¹tin, i hmêlma zawng zawng lak ata hi ka chawlhtîr ang che. Tin, chu lo rêngah pawh, LALPAN chhûngkua chu a dinsak ang che tih a hrilh bawk che a ni.

¹²I ni a kina i pute hnêna i mut hunah chuan, i hnua i thlah, i rîla rah tûr chu ka tungding ang a, a ram chu ka tinghet ang.

¹³Ani chuan ka hming atân in a sa ang a; tin, a ram lalṭhutthlêng chu kumkhua atân ka tinghet ang.

¹⁴A Pa ka ni ang a, ani chu ka fapa a ni ang a. Thil a tihsual chuan, mihring tiang leh mihring fate vuaknain ka thunun ang.

¹⁵Nimahsela, i hmaa ka sawn bo Saula hnên ata ka lâk bo ang khân ka zahngaihna chuan ani zawng a kalsan lo vang.

¹⁶Tin, i chhûngkua leh i ram chu chatuana tihngheh tlat a ni ang a, i lalṭhutthlêng chu chatuana tihngheh a ni ang,’ a ti,” tiin LALPA thu a lo thleng a.

¹⁷Chûng thu zawng zawng ang zêl leh chu inlârna ang chiah chuan Nathana chuan Davida hnênah a sawi a.

¹⁸Chutichuan, Lal Davida chu a lût a, LALPA hmaah chuan a ṭhu a; “Aw Lalpa PATHIAN, tu nge maw ka niha, ka chhûngte pawh tu nge maw an niha, heti chen chen mi hruai?

¹⁹Aw Lalpa PATHIAN, chûng pawh chu nanga mit hmuhah chuan thil tê tham mai zawng a ni a; nimahsela, i chhiahhlawh chhûngkaw lo awm dân tûr thu chu kum tam tak chhûng atân i lo sawi tawh bawk a; aw Lalpa PATHIAN, hêngte pawh hi mihringte tih dân ang bawk a ni a.

²⁰Davida hian i hnênah eng nge a sawi lehchuan ang? I chhiahhlawh hi i hre vek si, aw Lalpa PATHIAN.

²¹I chhiahhlawh hriat tûrin i thu avâng leh nangma thinlung ang zêlin hêng thil ropui tak hi i ti ta a.

²²Chu vâng chuan aw LALPA Pathian, nang chu i ropui a ni; kan benga kan hriat dânin nangmah ang rêng rêng an awm lo va, nangmah lo chu Pathian rêng rêng an awm hek lo.

²³Aigupta ram ata leh hnam tin leh an pathiante lak ata i tâna i thlan chhuah, i mite hmaa i tân thil ropui tak leh i ram tâna thil hlauhawm tak ti tûr leh, ama hming ropui tak siam tûra Pathianin ama mite atâna a rawn thlan chhuah, i mi Israel-te ang rêng rêng hi khawvêlah hian hnam dang tu nge awm?

²⁴Chutichuan, i mi Israel-te chu chatuana i mite an lo nih theih nân i tân i tinghet ta a; tin, LALPA, nang chu an Pathian i lo ni ta a.

²⁵“Tichuan, aw LALPA Pathian, i chhiahhlawh chungchâng thu leh a chhûngte chungchâng thu i sawi chu chatuan atân tinghet la, i sawi tawh ang khân ti ang che.

²⁶Tin, ‘Sipaihote LALPA chu Israel-te Pathian a ni,’ tiin, i hming chu chatuana chawimawiin awm rawh se; tichuan, i chhiahhlawh Davida chhûngte chu i hmaah tihnghehin an awm ang.

²⁷Aw sipaihote LALPA, Israel-te Pathian, i chhiahhlawh hnênah, ‘Chhûngkua chu ka dinsak ang che,’ tiin i puang tawh si a. Chuvângin, i chhiahhlawh chuan he ṭawngṭaina hi i hnênah a thlen ngam a ni.

²⁸Aw Lalpa PATHIAN, Nang chu Pathian i ni a, i thu chu thutak a ni a; tin, he thil ṭha hi i chhiahhlawh hnênah i tiam tawh a.

²⁹Chuvângin, i chhiahhlawh chhûngte chu i hmaa chatuana an awm reng theih nân malsâwm ang che; aw Lalpa PATHIAN, nang chuan i sawi tawh si a; tin, i malsâwmnain i chhiahhlawh chhûngte chu chatuana malsâwmin awm rawh se,” a ti a.