Read Mizo_Old_version LEHKHABU PAHNIHNA SAMUELA 8 Bible Online

LEHKHABU PAHNIHNA SAMUELA 8 - Mizo_Old_version bible

LEHKHABU PAHNIHNA SAMUELA 8

¹Tin, chumi hnuah chuan heti a ni a, Davida chuan Philistia mite chu a bei a, a hneh a; tichuan, Davida chuan Philistia mite thuneihna bulpui chu a chhuhsak a.

²Tin, Moab mite a bei a, leiah a muttîr a, tehna hruiin a teh a. Tlar hnih chu tihhlum tûrin a teh a, tlar khat chu a tluana nunga zuah tûrin a teh a. Tichuan, Moab mite chu Davida chhiah khua an lo ni ta a, chhiahte an pe ṭhîn a.

³Davida chuan Luia a ram la leh tûra a kal pahin Zoba lal Rehoba fapa Hadadezera pawh a bei a.

⁴Tichuan, Davida chuan a sakawr chung chuang mi 1,700 leh sipai 20,000 a mansak a. Davida chuan tawlailîr hnûk mi sakawr zawng zawng chu an tha a chhahsak bawk a, tawlailîr za hnûktu tûr erawh chu a zuah a.

⁵Tin, Damaska-a Suria mi, Zoba lal Hadadezera chhan tûra kalte chu Davidan Suria mite zînga mi 22,000 a that a.

⁶Chutichuan, Davida chuan Suria rama Damaska-ah chuan sipai a dah a; tichuan, Suria mite chu Davida chhiah khua an lo ni ta a, chhiahte an pe ṭhîn a. Tin, LALPAN Davida chu a kalna apiangah a hnehtîr zêl a.

⁷Tin, Davida chuan Hadadezera hote rangkachak phawte a lâksak a, Jerusalem-ah a hâwn a.

⁸Tin, Hadadezera khua Beta aṭang te, Berothai aṭangtein Davida chuan dâr tam tak a la a.

⁹Tin, Hamath lal Toia chuan Hadadezera sipai zawng zawng Davidan a hneh tih a lo hria a.

¹⁰Hadadezera chu a beiha a hneh avânga chibai bûk tûr leh lâwmpui tûrin Toia chuan a fapa Jorama chu Davida hnênah a tîr a; Hadadezera chuan Toia hi a do ṭhîn si a. Tin, Jorama chuan tangkaraw bêl te, rangkachak bêl te, dâr bêlte a rawn keng a.

¹¹Chûng chu ram dang a ngam zawng zawnga mi tangkarua leh rangkachak a hlante nên chuan Lal Davidan LALPA hnênah a hlân bawk a;

¹²Suria-ho ta te, Moab-ho ta te, Amona thlahho ta te, Philistia-ho ta te, Amalek-ho ta te, Zoba lal Rehoba fapa Hadadezera laka a râllâkte chu.

¹³Tin, Davida chu Chi Ruamah, Suria mi 18,000 a bei haw chu a hming a lo thang ta a.

¹⁴Tin, Edom-ah chuan sipai a dah a; Edom ram hmun tinah sipai a dah thluah mai a; tichuan, Edom mi zawng zawng chu Davida chhiah khua an lo ni ta a. Tichuan, LALPAN Davida chu a kalna apiangah a hnehtîr zêl a.

¹⁵Chutichuan, Davida chuan Israel mi zawng zawng chungah ro a rêl a; tin, Davida chuan a mi zawng zawngte chungah chuan fel takin ro a rêl a.

¹⁶Zeruii fapa Joaba chu sipai hotu ber a ni a; Ahiluda fapa Jehosaphata chu chanchin ziaktu a ni a;

¹⁷Ahituba fapa Zadoka leh Abiathara fapa Ahimeleka chu puithiam an ni a; Seria chu ziaktu a ni a;

¹⁸Jehoiada fapa Benaia chu Kereth mi leh Peleth mite hotu a ni a; tin, Davida fapate chu puithiam an ni.