Read Mizo_Old_version LEHKHABU PAHNIHNA SAMUELA 9 Bible Online

LEHKHABU PAHNIHNA SAMUELA 9 - Mizo_Old_version bible

LEHKHABU PAHNIHNA SAMUELA 9

¹Tin, Davida chuan, “Jonathana avânga khawngaihna ka tihlan theihna tûrin Saula chhûngte zînga mi awm an la awm em aw?” a ti a.

²Tin, Saula chhûngte chhiahhlawh pakhat a hming Ziba a awm a, Davida hnêna kal tûrin an ko va. Tin, lal chuan a hnênah, “Ziba i ni em?” a ti a. Tin, ani chuan, “Ni e, kei i chhiahhlawhpa hi,” a ti a.

³Tin, lal chuan, “Pathian khawngaihna ka tihlan theihna tûrin Saula chhûngte zînga mi an la awm lâwm ni le?” a ti a. Tin, Ziba chuan lal hnênah, “Jonathana chuan fapa pakhat a la nei a, a ke pawh a bai nghe nghe,” a ti a.

⁴Tin, lal chuan a hnênah, “Khawiah nge a awm?” a ti a. Tin, Ziba chuan lal hnênah, “Ngai teh, Lo-debar-ah Amiela fapa Makira inah a awm,” a ti a.

⁵Chutichuan, Lal Davida chuan mi a tîr a, Lo-debar ata Amiela fapa Makira ina mi chu an va hruai a.

⁶Tin, Saula fa Jonathana fapa Mephibosetha chu Davida hnênah chuan a lo kal a, a hmaia lei siin chibai a bûk a. Tin, Davida chuan, “Mephiboseth,” a ti a. Ani chuan, “En teh, i chhiahhlawh hi,” a ti a, a chhâng a.

⁷Tin, Davida chuan a hnênah, “Hlau suh, i pa Jonathana avângin ka khawngaih ngei ngei ang chia, i pu Saula ram zawng zawng ka neihtîr leh ang chia, ka dawhkânah chaw i kîl ve fo tawh ang,” a ti a.

⁸Tin, chibai a bûk a, “Kei, ui thisâwn ang mai, i chhiahhlawh hi eng nge maw a niha i ngaihsak ni?” a ti a.

⁹Chutichuan, lal chuan Saula chhiahhlawh Ziba chu a ko va, a hnênah, “Saula thil zawng zawng leh a chhûngte zawng zawng thilte chu i pu fapa hi ka pe vek a ni.

¹⁰Tin, a tân lei i lehsak ang a, nang leh i fapate leh i chhiahhlawhte nên; tin, i pu fapa chuan ei tûrte a neih theih nân i thawh chhuahte chu i rawn la ang a; i pu fapa Mephibosetha erawh hi chuan ka dawhkânah chaw a kîl fo vang,” a ti a. Ziba chuan fapa sâwm leh panga leh chhiahhlawh sawmhnih a nei a.

¹¹Chutichuan, Ziba chuan lal hnênah, “Ka lal, ka puin a chhiahhlawh thu a pêk ang zêlin i chhiahhlawh hian a ti ang,” a ti a. Lal chuan, “Mephibosetha zawngin ka dawhkânah lal fapa ang bawkin chaw a kîl ang,” a ti a.

¹²Mephibosetha chuan fapa naupang a nei a, a hming chu Mika a ni. Tin, Ziba ina awm zawng zawng chu Mephibosetha chhiahhlawh an ni a.

¹³Chutichuan, Mephibosetha chu Jerusalem-ah a awm ta a, lal dawhkânah chaw a kîl ve fo va; a ke khinghnih a bai a ni.