Read Mizo_Old_version LEHKHABU PAKHATNA LALTE 1 Bible Online

LEHKHABU PAKHATNA LALTE 1 - Mizo_Old_version bible

LEHKHABU PAKHATNA LALTE 1

¹Tin, Davida chu a lo upain, a lo tar ta hle a; tichuan, puanin an khuh ṭhîn a; nimahsela, a lum thei chuang hauh lo va.

²Chutichuan, a puipaten a hnênah, “Kan pu lal tân hian nula i zawng teh ang u; lal bulah hian awm reng sela, enkawl rawh se; tin, i ângchhûngah hian lo mu sela, kan pu lal hi a lo lum thei dâwn nia,” an ti a.

³Chutichuan, Israel ram zawng zawngah chuan nula hmêlṭha an zawng a, Sunam mi Abisagi an va hmu a, lal hnênah chuan an hruai ta a.

⁴Chu nula chu a hmêl a ṭha hle mai a; lal chu a enkawl a, a rawng a bâwlsak ṭhîn a; nimahsela, lal chuan a pâwl lo.

⁵Tichuan, Hagithi fapa Adonija chu, “Keimah ka la lal dâwn hi maw,” tiin a inngai ropui hle mai a; tawlailîr leh sakawr chung chuang mite, mi sawmnga a hmaa tlân tûrte nên a buatsaih a.

⁶A pa lah chuan eng lai mahin, “Engati nge hetiangin i tih?” tiin a tilungni lo ngai si lo va; tin, amah chu hmêlṭha tak a ni bawk a. Absaloma chhang a ni.

⁷Ani chuan Zeruii fapa Joaba leh puithiam Abiathara chu a râwn a; anni chu Adonija lamah an ṭang a, an ṭanpui ṭhîn a.

⁸Puithiam Zadoka te, Jehoiada fapa Benaia te, zâwlnei Nathana te, Simeia te, Reia te leh Davida ho mi huaisente erawh chu Adonija lamah an ṭang ve lo va.

⁹Tin, Adonija chuan berâmte, sebâwngpate, ran châwm thaute Zohelet lungah a talh a, chu chu En-rogel bula awm a ni; tin, lal fapa, a unau zawng zawngte leh, Judai rama lal puipaho zawng zawngte chu a sâwm a.

¹⁰zâwlnei Nathana te, Benaia te, mi huaisenhote leh a unaupa Solomona erawh chu a sâwm ve lo.

¹¹Chutichuan, Nathanan Solomona nu Bathsebi hnênah, “Hagithi fapa Adonija hi kan pu Davida hriat lohvin a lal ta mai tih i hre na nge?

¹²Chutichuan, nangma himna tûr leh i fapa Solomona himna tûr ka lo hrilh teh ang che.

¹³Lal Davida hnênah va lût ta la, a hnênah, ‘Aw lalpa, ka pu, i bawihnu hnênah hian, “I fapa Solomona hi ka hnuah a la lal ngei ngei dâwn a, amah hi ka lalṭhutthlêngah hian a la ṭhu dâwn e,” ti khân chhia i chham a ni lâwm ni kha? Engati nge Adonija lala a awm tâk mai?’ va ti teh.

¹⁴Ngai teh, lal i va biak lai takin kei pawhin ka rawn zui lût ve mai ang chia, i thusawi chu ka rawn nemnghehpui dâwn che nia,” tiin a sawi a.

¹⁵Tin, Bathsebi chu lal hnênah pindanah chuan a va lût a; lal chu a upa tawh hle mai a, Sunam mi Abisagi chuan lal rawng chu a bâwl a.

¹⁶Tin, Bathsebi chuan lal chu kûnin chibai a bûk a. Tin, lal chuan, “Eng nge i duh le?” a lo ti a.

¹⁷Tin, ani chuan, “Ka pu, LALPA i Pathian hming chhâlin i bawihnu hnênah hian, ‘I fapa Solomona hi ka hnuah a la lal ngei ngei dâwn a, amah hi ka lalṭhutthlêngah hian a la ṭhu dâwn e,’ ti khân chhia i chham tawh a.

¹⁸Ngai teh, hei Adonija a lal ta reng mai; nang, ka pu lalpa lah hian i hre ve si lo va.

¹⁹Bâwngpate, ran châwm thaute, berâmte a talh ṭeuh va, lal fapa zawng zawngte leh, puithiam Abiathara leh, sipai hotu Joaba te a sâwm a; i chhiahhlawh Solomona erawh chu a sâwm ve lo.

²⁰Tichuan, ka pu, lalpa hnuah hian a lalṭhutthlêngah tu nge la ṭhu dâwn tih i hrilh chângin Israel-ho zawng zawng mit hi nang, ka pu lalpa, i chungah a fu ṭhup a ni.

²¹Chuti lo zawng, heti hi a ni ang a, ka pu lalpa hi a puteho hnêna a muthilh ve hunah chuan, kei leh ka fapa Solomona hi thil tisualtuah min ruat mai dâwn a ni,” a ti a.

²²Tin, ngai teh, chutia lal a biak lai tak chuan, zâwlnei Nathana chu a lo lût ve a.

²³“En teh, zâwlnei Nathana a lo kal e,” tiin lal chu an hrilh a. Tin, lal kiang a va thlen chuan, lal hmaah chuan a hmaia lei siin a bawkkhup a.

²⁴Tin, Nathana chuan, “Aw lalpa, ka pu, ‘Ka hnuah Adonija hi a lal ang a, ka lalṭhutthlêngah a ṭhu ang,’ i ti em ni?

²⁵Vawiinah hian a chhuk a, bâwngpate, ran châwm thaute, berâmte a talh ṭeuh mai a, lal fapa zawng zawngte, sipai hotute, puithiam Abiathara te a sâwm a; tin, ngai teh, an eiin an in ho va, ‘Pathianin Lal Adonija hi humhim rawh se,’ an ti a ni.

²⁶Amaherawhchu, kei i chhiahhlawh ngei leh, puithiam Zadoka leh, Jehoiada fapa Benaia leh, i chhiahhlawh Solomona hi zawng min sâwm ve lo a ni.

²⁷Hei hi lalpa ka pu thua tih a nih si chuan, lalpa ka pu hian a hnua lalṭhutthlênga ṭhu tûra hi tu ber nge ni tih i chhiahhlawhte hi i lo la hrilh lo a ni ang maw?” a ti a.

²⁸Chutichuan, Lal Davida chuan a chhâng a, “Bathsebi mi han kohsak teh u,” a ti a. Tin, lal kiangah chuan a va kal a, lal hmaah a va ding a.

²⁹Tin, lal chuan chhia a chham a, “Manganna zawng zawnga ka nunna humhimtu LALPA nunna chhâlin,

³⁰i hnêna LALPA, Israel-te Pathian hming chhâla, ‘I fapa Solomona hi ka hnuah chuan a lal ngei ngei ang, ka aiah ka lalṭhutthlêngah hian a la ṭhu dâwn e,’ tia chhia ka chham ang ngei khân, vawiin ngeiah pawh hian ka la ti dâwn a ni,” a ti a.

³¹Chutichuan, Bathsebi chu a hmaia lei siin a bawkkhup a, lal chu chibai a bûk a, “Ka pu Lal Davida hi kumkhuain dam reng rawh se,” a ti a.

³²Tin, Lal Davidan, “Puithiam Zadoka leh, zâwlnei Nathana leh Jehoiada fapa Benaia mi va koh teh u,” a ti a. Tin, a hmaah chuan an va kal a.

³³Tin, lal chuan an hnênah, “In pu puipate hruai ula, ka fapa Solomona hi keima sabengtung ngei chungah chuantîr ula, Gihon hmunah zuk hruai rawh u.

³⁴Tin, puithiam Zadoka leh zâwlnei Nathanan Israel-te lal atân hriak zuk thih rawh se; tin, tawtawrâwt hâm ula, ‘Pathianin Lal Solomona humhim rawh se,’ ti rawh u.

³⁵Tichuan, amah chu in zui chho vang a, ka lalṭhutthlêngah hian a lo ṭhu dâwn nia, amah hi ka aia lal tûr a ni si a; tin, amah hi Israel ram leh Judai ram hotu atân ka ruat a ni e,” a ti a.

³⁶Tin, Jehoiada fapa Benaia chuan lal chu a chhâng a, “Amen! LALPA, ka pu lalpa Pathian pawhin remti ve rawh se.

³⁷LALPA chu ka pu lalpa hnêna a awm ṭhîn angin, Solomona hnênah pawh awm ve zêl sela, ka pu Lal Davida lalṭhutthlêng aiin a lalṭhutthlêng chu tiropui zâwk rawh se,” a ti a.

³⁸Chutichuan, puithiam Zadoka te, zâwlnei Nathana te, Jehoiada fapa Benaia te, Kereth mite, Peleth mite chu an zuk kal a, Solomona chu Davida sabengtung chungah an chuantîr a, Gihon hmunah an hruai a.

³⁹Tin, puithiam Zadoka chuan Puan In ata hriak dahna ki a la a, Solomona chu a thih ta a. Tin, tawtawrâwt an hâm a; tichuan, mi zawng zawngin, “Pathianin Lal Solomona humhim rawh se,” an ti a.

⁴⁰Tin, mipuiho zawng zawng chuan amah chu an zui chho va, mipuite chuan phênglâwngte an tum a, an lâwm nasa khawp a, an thâwm ri chuan lei a nghawr khi a.

⁴¹Tin, Adonija leh a sâwmho a hnêna awm zawng zawngte chuan an ruaiṭheh zawh chuan an han hria a. Tin, Joaban tawtawrâwt ham rîk a han hriat chuan, “Khawpui chhûnga thâwm ri awm ta dur dur chu engtizia nge maw ni chu le?” a ti a,

⁴²Chutia a tih lai tak chuan ngai teh, puithiam Abiathara fapa Jonathana a va kal a. Adonija chuan, “Lo kal teh khai, nang zawng mi fel i ni a, chanchin ṭha i rawn thlen châwk ang chu maw?” a lo ti a.

⁴³Tin, Jonathanan a chhâng a, Adonija hnênah chuan, “Thlen lo ve! Kan pu, Lal Davidan Solomona lalah a siam ta alâwm maw le.

⁴⁴Ama rualin puithiam Zadoka te, zâwlnei Nathana te, Jehoiada fapa Benaia te, Kereth mite, Peleth mite lalin a tîr a; lal sabengtung chungah an chuantîr a.

⁴⁵Tin, puithiam Zadoka leh zâwlnei Nathanan Gihon hmunah lal atân hriak an thih ta a; chuta ṭang chuan hlim takin an lo chho va, chu chuan khawpui chhûng a khâwk rum rum a ni. Chu chu a ni in thâwm hriat chu.

⁴⁶Tin, Solomona chu ram lalṭhutthlêngah chuan a ṭhu ta bawk a.

⁴⁷Tin, lal puipate chu, ‘I Pathianin i hming aiin Solomona hming chu tiṭha zâwk sela, i lalṭhutthlêng aiin a lalṭhutthlêng chu tiropui zâwk rawh se,’ tia kan pu Lal Davida lawmpui tûrin an kal chiam bawk a; tin, lal chu khum siin a kûn a.

⁴⁸Tin, lal pawh chuan heti hian a ti, ‘LALPA, Israel-te Pathian, vawiin ngeia ka lalṭhutthlênga ṭhu tûr rawn ruattu chu fakin awm rawh se, ka mit ngeiin a hmuh tâk hi,’ a ti bawk a,” a ti a.

⁴⁹Tin, Adonija mi sâwmte zawng zawng chuan an hlau ta a, an tho va, mahni kawng kawngah an kal ta vek a.

⁵⁰Tin, Adonija chuan Solomona chu a hlau ta a; a tho va, maichâm ki a va vuan ta a.

⁵¹Tin, “Ngai teh, Adonijan Lal Solomona a hlau va; ‘Lal Solomona hian a chhiahhlawh hi khandaiha tihlum lo tûrin ka hnênah chhia chham phawt rawh se,’ tiin maichâm ki a vuan e,” tiin Solomona chu an hrilh a.

⁵²Tin, Solomona chuan, “Mi rinawm tak a nih a tihlan phawt chuan a sam zai khat pawh leiah a tla lo vang; amaherawhchu, suahsualna a nei tih hriatna a awm chuan a thi ang,” a ti a.

⁵³Chutichuan, Lal Solomona chuan mi a tîr a, maichâm ata chu an va hruai thla a. Tin, a va kal a, Lal Solomona chu chibai a bûk a; tin, Solomona chuan a hnênah, “I inah haw tawh,” a lo ti a.