Read Mizo_Old_version LEHKHABU PAKHATNA LALTE 11 Bible Online

LEHKHABU PAKHATNA LALTE 11 - Mizo_Old_version bible

LEHKHABU PAKHATNA LALTE 11

¹Solomona chuan Pharaoa fanu chang lo pawh hnam dang hmeichhe tam tak - Moab te, Amon te, Edom te, Sidon te, Hit-ho hmeichhiate a hmangaih a;

²chûng hnamho chungchâng thu chu LALPAN Israela thlahte hnênah, “Anmahni pâwl suh ula, anni pawhin pâwl che u suh se, an pathiante lamah in thinlung an hruai kawi ngei dâwn si a,” tiin a lo sawi tawh rêng a. Chûngho chu Solomona chuan hmangaihnain a vuan tlat a.

³Tichuan, nupui zasarih, lal fanu a nei a, hmei zathum nên; tin, a nupuite chuan a thinlung an hruai kawisak ta a.

⁴Tin, heti hi a lo ni ta a, Solomona chu a lo upat hnu chuan, a nupuite chuan pathian dangte lamah a thinlung an hruai kawisak a; tichuan, a pa Davida thinlung angin LALPA a Pathian lamah chuan a thinlung chu a lo ṭha famkim ta lo va.

⁵Solomona chuan Zidon-ho pathiannu Astarothi leh Amon-ho pathian tenawm tak Milkoma chu a lo zui ve ta mai a.

⁶Tin, Solomona chuan LALPA mit hmuhin thil sual a lo ti ta a, a pa Davida angin LALPA chu a zui tlat ve ta lo va.

⁷Chutichuan, Solomona chuan Jerusalem bula tlângah Moab-ho pathian tenawm tak Kemosa tân leh, Amona thlahte pathian tenawm tak Moleka tân hmun sâng a lo siam ta a.

⁸Chutiang bawkin hnam dang a nupui zawng zawng, an pathiante hnêna inthawia rimtui hâl ṭhînte tân pawh a siamsak a.

⁹Chutichuan, LALPA, Israel-te Pathian, a hnêna vawi hnih lai inlâra, he thu, pathian dangte a zui tûr a ni lo tih thu lo petu chu, a thinlungin a hawisan tâk avângin Solomona chungah chuan LALPA thin a lo ur ta a; LALPAN thu a pêk chu pawm si hek lo.

¹¹Chuvângin, LALPAN Solomona hnênah chuan, “Hetiang hian i lo awm ta a, ka thuthlungte leh ka thuruatte pawm tûra thu ka pêk che hi i lo pawm ta si lo va, ram hi ka chhuhsak ngei ang chia, i chhiahhlawh ka pe ang.

¹²Amaherawhchu, i pa Davida avângin i dam chhûng êm chuan ka ti rih lo vang a; nimahsela, i fapa zawng ka chhuhsak dâwn a ni.

¹³Ram zawng zawng erawh chu ka chhuhsak vek lo vang a; nimahsela, ka chhiahhlawh Davida avâng leh ka thlan Jerusalem avâng hian hnam khat chu i fapa ka pe ang,” a ti a.

¹⁴Tin, LALPAN Edom mi, Hadada chu Solomona hmêlmaah a rawn din chhuak ta a; amah chu Edom rama lal thlah a ni.

¹⁵Tin, heti hi a ni a, Davida Edom rama a awm laia, an mi thahte phûm tûra sipai hotu Joaba a han kala, Edom mi mipa fa tawh phawt chu a han thah vek hnu khân

¹⁶(Joaba leh Israel mi zawng zawng chu thla ruk zet, Edom rama mipa zawng zawng a tihhlum vek hma loh chuan an awm a ni a),

¹⁷Hadada chu a pa chhiahhlawhte zînga Edom mi ṭhenkhat nên Aigupta rama kal tûrin an tlân a. Hadada chu naupang tê a la ni a.

¹⁸Midian ram ata an chhuak a, Paran-ah an kal a; tin, Paran aṭangin mite an hruai a, Aigupta ram, Aigupta ram lal Pharaoa hnên an zuk thleng a; ani chuan in te a lo pe a, ei tûr te a lo ngaihtuahsak a, ram te a lo pe bawk a.

¹⁹Hadada chuan Pharaoa mit a tlung hle mai a; tichuan, a nupui ngei laizâwn, Lalnu Tahpenesi laizâwn chu nupuiah a neihtîr a.

²⁰Tin, Tahpenesi laizâwn chuan fapa Genubatha a hrinsak a, Tahpenesi chuan Pharaoa inah a hnute hnêk bânna a siamsak a. Tin, Genubatha chu Pharaoa inah Pharaoa fate zîngah chuan a awm ta a.

²¹Tin, Hadadan Aigupta ram aṭanga Davida chu a puteho hnênah a muhîl ta tih leh, sipai hotu Joaba pawh a thi tawh tih a lo hriatin, Hadada chuan Pharaoa hnênah, “Kan rama ka haw theih nân mi chhuahtîr ta che,” a ti a.

²²Chutichuan, Pharaoan a hnênah, “Ka hnêna i awm hian tlâkchham eng nge i neih ni le, ngai teh, chutia in ram lama haw leh i tum tâk mai?” a ti a. Tin, ani chuan, “Eng mah phei chu nei lo ve; nimahsela, mi kaltîr rêng rêng rawh khai,” a ti a.

²³Tin, Pathianin a hmêlmaah Eliada fapa Rezona, a pu Hadadezera, Zoba lal hnên ata tlân bo tawh kha a rawn din chhuak leh a.

²⁴Davidan Zoba khuaa mite a thah khân ani chuan a hnênah mite a kai khâwm a, sipai hotuah a ṭang ta a. Tin, Damaska khuaah an kal a, chutah chuan an awm a, Damaska khuaah chuan lalah a ṭhu ta a.

²⁵Hadada tihhrehawmna belhchhahin Solomona dam chhûng zawng, Israel-te hmêlma a ni ṭhîn rêng a; Israel-te a haw hle mai a, Suria ram chungah ro a rêl a.

²⁶Tin, Nebata fapa Jeroboama, Zereda khuaa Ephraim mi, Solomona chhiahhlawh pawh chuan (a nu hming chu Zeru-i a ni a, hmeithai a ni a), chu mi pawh chuan lal chungah a kut a lek ve a.

²⁷Lal chunga a kut a lek chhan chu hetiang hi a ni: Solomonan Milo a siam a, a pa Davida khua chu a chhe laite a siam ṭha a.

²⁸Chu Jeroboama chu mi chak huaisen a ni a; tichuan, Solomonan chu tlangvâl chu mi taima tak nia a hriat avângin, Josefa chhûngte hnathawh zawng zawng chunga hotuah a siam a.

²⁹Tin, chûng lai chuan heti hi a ni a, Jeroboama Jerusalem khua ata a kal chhuak chu Silo mi zâwlnei Ahijan kawnglakah a lo hmu a; Ahija chuan puan thar a sin a, an pahnih chauh chuan phûlah an awm dûn a.

³⁰Tin, Ahija chuan a puan thar sin chu a la a, phel sâwm leh phel hnihah a pawt thlêr a.

³¹Jeroboama hnênah chuan, “Phel sâwm hi la rawh khai, LALPA, Israel-te Pathianin heti hian a ti a ni: ‘Ngai teh, ram hi Solomona ka chhuhsak ang a, hnam sâwm chu ka pe dâwn che a ni

³²(amaherawhchu, ka chhiahhlawh Davida avâng leh Israel hnam zawng zawng zînga ka thlan khawpui, Jerusalem avâng hian hnam khat zawng a nei ang chu);

³³anni chuan mi kalsan a, Zidon-ho pathiannu Astarothi te, Moab-ho pathian Kemosa te, Amon-ho thlahte pathian Milkoma-te an biak avâng leh, ka mit hmuha thil ṭha ti tûr leh, ka thuruatte leh ka rorêlte hi pawm tûra a pa Davida anga ka kawngte an zawh loh avângin.

³⁴Ram pum pui zawng ka chhuhsak lo vang; amaherawhchu, ka thupêkte leh ka thuruatte pawmtu, ka thlan, ka chhiahhlawh Davida avângin a dam chhûng chuan lalah ka la awmtîr ang.

³⁵Nimahsela, ram hi a fapa ka chhuhsak ang a, nangmah hi ka pe dâwn che a ni, hnam sâwmte chu.

³⁶Tin, ka chhiahhlawh Davidan ka hming awmtîr nâna ka thlan khawpui Jerusalem-ah hian, ka hmaa khâwnvâr a neih reng theihna tûrin hnam khat chu a fapa ka pe ang.

³⁷Nang hi ka ruat ang chia, i duh ang angin ro i rêl ang a, Israel-te lalah i awm ang.

³⁸Tin, heti hi a ni ang a, thu ka pêk apiang che i pawma, ka kawngte i zawha, ka chhiahhlawh Davida anga ka thuruatte leh ka thupêkte zâwm tûra ka mit hmuha thil ṭha i tih chuan i hnênah ka awm zêl ang a, Davida ka din nghehsak ang khân chhûngkaw nghet ka dinsak ang chia, Israel-te hi ka pe ang che.

³⁹Chu vâng chuan Davida thlah chu ka tihrehawm dâwn a ni; amaherawhchu, kumkhua zawngin a ni lo vang,’ a ti e,” tiin.

⁴⁰Chutichuan, Solomona chuan Jeroboama chu thah a tum ta a. Nimahsela, Jeroboama chu a tho va, Aigupta ram lal Sisaka hnênah a tlân a, Solomona thih hma loh chuan Aigupta ramah a awm ta a.

⁴¹Solomona chanchin dangte leh, a thiltih zawng zawng leh a finnate chu Solomona thiltih ziakna buah a chuang a ni lâwm ni?

⁴²Solomonan Israel-ho zawng zawng chunga Jerusalem khuaa ro a rêl chhûng chu kum sawmli a ni.

⁴³Tichuan, Solomona chu a pute hnênah chuan a muhîl a, a pa Davida khawpuiah chuan an phûm ta a. Tin, a fapa Rehoboama chu a aiawhin a lal ta a.