Read Mizo_Old_version LEHKHABU PAKHATNA LALTE 12 Bible Online

LEHKHABU PAKHATNA LALTE 12 - Mizo_Old_version bible

LEHKHABU PAKHATNA LALTE 12

¹Tin, Rehoboama chu Sekem khuaah a kal a; Israel-ho zawng zawng chu Sekem khuaah chuan lala siam tûrin an kal tawh si a.

²Tin, heti hi a ni a, Nebata fapa Jeroboaman chumi thu chu a lo hriat chuan (Lal Solomona hnên aṭanga a tlân bona Aigupta rama la awm a ni a; tichuan, Jeroboama Aigupta rama a la awm reng chu an zuk kohtîr a),

³Jeroboama leh Israel pung khâwmho zawng zawng chu an lo kal a, Rehoboama hnênah,

⁴“I pa khân kan nghâwngkawl a tirit êm êm ṭhîn a; chuvângin, i pa min chhawr rimna leh, a nghâwngkawl rit tak kan chunga a nghah hi min tihzânsak la; tichuan, i rawng kan bâwl ang e,” tiin an rawn sawi a.

⁵Tin, ani chuan an hnênah, “Ni thum chhûng chu lo va kal kiang ta rih ula; tin, ka hnênah lo kal leh ang che u,” a ti a. Tin, mipuite chu an kal kiang ta a.

⁶Tin, Lal Rehoboama chuan a pa Solomona dam laia a bula awm ṭhîn upahote chu, “Hêng mipuihote hi ka chhân dân tûr rem eng nge mi ruatpui le?” tiin a râwn a.

⁷Tin, anni chuan a hnênah, “Tûnah hian hêngho chhiahhlawha i awma, an rawng i bâwla, anmahni chu i chhâna, an hnêna thu ṭha tak sawi i tum chuan, kumkhuain i chhiahhlawhah an awm ang,” tiin an sawi a.

⁸Nimahsela, upaho remruatpui chu a pawm lo va, ama rualpui tlangvâlho, a bula awm ṭhînte chu a râwn ta zâwk a.

⁹An hnênah chuan, “Hêng mipuiho, ka hnêna, ‘I pan kan chunga nghâwngkawl a nghah hi min tihzânsak rawh,’ tia sawitute hi ka chhân dân tûr rem eng nge mi ruatpui le?” a ti a.

¹⁰Tin, a rualpui tlangvâlhote chuan a hnênah, “Hêng mipuiho, ‘I pa khân kan nghâwngkawl a tirit êm ṭhîn a, nang chuan min tihzânsak rawh khai,’ i hnêna titute hnênah chuan hetiang hian ti la, hetiang hian an hnênah sawi ang che: ‘Ka pa kâwng ai chuan ka zungtê hi a lian zâwk.

¹¹Ka pa khân nghâwngkawl rit tak a lo bahtîr che u a, kei chuan in nghâwngkawl chu ka belhchhah dâwn asin; ka pan vuaknain a lo hrîng ṭhîn che u a, kei erawh chuan khawmualkaikuangin ka hrîng dâwn che u a ni!’ tiin,” an ti a.

¹²Chutichuan, Jeroboama leh mipuiho zawng zawng chu lalin, “Ni thum chinah ka hnênah lo kal leh ang che u,” tia a hrilh ang khân, a ni thum ni chuan Rehoboama hnênah an va kal a.

¹³Tin, lal chuan mipuite chu chang takin a lo chhâng a, upahote remruatpui kha a pawm lo va;

¹⁴tlangvâlhote remruatpui ang khân, “Ka pan in nghâwngkawl a lo tirit a, kei chuan in nghâwngkawl chu ka belhchhah dâwn asin; ka pan vuaknain a lo hrîng ṭhîn che u a, kei erawh chuan khawmualkaikuangin ka hrîng dâwn che u a ni!” a ti a.

¹⁵Chutichuan, lal chuan mipuite thusawi kha a pawm ta lo va; chu chu LALPA vâng a ni, LALPAN Silo mi Ahija hmanga, Nebata fapa Jeroboama hnêna a thu lo sawi tawh kha a tihngheh theih nân.

¹⁶Tin, Israel-ho zawng zawng chuan lalin an thusawi a pawm lo tih an hriatin, mipuite chuan, “Davidaah hian chanvo eng nge kan neih le? Jesaia fapaah chuan ro luah tûr kan nei hek lo. Aw Israel-te u, in puan in lamah haw rawh u. Aw David, i chhûngkua ngaihtuah mai tawh,” tiin lal chu an chhâng a. Chutichuan, Israel-ho chu an puan in lamah an kal ta a.

¹⁷Israela thlah, Judai ram khuaa awmte erawh chu, an chungah Rehoboaman ro a rêl a.

¹⁸Tichuan, Lal Rehoboama chuan hnathawka rawih luihte hotu Adorama a tîr a; ani chu Israel-ho zawng zawng chuan lungin an dêng a, a thi ta a. Tin, Lal Rehoboama chu Jerusalem khuaa tlân tumin a tawlailîrah a chuang ta thuai a.

¹⁹Chutichuan, Israel-hote chu Davida chhûngte chungah an lo hel ta a ni, tûn thleng hian.

²⁰Tin, heti hi a ni a, Israel-ho zawng zawngin Jeroboama chu a lo kîr leh tih an hriatin punkhâwmnaa lo kal tûrin an kohtîr a, Israel-ho zawng zawng chunga lalah an siam ta a. Juda hnam ngawt lo chu tu mahin Davida chhûngte an zui lo.

²¹Tin, Rehoboama chuan Jerusalem khua a han thlen chuan, Israela chhûngte chu dova, Solomona fapa Rehoboama rama la leh tûrin Juda chhûngte zawng zawng leh, Benjamin hnam, mi huaisen ṭhiau thlan chhuah nuai khat leh sîngriat zet a khâwm a.

²²Nimahsela, Pathian mi Semaia hnênah Pathian thu a lo thleng a,

²³Judai ram lal Solomona fapa Rehoboama hnênah leh Juda leh Benjamina chhûngte zawng zawng hnênah leh mipui dangte hnênah chuan,

²⁴“LALPAN heti hian a ti, ‘Han kal suh u, Israela thlah, in unauteho chu han do hek suh u. Mahni in lamah haw leh vek tawh u; hei hi keima tih a ni e, tiin,’ sawi rawh,” tiin. Chutichuan, LALPA thu chu an awih a, LALPA thu ang chuan an kîr a, an haw leh ta vek a.

²⁵Chutichuan, Jeroboama chuan Ephraim tlâng ramah Sekem khua a siam a, chutah chuan a awm a; tin, chuta ṭang chuan a chhuak a, Penuel khua a siam a.

²⁶Tin, Jeroboama chuan a rilruin, “Ram hi Davida chhûngte ta a lo ni leh nghe nghe ang â:

²⁷he miteho hi Jerusalem khuaa LALPA ina inthawinate hlân tûra an kal chuan, he miteho thinlung hi an lalpa Rehoboama, Judai ram lal lamah hian a thle leh mai ang a; tichuan, kei hi min that ang a, Judai ram lal Rehoboama lamah an pakai leh mai ang â,” a ti a.

²⁸Chutichuan, lal chuan mi a râwn a, rangkachak bâwngno lem pahnih a siam a, an hnênah chuan, “In tân Jerusalem khuaa han kal chu a harsa lutuk êm a, aw Israel-te u, en teh u, Aigupta ram ata hruai chhuaktu che u in pathiante hi!” a ti a.

²⁹Tin, pakhat chu Bethel-ah a dah a, pakhat chu Dan-ah a dah a.

³⁰Chu thil chu sual a lo ni ta a ni; mipuite chu a pahniha be tûrin Dan thleng thlengin an kal si a.

³¹Tin, hmun sâng inte a sa a, Levia fate ni lo, vântlang zînga mi puithiamahte a siam a.

³²Jeroboama chuan Judai rama kût an neih ang bawkin thla riatna, chumi thla ni sâwm leh ni nga ni chu kût niah a ruat ve a, maichâmah chuan a han kal a. Bethel-ah chuan a bâwngno lem siam hnêna inthawiin chutiang chuan a ti a ni. Tin, a siam hmun sâng puithiamte chu Bethel-ah a dah a.

³³Tin, amahin a duh anga a ruat thla ngei, thla riatna, ni sâwm leh ni nga niah chuan Bethel-a a maichâm siamah a han kal a. Tin, Israela thlahte tân kût a ruat a, maichâma rimtui hâl tûrin a han kal a.