Read Mizo_Old_version LEHKHABU PAKHATNA LALTE 13 Bible Online

LEHKHABU PAKHATNA LALTE 13 - Mizo_Old_version bible

LEHKHABU PAKHATNA LALTE 13

¹Tin, ngai teh, Judai ram aṭangin Pathian mi, LALPA thuin Bethel-ah a lo kal a; tin, Jeroboama chu maichâm bulah rimtui hâl tûrin a lo ding a.

²Tin, LALPA thuin maichâm chu a au khum a, “Aw maichâm, maichâm, LALPAN heti hian a ti, ‘Ngai teh, Davida chhûngte zîngah fapa a hming Josia a lo piang ang a, i chunga rimtui hâl ṭhîntu, hmun sâng puithiamte hi i chungah hian inthawi nân a la rawn hlân ang a, i chungah hian mihring ruhte an la rawn hâl ang,’ tiin,” a ti a.

³Tin, chumi ni vêk chuan chhinchhiahna a pe a, “Hei hi LALPAN chhinchhiahna tûr a tih chu a ni: ‘Ngai teh u, maichâm hi a la khi phawk ang a, a chunga meivâpte hi a la baw vek ang,’ tih hi,” tiin.

⁴Tin, heti hi a ni a, Pathian miin Bethel-a maichâm a han au khum thu lalin a hriat chuan, Jeroboama chuan, “Man rawh u,” tiin maichâm aṭang chuan a kutin a han ban a. Tin, man tuma a banna kut chu a lo zeng ta a; tichuan, a kut chu a la leh thei ta lo va.

⁵Pathian miin LALPA thua chhinchhiahna tûra a sawi ang khân maichâm pawh chu a khi bawk a, maichâma meivâpte chu a baw ta vek a.

⁶Tin, lal chuan a chhâng a, Pathian mi hnênah chuan, “Ka kut hi a lo dam leh theihna tûrin LALPA i Pathian khawngaihna ngên la, mi ṭawngṭaisak teh khai,” a ti a. Tin, Pathian mi chuan LALPA hnênah a ngên a; tin, lal kut chu a lo dam leh a, a hma ang bawkin a lo awm leh ta a.

⁷Tichuan, lal chuan Pathian mi hnênah, “Ka in lamah ka hnênah lo kal la, va châwl hahdam rih rawh khai; tin, lâwmman ka pe dâwn che nia,” a ti a.

⁸Tin, Pathian mi chuan lal hnênah, “I in lo zâtve pawh mi pe dâwn mah la, i hnênah zawng ka lo kal chuang lo vang; hemi hmunah hian chhang ka eiin tui rêng rêng pawh ka in hek lo vang.

⁹‘Chhang va eiin tui rêng rêng pawh va in suh la, i va kalna kawngah pawh haw leh tawh suh,’ tia LALPA thua tirh ka ni asin,” a ti a.

¹⁰Chutichuan, kawng dangah a kal a, Bethel-a a lo kalna kawngah chuan a haw leh ta lo va.

¹¹Bethel khuaah chuan zâwlnei putar pakhat hi a awm a, a fapate chuan chumi nia Bethel-a Pathian mi thiltih zawng zawng chu an hrilh vek a; lal hnêna a thusawite pawh chu an pa an hrilh bawk a.

¹²Tin, an pa chuan an hnênah “Khawii lam kawngah nge a kal tâk?” a ti a. A fapate chuan Judai ram aṭanga lo kal Pathian mi haw lehna kawng chu an kawhhmuh a.

¹³Tichuan, a fapate hnênah, “Sabengtung mi han siam teh u,” a ti a. Chutichuan, sabengtung chu an siamsak a; tichuan, a chuang ta a.

¹⁴Tin, Pathian mi chu a ûm ta a, sasaw thing hnuaia a ṭhu hi a va hmu a; a hnênah, “Nangmah hi em ni Judai ram aṭanga lo kal Pathian mi chu?” a ti a. Tin, ani chuan, “Ni e,” a ti a.

¹⁵Tichuan, ani chuan a hnênah, “Ka in lamah ka hnênah lo kal la, chhang va ei rawh khai,” a ti a.

¹⁶Tin, ani chuan, “I ruala kîr leh thei ka ni lo va, i hnêna lo kal thei pawh ka ni hek lo; hemi hmunah hian i hnênah chhang ka eiin tui rêng rêng pawh ka in hek lo vang.

¹⁷‘Chhang va eiin, tui rêng rêng pawh va in suh la, i va kalna kawngah pawh kîr leh tawh suh,’ tia LALPA thua hrilh ka ni si a,” a ti a.

¹⁸Tin, ani chuan a hnênah, “Kei pawh nangmah ang bawka zâwlnei ka ni alâwm; vântirhkohvin LALPA thuin, ‘Chhang te eia tui te in tûrin i in lamah hruai kîr leh rawh khai,’ tiin mi bia sin,” a ti a. Nimahsela, a hnênah dâwt a sawi a ni.

¹⁹Chutichuan, a hnênah chuan a kîr leh ve a, a inah chuan chhang te a eiin tui te a in ta a.

²⁰Tin, heti hi a ni a, dawhkân an kîl lai chuan a hruai kîrtu zâwlnei hnênah chuan LALPA thu chu a lo thleng a;

²¹Judai ram aṭanga lo kal Pathian mi hnênah chuan, “LALPAN heti hian a ti, LALPA thusawi i awih lohva, LALPA i Pathianin thu a pêk che i pawm loh avâng leh,

²²i lo kîr leha, ‘Chhang va eiin tui rêng rêng pawh va in suh ang che,’ a tihna hmun ngeiah chhang i eia, tui te i in avângin i ruang hi i pute thlâna dah a ni ve lo vang,” tiin a sawi chhuak ta a.

²³Tin, heti hi a ni a, chhang te a eia, tui te a in zawh chuan, zâwlnei a hruai kîr leha chu sabengtung a siamsak a.

²⁴Tin, a kal ta chu kawnglakah sakeibaknei nên an intâwk a, a lo seh ta a. Tin, a ruang chu kawngah chuan theh thal dêrin a awm a, sabengtung chu a bulah chuan a ding a. Sakeibaknei pawh chu ruang bulah chuan a ding ve reng a.

²⁵Tin, ngai teh, mi an va kal a, kawnga ruang theh thal dêra awm leh ruang bula sakeibaknei ding reng chu an va hmu a. Zâwlnei putar pui awmna khuaah chuan an va sawi a.

²⁶Tin, kawnglak ata va hruai kîr lehtu zâwlnei chuan chumi thu a lo hriat veleh chuan, “Pathian mi, LALPA thusawi awih duh lo pa kha a nih chu. Chutichuan, LALPAN a hnêna a sawi, a thu ang ngeiin LALPAN sakeibaknei hnênah a pe a, a lo ham a, a seh hlum ta a nih chu,” a ti a.

²⁷Tin, a fapate hnênah chuan, “Sabengtung mi siamsak teh u,” tiin a sawi a. Tichuan, an siamsak ta a.

²⁸Tin, a kal ta a, a ruang kawnga theh thal dêra lo awm leh sabengtung leh sakeibaknei, ruang bula lo ding reng chu a va hmu a. Sakeibaknei chuan ruang chu a lo la ei lo va, sabengtung pawh chu a lo la tipem lo va.

²⁹Tin, zâwlnei chuan chu Pathian mi ruang chu a hlâwm a, sabengtung chungah chuan a hlâng a, a kîrpui ta a. Tichuan, zâwlnei putar awmna khuaah chuan sûn tûr leh vui tûrin a lût ta a.

³⁰Tin, a ruang chu ama thlânah a zalh a; tichuan, “A va pawi tehlul êm, ka unaupa!” tiin an ṭah a.

³¹Tin, heti hi a ni a, a vui hnu chuan a fapate hnênah, “Ka thih hunah Pathian mi phûmna thlânah hian mi rawn phûm ve ang che u; a ruh bulah ka ruhte hi rawn dah ang che u.

³²Pathian thua Bethel-a maichâm leh, Samari ram khawpuitea hmun sâng in zawng zawng a au khumna thu kha lo thleng ngei ngei tûr a ni si a,” tiin a sawi a.

³³Chûng thil hnuah pawh Jeroboama chuan a awm dân dik lo chu a la bân chuang lo va, vântlang zînga mi hmun sâng puithiam atân a la siam ta cheu va; hmun sâng puithiamte an awm theihna tûrin a duh apiang a tihrang ṭhîn a.

³⁴Chu thil chu Jeroboama chhûngkaw sualna, anmahni tichimittu leh khawvêl ata tiboral hlauhtu a lo ni ta.