Read Mizo_Old_version LEHKHABU PAKHATNA LALTE 14 Bible Online

LEHKHABU PAKHATNA LALTE 14 - Mizo_Old_version bible

LEHKHABU PAKHATNA LALTE 14

¹Chûng lai chuan Jeroboama fapa Abija a damlo va.

²Tin, Jeroboama chuan a nupui hnênah, “Tho la, Jeroboama nupui i ni tih an hriat loh nân che intidanglam la, Silo-ah va kal teh khai; ngai teh, chutah chuan zâwlnei Ahija, he miteho chunga lala ka la awm tûr ka chungchâng thu sawitu kha a awm e.

³Tin, chhangpêr sâwm leh chhang hlâwm tê tê leh khawizu ûm khat keng langin, a hnênah va kal teh; naupang awm dân tûr chu a lo hrilh ang che,” a ti a.

⁴Tin, Jeroboama nupui chuan chutiang chuan a ti a, a tho va, Silo-ah chuan a kal a, Ahija inah chuan a va kal ta a. Ahija chuan khua a hmu thei tawh lo va, a upat avângin a mit a thim tawh si a.

⁵Tin, LALPAN Ahija hnênah, “Ngai teh, Jeroboama nupui, a fapa chungchânga râwn tûr chein a lo kal e, a damlo a ni a. Hetiang hian lo hrilh ang che; heti hi a ni ang a, a lo luh hunah chuan hmeichhe dang ni âwm takin a rawn insiam dâwn a ni,” a ti a.

⁶Tin, heti hi a ni a, Ahijan chutia kawngkaa a lo luh laia a ke rah ri a han hriat veleh chuan, “Nang, Jeroboama nupui, lo lût rawh khai. Engtiziaa mi danga insiam nge i nih? Chanchin ṭha lo tak hrilh tûr chea tirh ka ni asin.

⁷Kal leh ta la, Jeroboama hnênah, ‘LALPA, Israel-te Pathianin heti hian a ti: “Mipuite zîng ata ka chawisâng chia, ka mi Israel-te chungah hian hotuah ka siam chia,

⁸Davida chhûngte ram ka chhuhsak a, chu chu ka pe chia; nimahsela, nang zawng ka chhiahhlawh Davida angin i awm ve lo va, ani zawngin ka thupêkte a pawm a, ka mit hmuha thil ṭha chauh tih tumin a thinlung zawng zawngin mi zui ṭhîn a;

⁹nang erawh chuan i hmaa mite zawng zawng aiin thil i tisual nasa bîk a, mi tihthinrim nân pathian dangte leh milem chhûnte i siam a, mi hnuchhawnsan ta a;

¹⁰chuvângin, ngai teh, Jeroboama chhûngkaw chungah hian thil ṭha lo ka rawn thlentîr ang a, Jeroboama aṭang hian mipa fa tawh phawt chu Israel rama mi, khuahkhirh leh khirh loh pawh ka tiboral ang a, miin êk a phiat fai hliau ang mai hian Jeroboama chhûngkua hi a mang vek hma loh chuan ka phiat bo hlauh dâwn a ni.

¹¹Jeroboama chhûngkaw zînga mi, khawpuia thi apiangte chu uiin an ei ang a, rama thi apiangte chu chunglêng savaten an ei ang; chu chu LALPAN a sawi tawh a ni,” ti ang che.’

¹²Chutichuan, tho la, i in lamah haw leh mai tawh. Khawpui chhûng i rah veleh naupang chu a thi dâwn a ni.

¹³Tichuan, Israel-ho zawng zawngin an sûn ang a, an vui ang, Jeroboama chhûngkaw zîngah chuan amah chauh chu thlâna dah tûr a ni dâwn si a; Jeroboama chhûngkaw zîngah hian amah chauhvah hian LALPA, Israel-te Pathian chunga ṭhatna eng emaw a lan avângin.

¹⁴Tin, LALPAN tûn la laa Jeroboama chhûngkua rawn tiboraltu tûr Israel-te chunga lal a insiam ang; tûnah pawh hian engtin nge ni ta ang le?

¹⁵LALPA chuan tuia rairuang nghîng nghîng ang maiin Israel-te chu a rawn vaw nghîng ang a; tichuan, LALPA thin tirima an Aseri-te chu an siam avângin an pute a lo pêk tawh, he ram ṭha tak ata hi Israel-hote chu a la pawt chhuak fai vek ang a, Lui piah lamah chuan a la tidarh vek ang.

¹⁶Tin, Israel-hote thil tihsualtîra a tih, Jeroboama sualnate avângin Israel-hote chu a hawisan ang,” a ti a.

¹⁷Tin, Jeroboama nupui chu a tho va, a chhuak ta a, Tirza khua a va thleng a; tin, in kawngka bul a va thlen chuan naupang chu a thi ta a.

¹⁸Tin, LALPAN a chhiahhlawh zâwlnei Ahija hmanga thu a lo sawi tawh ang ngei khân Israel-ho zawng zawng chuan an vui a, an sûn ta a.

¹⁹Jeroboama chanchin dang - a râl beih thu te, a rorêl thu te chu - ngai teh, Israel lalte lal lai thu ziakna buah chuan a chuang a.

²⁰Tichuan, Jeroboama rorêl chhûng chu kum 22 a ni; tin, a pute hnênah a muhîl a, a fapa Nadaba chu a aiawhin a lal ta a.

²¹Tin, Solomona fapa Rehoboama chu Judai ramah a lal a. A lal ṭan tirh lai chuan Rehoboama chu kum sawmli leh kum khat mi a ni a, LALPAN a hming awmtîr nâna Israel hnam zawng zawngte zînga a thlan khawpui Jerusalem-ah chuan kum 17 a lal a. A nu hming chu Naami, Amon mi a ni.

²²Juda-ho chuan LALPA mit hmuhin thil sual an ti a; an pute thiltih zawng zawng khûma an sualnate chuan a thikthu a chawhthawhsak a.

²³Tlâng sâng tinah leh thing hring tin hnuaiah hian lungphunte phunin hmun sângte leh Aseri-te lam hi an siam bawk si a.

²⁴Tin, chu ramah chuan mipa inzuarte pawh an awm a. Israel thlahte hmaa LALPAN a hnawh chhuah tâk hnamte thiltih tenawm tinrêng ang chu an ti ve a.

²⁵Tin, Lal Rehoboama lal kum nga kum chuan heti hi a ni a, Aigupta lal Sisakan Jerusalem khua chu a han bei a;

²⁶LALPA ina rote leh lal ina rote chu a la a, a vai chuan a la ta vek a. Solomona rangkachak phaw siam zawng zawng chu a la tel vek bawk a.

²⁷Tin, Lal Rehoboama chuan chûng aiah chuan dâr phawte a siam a, lal in kawngka vêngtu hotute a kawltîr a.

²⁸Tin, heti hi a ni a, lal chu LALPA ina a luh apiangin vêngtute chuan an keng a; tin, vêngtute pindanah an dah leh zêl ṭhîn a.

²⁹Rehoboama chanchin dangte leh a thiltih zawng zawng chu, Juda lalte lal lai thu ziakna buah chuan a chuang a ni lâwm ni?

³⁰Rehoboama leh Jeroboama chu indo rêng rêngin an awm ṭhîn a.

³¹Tin, Rehoboama chu a pute hnênah chuan a muhîl a, Davida khawpuiah a pute zîngah chuan an phûm ta a. A nu hming chu Naami, Amon mi a ni. Tin, a fapa Abijama chu a aiawhin a lal ta a.