Read Mizo_Old_version LEHKHABU PAKHATNA LALTE 15 Bible Online

LEHKHABU PAKHATNA LALTE 15 - Mizo_Old_version bible

LEHKHABU PAKHATNA LALTE 15

¹Nebata fapa Lal Jeroboama kum sâwm leh kum riat a lal kum chuan Juda-hote chungah Abijama chu a lal ṭan a.

²Jerusalem khuaah kum thum a lal a. A nu hming chu Maaki, Abisaloma fanu a ni.

³A hmaa a pain thil sual a tih zawng zawng kha a ti ve a; a pu Davida thinlung angin a thinlung chu LALPA a Pathian lamah a ṭha famkim ve lo va.

⁴Nimahsela, Davida avângin LALPA a Pathianin a hnua a fapa la tundinna tûr leh, Jerusalem khua din nghet tûrin Jerusalem khuaah chuan khâwnvâr a neihtîr a;

⁵Hit mi Uria chungchâng tih lohvah chuan, Davidan LALPA mit hmuha thil ṭha a tih ṭhin avâng leh a dam chhûng zawnga ti tûra thu a pêk tawh phawt chu a hnial ngai hauh loh avângin.

⁶Rehoboama chu a dam chhûng zawng Jeroboama nên an indo reng ṭhîn a.

⁷Abijama chanchin dangte leh a thiltih zawng zawng chu Juda lalte lal lai thu ziakna buah chuan a chuang a ni lâwm ni? Tin, Abijama leh Jeroboama chu an indo ṭhîn a.

⁸Tin, Abijama chu a pute hnênah chuan a muhîl a; tichuan, Davida khawpuiah an phûm ta a. Tin, a aiawhin a fapa Asa chu a lal ta a.

⁹Israel lal Jeroboama kum sawmhnih a lal kum chuan Asa chu Juda-hote chungah a lal ṭan a.

¹⁰Tin, kum sawmli leh kum khat Jerusalem-ah a lal a. A nu hming chu Maaki, Abisaloma fanu a ni.

¹¹Tin, Asa chuan a pu Davida ang bawkin LALPA mit hmuha thil ṭha a ti ṭhîn a.

¹²Tin, mipa inzuarhote chu a ram ata a hnawt chhuak a, a putena milem an lo siam zawng zawng chu a thehthang bo vek a.

¹³Tin, a nu Maaki pawh chu, milem tenawm tak tak Aseri a siam avângin a lal nu nih a bân a. Tin, Asa chuan a milem siam chu a sât thlu a, Kidron luiah a hâl a.

¹⁴Hmun sângte erawh chu a thehthang bo lo va. Nimahsela, Asa thinlung chu a dam chhûng zawng LALPA lamah a ṭha famkim a ni.

¹⁵Tin, a pain thil a lo hlan sa tawhte leh, amah ngeiin a lo hlan tawh - tangkarua te, rangkachak te, bungbêlte chu LALPA inah a la lût a.

¹⁶Tin, Asa leh Israel lal Baasa chu an lal chhûng zawng an indo reng ṭhin a.

¹⁷Tin, Israel lal Baasa chuan Juda-ho a han bei a, Juda lal Asa hnênah lût tûr leh chhuak tûr dan nân Rama khua a siam a.

¹⁸Chutichuan, Asan LALPA in leh lal ina ro la awm, tangkarua leh rangkachak zawng zawng chu a la a, a chhiahhlawhte a pe a; tin, Lal Asa chuan Damaska khuaa awm Suria lal Heziona fa Tabrimona fapa Ben-hadada hnênah chuan,

¹⁹“Kei leh nanga kârah leh ka pa leh i pa kârah thuthlung a awm a. Ngai teh, lâwmman atân tangkarua leh rangkachak ka han thawn a che. Ti teh, Israel lal Baasa hian mi ṭînsanna tûrin a hnêna i thuthlun kha ṭhiat teh mai,” tiin a thawn a.

²⁰Tin, Ben-hadada chuan Lal Asa thu chu a lo pawm a; tichuan, Israel khuate chu bei tûrin a sipai hotute a tîr a, Ijon khua te, Dan khua te, Abel-beth-maaka khua te, Kineroth bial zawng zawng, Naphtali ram zawng zawngte nên a bei a.

²¹Tin, heti hi a ni a, Baasan chumi thu chu a lo hriat veleh Rama khaw siam chu a bâng a, Tirza khuaah a awm ta a.

²²Chutichuan, Lal Asa chuan Judai ram zawng zawngah thu a than vêl ta a; tu mah âwl rêng rêng an awm lo. Tichuan, Baasan Rama khaw siam nâna lung leh thing a hmante chu an thiar a; tin, chûng hmang chuan Lal Asan Mizpe khua leh Benjamin rama Geba khua a siam a.

²³Asa chanchin dang zawng zawng te, a thiltihtheihzia zawng zawng te, a thiltih zawng zawng te, a khaw siamte chu Juda lalte lal lai thu ziakna buah chuan a chuang a ni lâwm ni? Amaherawhchu, a tar lamah a keah hri eng emaw a lo vei ta a.

²⁴Tin, Asa chu a pute hnênah a muhîl a, a pu Davida khawpuiah a pute zîngah an phûm ta a. Tichuan, a fapa Jehosaphata chu a aiawhin a lal ta a.

²⁵Tin, Jeroboama fapa Nadaba chu Juda lal Asa lal kum hnihnaah chuan Israel-hote chungah a lal ṭan a, Israel-hote chungah kum hnih a lal a.

²⁶LALPA mit hmuhin thil ṭha lo tak a ti ṭhîn a, a pa kawng zawh chu a zawh ve a, Israel-hote thil tihsualtîra a tih sualna kha a ti ve a.

²⁷Tin, Isakara chhûngte zînga mi Ahija fapa Baasan amah a phiar ru a, Philistia-ho chan, Gibethon khuaah Baasa chuan a that ta a; Nadaba leh Israel-ho zawng zawngte chuan Gibethon khua chu an hual lai a ni.

²⁸Juda lal Asa lal kum thumnaah a ni, Baasa chuan a thaha, a aiawha a lal ni.

²⁹Tin, heti hi a ni a, lal a nih veleh chuan a tihchimih hma loh chuan Jeroboama chhûngte zawng zawng chu a that a, nung tawh phawt chu pakhat mah Jeroboama chu a zuahsak lo, LALPAN Silo khuaa mi a chhiahhlawh Ahija hmanga a lo sawi tawh ang khân;

³⁰chu chu Israel-hote thil tihsualtîra a tih, Jeroboama sualnate avâng leh LALPA, Israel-te Pathian chu a tihthinrim vâng a ni.

³¹Nadaba chanchin dangte leh a thiltih zawng zawngte chu Israel lalte lal lai thu ziakna buah a chuang a ni lâwm ni?

³²Tin, Asa leh Israel lal Baasa chu an lal chhûng zawng an indo reng ṭhîn a.

³³Juda lal Asa lal kum thumnaah chuan Ahija fapa Baasa chu Tirza khuaah Israel-ho zawng zawng chungah a lal ṭan a, kum sawmhnih leh kum li a lal a.

³⁴LALPA mit hmuhin thil ṭha lo tak a ti ṭhîn a, Jeroboama kawng zawh chu a zawh ve a, Israel-hote thil tihsualtîra a tih sualna kha a ti ve a.