Read Mizo_Old_version LEHKHABU PAKHATNA LALTE 16 Bible Online

LEHKHABU PAKHATNA LALTE 16 - Mizo_Old_version bible

LEHKHABU PAKHATNA LALTE 16

¹Tin, Baasa chungchâng thu-ah Hanania fapa Jehua hnênah LALPA thu a lo thleng a:

²“Vaivut ata ka chawisâng chia, ka mi Israel-te chungah hian hotuah ka siam chia; tin, nangin Jeroboama kawng zawh chu i zawh ve a, an sualnatea mi tihthinrim nân ka mi Israel-te thil i tihsualtîr a;

³ngai teh, Baasa leh a chhûngte hi ka tibo hlauh dâwn a ni; tichuan, Nebata fapa Jeroboama chhûngte ang maiin i chhûngte hi ka siam ang.

⁴Baasa chhûngkaw zînga mi khawpuia thi apiang chu uiin an ei ang a; tin, a chhûngkaw zînga mi rama thi apiangte chu chunglêng savaten an ei ang,” tiin.

⁵Baasa chanchin dang te, a thiltih te, a thiltihtheihziate chu Israel lalte lal lai thu ziakna buah a chuang a ni lâwm ni?

⁶Tin, Baasa chu a pute hnênah chuan a muhîl a, Tirza khuaah an phûm ta a. Tin, a fapa Ela chu a aiawhin a lal ta a.

⁷Tin, Baasa leh a chhûngte chungchâng thu-ah chuan, a kutchhuaka LALPA tihthinrim nâna Jeroboama chhûngte anna neia, LALPA mit hmuha thil ṭha lo tak a tih avâng leh amah chu a thah avângin, Hanania fapa zâwlnei Jehua hmanga a sawi LALPA thu chu a lo thleng a.

⁸Juda lal Asa lal kum sawmhnih leh kum ruknaah chuan Baasa fapa Ela chu Tirza khuaan Israel-ho chungah a lal ṭan a, kum hnih a lal a.

⁹Tin, a puipa Zimria, a tawlailîr zâtve chunga hotuin a phiarru a; chutih lai chuan Tirza khuaah, Tirza khuaa a in chhûng lam hotu Arza inah a lo inin rui a.

¹⁰Juda lal Asa lal kum sawmhnih leh kum sarih kumah chuan Zimria chu a va lût a, a bei a, a that a, a aiawhin a lal ta a.

¹¹Tin, heti hi a ni a, a han lal ṭana, a lalṭhutthlênga a han ṭhut veleh chuan, Baasa chhûngte zawng zawng chu a that vek a; a laichînte leh a ṭhiante zînga mi mipa fa tawh phawt chu pakhat mah a zuah lo.

¹²Chutiang chuan LALPA, Israel-te Pathian chu an lawilohnaa tihthinrim nâna Israel-hote thil tihsualtîra an tih, Baasa sualna zawng zawng leh a fapa Ela sualnate avânga LALPAN zâwlnei Jehua hmanga Baasa chungchâng thua a lo sawi tawh ang khân, Zimria chuan Baasa chhûngte zawng zawng chu a tiboral vek a ni.

¹⁴Ela chanchin dangte leh a thiltih zawng zawngte chu Israel lalte lal lai thu ziakna buah a chuang a ni lâwm ni?

¹⁵Juda lal Asa lal kum sawmhnih leh kum sarihnaah chuan Zimria chu Tirza khuaah ni sarih a lal a. Philistia-ho chan Gibethon khua chu, mite chuan an hual a ni.

¹⁶Tin, a hualtute chuan Zimrian a phiarru a, lal a that ta tih an sawi an lo hria a; chutichuan, Israel-ho zawng zawng chuan sipai hotu Omria chu, chumi ni chuan an riahhmunah Israel-te chunga lalah an siam ta a.

¹⁷Tin, Omria chu Israel-ho zawng zawng nên Gibethon khua aṭang chuan an han chho va, Tirza khua chu an han hual ta a.

¹⁸Tin, heti hi a ni a, Zimrian khua chu an la tih a hriat chuan lal ina kulhah a tlân lût a, lal inah chuan a inhâl khum a, a thi ta a,

¹⁹LALPA mit hmuha thil ṭha lo tak tia a sualnate avâng leh, Jeroboama kawng zawh chu zawh vea Israel-hote thil tihsualtîra a sualna avangin.

²⁰Zimria chanchin dangte leh, a phiarrûkna thute chu Israel lalte lal lai thu ziakna buah a chuang a ni lawm ni?

²¹Chutichuan, Israel mipuite chu pâwl hnihah an lo inṭhen ta a: mipui zâtve chuan Ginatha fapa Tibnia chu lala siam tumin an zui a, a zâtvein Omria an zui a.

²²Nimahsela, Omria zuitute chuan Ginatha fapa Tibnia zuitute chu an hneh ta a. Tichuan, Tibnia chu a thi a, Omria chu a lal ta a.

²³Juda lal Asa lal kum sawmthum leh kum khatnaah Omria chu Israel-te chungah a lal ṭan a, kum sâwm leh kum hnih a lal a. Tirza khuaah kum ruk a lal a.

²⁴Tin, Semera ta Samari tlâng chu tangkaraw talent hnihin a lei a; tin, tlângah chuan khua a siam a, a khaw siam hmingah chuan chumi tlâng neitu Semera hming chawiin Samari a puttîr a.

²⁵Omria chuan LALPA mit hmuhin thil ṭha lo tak a ti ṭhîn a, a hmaa mite zawng zawng aiin thil a tisual nasa bîk a.

²⁶Nebata fapa Jeroboama dân zawng zawng kha a la a, an lawilohna avânga LALPA, Israel-te Pathian tihthinrim nâna Israel-hote thil a tihsualtîrna ang khân a sual ve si a.

²⁷Omria thiltih chanchin dangte leh a thiltihtheihzia a tihlan thute chu, Israel lalte lai thu ziakna buah a chuang a ni lâwm ni?

²⁸Chutichuan, Omria chu a pute hnênah chuan a muhîl a, Samari khuaah an phûm ta a. Tichuan, a fapa Ahaba chu a aiawhin a lal ta a.

²⁹Juda lal Asa lal kum sawmthum leh kum riatnaah Omria fapa Ahaba chu Israel-te chungah a lal ṭan a; tin, Omria fapa Ahaba chu Samari khuaan kum sawmhnih leh kum hnih Israel-te chungah a lal a.

³⁰Tin, Omria fapa Ahaba chuan a hmaa mite zawng zawng aiin LALPA mit hmuhin thil ṭha lo tak a ti ṭhîn a.

³¹Tin, heti hi a ni a, Nebata fapa Jeroboama sualna ang tih ve te chu engmahlova ngai ni âwm takin, Zidon-ho lal Ethbaala fanu Jezebeli nupuiah a nei a, Baala rawng te bâwlsanin a be ve ta mai a.

³²Tin, Samari khuaa Baala in a sakah chuan Baala tân maichâm a siam a.

³³Tin, Ahaba chuan Aseri a siam a, a hmaa Israel lalte zawng zawng aiin Ahaba chuan LALPA, Israel-te Pathian tihthinrimna thil a ti nasa bîk a ni.

³⁴A lal lai chuan Bethel mi Hielan Jeriko khua a siam a. A fa tîr Abirama chânin a lungphûm chu a phûm a; tin, a fa tlum Seguba chânin a kulh kawngkhârte chu a din a, LALPAN Nuna fapa Josua hmanga a lo sawi tawh ang khân.