Read Mizo_Old_version LEHKHABU PAKHATNA LALTE 18 Bible Online

LEHKHABU PAKHATNA LALTE 18 - Mizo_Old_version bible

LEHKHABU PAKHATNA LALTE 18

¹Tin, ni rei fe hnuah chuan heti hi a ni a, a kum thum kumah chuan LALPA thu Elija hnênah a lo thleng a, “Va kal la, Ahaba hnênah va inlan rawh; tichuan, lei chungah hian ruah ka rawn sûrtîr dâwn e,” tiin.

²Tin, Elija chu Ahaba hnêna inlan tûr chuan a kal ta a. Samari ramah chuan ṭâm chu a nasa hle mai a.

³Tin, Ahaban Obadia, a in chhûng lam hotu chu a ko va (Obadia chu LALPA ṭih mi tak a ni a;

⁴heti hi a ni a, Jezebelin LALPA zâwlneite a râwt chiam lai khân Obadia chuan zâwlnei za a hruai a, pûkah sawmnga têlin a thukru a, chhang leh tuiin a châwm ṭhîn a ni).

⁵Tin, Ahaba chuan Obadia hnênah, “Tuihna zawng zawng leh luikawr zawng zawng awmna lam ram va fang teh khai; sakawr leh sabengtungte hi kan chhandam theihna tûrin hlobet te kan hmuhsak thei mahna; chuti lo chuan, rante hi kan chân vek dah ang e,” a ti a.

⁶Chutichuan, ram fan chhuah tûr an insem a; Ahaba chu amahin kawng pakhatah a kal a, Obadia chu amahin kawng dangah a kal a.

⁷Tin, chutia Obadia a kal lai chuan, ngai teh, Elija nên an intâwk a; tin, ani chuan a la hria a; tichuan, a bawkkhup a, “Nang i ni maw, ka pu Elija?” a ti a.

⁸Tin, ani chuan a chhâng a, “Ni e; kal ta la, ‘Ngai teh, Elija sâwtah sâwn a awm e,’ tiin i pu va hrilh rawh,” a ti a.

⁹Tin, ani chuan, “Thil eng nge ka tihsuala, i chhiahhlawh hi thah tûra Ahaba kuta pêk i duh mai le?

¹⁰LALPA i Pathian nunna chhâlin ka sawi e, ka puin nangmah zawntîr lohna hnam leh ram rêng rêng a nei lo asin; ‘Hetah a awm lo ve,’ an tih chuan an hmuh loh che thu-ah ram leh hnam chu chhia a chhamtîr zêl mai a ni a.

¹¹Tûnah hian nangin, ‘Kal ta la, ngai teh, “Elija sâwtah sâwn a awm e,” tiin i pu va hrilh rawh,’ i ti mai a.

¹²Heti hi a ni ang a, ka kalsan veleh che hian LALPA thlarauvin ka hriat lohnaah a la bo si ang chia; tichuan, Ahaba ka va hrilha, a rawn hmuh theih si loh che chuan mi that mai ang asin. Nimahsela, i chhiahhlawh hian ka tleirâwl tirh ata LALPA chu ka ṭih ṭhîn si a.

¹³Jezebelin LALPA zâwlneite a râwt chiam laia ka thiltih, LALPA zâwlneite zînga mi za, sawmnga têla pûka ka thuhrûka, chhang leh tuia ka châwm zia te kha ka pu hi an hrilh lo che em ni?

¹⁴Tûnah hian nangin, ‘Kal ta la, ngai teh, “Elija chu sâwtah sâwn a awm e,” tiin i pu va hrilh rawh,’ i ti mai a; mi that ngei ang le,” a ti a.

¹⁵Tin, Elija chuan, “A bula ka awm ṭhinna sipaihote LALPA nunna chhâlin ka sawi e, vawiinah hian a hnênah ka inlan ngei ngei dâwn a ni,” a ti a.

¹⁶Chutichuan, Obadia chu Ahaba be tûrin a kal a, a va hrilh ta a; tin, Ahaba chu Elija hmuh tumin a kal ta a.

¹⁷Tin, heti hi a ni a, Ahaban Elija a va hmuh chuan Ahaban a hnênah, “Nang i ni maw, Israel-ho timangangtupa?” a ti a.

¹⁸Tin, ani chuan a chhâng a, “Israel-ho ka timangang lo ve; nang leh i pa chhûngten alâwm timangang zâwk ni, LALPA thupêkte hi hawisana, Baala-te i pawm zâwkah hian.

¹⁹Chutichuan, tûnah hian Israel-ho zawng zawng leh Baala zâwlnei zali leh sawmnga leh, Aseri zâwlnei, Jezebeli dawhkâna chawhlui kîl ve ṭhîn zalite kha ka hnênah Karmel tlângah hian va koh khâwmtîr rawh,” a ti a.

²⁰Chutichuan, Ahaba chuan Israel thlahteho zawng zawng hnênah mi a tîr a, zâwlneihote chu Karmel tlângah chuan a ko khâwm a.

²¹Tin, Elija chuan mipuiho zawng zawng chu a va hnaih a, “Tuilairapin eng chen nge in awm dâwn? LALPA chu Pathian a nih chuan, amah chu zui ula; tin, Baala a nih leh, amah chu zui rawh u,” a ti a. Mipuite chuan kam khat mahin an chhâng lo va.

²²Tichuan, Elija chuan mipuite hnênah chuan, “LALPA zâwlnei la awm chu keimah chauh hi ka ni a; Baala zâwlneite erawh chu mi 450 an ni a.

²³Chutichuan, bâwngpa pahnih mi han pe sela; annin bâwngpa pakhat chu an pualah thlang sela, chan sawm sela, thing chungah chuan dah sela, a hnuaiah mei chhêm lovin; tin, keiin bâwngpa pakhat chu ka buatsaih ve ang a, thing chungah chuan ka dah ang a, mei ka chhêm bîk lo vang e.

²⁴Tin, nangnin in pathian hming chu lam ula, kei pawhin LALPA hming ka lam ang a; tichuan, meia rawn chhângtu Pathian apiang chu Pathian ni rawh se,” a ti a. Tin, mi zawng zawng chuan an chhâng a, “A dik alâwm,” an ti a.

²⁵Tichuan, Elija chuan Baala zâwlneite hnênah chuan, “Nangnin bâwngpa pakhat hi in pualah thlang ula, buatsaih hmasa rawh u, nangni zawng in tam deuh hi; tin, in pathian hming chu lam ula; amaherawhchu, a hnuaiah mei chhêm suh u,” a ti a.

²⁶Tin, bâwngpa an pual chu an la a, an buatsaih a, “Aw Baala, min han chhâng rawh khai,” tiin zîng aṭangin chhûn thlengin Baala hming chu an lam a. Nimahsela, aw riva rêng rêng a awm lo va, chhângtu rêng rêng lah an awm hek lo. Tin, an maichâm siam vêlah chuan an zuang an zuang mai a.

²⁷Tin, chhûn lai takah chuan heti hi a ni a, Elija chuan anmahni chu tielin, “Au ring che u le, pathian a ni si a; a inngaihtuah rih emaw, a bibo rih lawk emaw, a thang bo rih emaw, a nih loh leh a muhîl hlauhva, tihharh tûr emaw a ni ang e,” a ti a.

²⁸Tin, ring takin an au va, an tih ṭhin dânin chemtê leh feitein thi chhuak zawih zawih khawpin an inzaiin an invit a.

²⁹Tin, ni a lo thlangher chuan heti hi a ni a, tlai lam inthawi hun thlengin an sawi dual dual mai a; nimahsela, aw riva rêng rêng a awm lo va, chhângtu tûr rêng rêng emaw, a lo ngaihsaktu rêng rêng emaw an awm bawk hek lo.

³⁰Tichuan, Elija chuan mipuiho zawng zawng hnênah chuan, “Mi rawn hnaih teh u khai,” a ti a; tin, mipuiho zawng zawng chuan an va hnaih a. Tin, LALPA maichâm tihchim tawh chu a siam ṭha a.

³¹Tin, “I hming chu Israela a ni ang,” tia LALPA thu lo dawngtu Jakoba fate hnam zât lung sâwm leh pahnih Elija chuan a la a.

³²Tin, lungte chuan LALPA hmingin maichâm a siam a; tin, maichâm vêl chu buh chi tehkhâwng hnih leng zetin a lai khuar a.

³³Tin, thing chu a han chhep fel a, bâwngpa chu a chan sawm a, thing chungah chuan a dah a. Tin, “Bêl pali tuiin tikhat ula, hâlral thilhlan leh thing hi han leih rawh u,” a ti a.

³⁴Tin, “Han leih leh rawh u,” a ti a, an han leih leh a. Tin, “Han leih nawn leh rawh u,” a ti a, an han leih nawn leh a.

³⁵Tin, tui chu maichâm vêlah chuan a luang ta dûl dûl a; tin, laih khuar chu tuiin a tikhat bawk a.

³⁶Tin, tlai lam inthawi hun lai chuan heti hi a ni a, zâwlnei Elija chuan a va pan hnai a, “Aw LALPA, Abrahama te, Isaaka te, Israela te Pathian, nang hi Israel rama Pathian i nih leh, kei hi i chhiahhlawh ka niha, hêng zawng zawng hi nangma thua ti ka nih vawiinah hian hre hlawm rawh se.

³⁷Mi lo ngaihthlâksak la, hêng mipuite hian nang LALPA hi Pathian i ni a, an thinlungte i lamlêttîr leh ta a ni tih hi an lo hriat theih nân aw LALPA, mi lo ngaihthlâksak ang che,” a ti a.

³⁸Tichuan, LALPA mei chu a lo tla a, hâlral thilhlan te, thing te, lung te, vaivut te chu a kâng ral a, laih khuara tui chu a hîp kang ta vek a.

³⁹Tin, mipuiho zawng zawngin chu chu an han hmuh chuan an bawkkhup a, “LALPA hi a lo ni, Pathian chu! LALPA hi a lo ni, Pathian chu! LALPA hi a lo ni, Pathian chu!” an ti a.

⁴⁰Tin, Elija chuan an hnênah, “Baala zâwlneite hi man ula, pakhat mah chhuah suh u,” a ti a. Tin, an man a, Elija chuan Kison luiah a hruai thla a, chutah chuan a that hlawm a.

⁴¹Tichuan, Elija chuan Ahaba hnênah, “Han chho ta langin, eiin han in tawh rawh; ruahpui sûr tûr thâwm a awm a nia,” a ti a.

⁴²Chutichuan, Ahaba chu ei leh in tûrin a han chho ta a. Tin, Elija chu Karmel tlâng chhîp lamah a han chho va; tin, lei lamah a kûn a, a kapkârah a hmai a rawlh a.

⁴³Tin, a chhiahhlawh hnênah, “Han chho ta la, tuifinriat lam han thlîr teh khai,” a ti a. Tin, a han chho va, a han thlîr a; “Eng mah a awm lo,” a ti a. Tin, ani chuan, “Kal leh rawh, vawi sarih,” a ti a.

⁴⁴Tin, a vawi sarihnaah chuan heti hi a ni a, “Ngai teh, tuifinriat aṭangin mihring kut tiat lek chhûm a chho nel nel e,” a ti a. Tin, ani chuan, “Han kal ta la, Ahaba hnênah, ‘I tawlailîr buatsaih la, chhuk tawh rawh, ruahin a dang dah ang che,’ ti ang che,” a ti a.

⁴⁵Tin, rei lo têah chuan heti hi a ni a, vân chu thli leh chhûmin a lo duk ta kuih mai a, ruahpuivânâwn a lo sûr ta a. Tin, Ahaba chu tawlailîra chuangin Jezreel khuaah a kal ta a.

⁴⁶Tin, LALPA kut chu Elija chungah a awm a; tichuan, a puan a veng a, Ahaba hmaah chuan Jezreel khaw luhna thlengin a tlân ta a.