Read Mizo_Old_version LEHKHABU PAKHATNA LALTE 19 Bible Online

LEHKHABU PAKHATNA LALTE 19 - Mizo_Old_version bible

LEHKHABU PAKHATNA LALTE 19

¹Tin, Ahaba chuan Elija thiltih zawng zawng, khandaiha zâwlnei zawng zawng a thah thu te nên Jezebeli a hrilh a.

²Tichuan, Jezebeli chuan Elija hnênah, “Kha mite zînga mi pakhat nunna ang khân, naktûk hetih hun hmaa i nunna ka siamsak ve loh che chuan pathianten an tih tihin mi ti mai sela, chu aia nasa pawhin,” tiin mi a tîr a.

³Tichuan, a hlau va, a tho va, a tlânchhe ta a, Judai rama Beer-seba khua a va thleng a, chutah chuan a chhiahhlawh a hnutchhiah a.

⁴Ani erawh chu thlalêrah ni khat banah a kal a, Juniper thing hnuaiah a ṭhu a. Tin, thih a dîl ta a, “A tâwk ta e, aw LALPA, tûnah hian ka nunna hi la mai teh, ka pute aiin ka ṭha chuang bîk si lo va,” a ti a.

⁵Tichuan, Juniper thing hnuaiah chuan a mu a, a muhîl ta a; tin, ngai teh, vântirhkoh hian a rawn khawih a, a hnênah, “Tho la, ei rawh,” a ti a.

⁶Tin, a han en vêl a, ngai teh, a lu bulah chuan chhangpêr, lung sâa hem hmin diam leh tuithâwl hi a lo awm a. Tichuan, a ei a, a in a, a mu leh ta a.

⁷Tin, LALPA vântirhkoh chu a lo kal nawn leh a, a rawn khawih a, “Tho la, ei rawh, i kalna tûr i chelh lo vang e,” a ti a.

⁸Tin, a tho va, a eiin a in a; tichuan, chu chaw avâng chuan Pathian tlâng Horeb thlengin ni sawmli leh zan sawmli a kal a.

⁹Tin, chuta pûk pakhat chu a va thleng a, chutah chuan a awm ta a; tin, ngai teh, LALPA thu a hnênah a lo thleng a, a hnênah, “Hetah hian eng nge i tih, Elija?” a ti a.

¹⁰Ani chuan, “LALPA, sipaihote Pathian tân hian ṭhahnem ka ngai êm êm ṭhîn a; Israela thlahte chuan i thuthlung an hawisan a, i maichâmte an tichim a, i zâwlneite khandaihin an sât hlum si a. A la awm chu keimah chauh hi ka ni a; ka nunna mi lâksak an tum a ni,” a ti a.

¹¹Tin, ani chuan, “Va chhuak la, tlângah sâwn LALPA hmaah va ding rawh,” a ti a. Tin, ngai teh, LALPA a lo kal a, thlipui na takin tlângte chu LALPA hmaah chuan a rawn chhêm khî a, lungpuite chu a phel rem rum a; nimahsela, thli-ah chuan LALPA chu a awm lo. Tin, thli tleh zawh chuan lîr a lo nghîng a; nimahsela, lîrnghîngah chuan LALPA chu a awm lo.

¹²Tin, lîrnghîn zawh chuan mei a lo chhuak a; nimahsela, meiah chuan LALPA chu a awm lo. Tin, mei zawhah chuan aw dam diai hi a lo chhuak a.

¹³Tin, heti hi a ni a, Elijan chu chu a hriat chuan a puanin a hmai a khuh a, a va chhuak a, pûk kawngkaah a va ding a. Tin, ngai leh, awin a hnênah, “Hetah hian eng nge i tih, Elija?” a rawn ti a.

¹⁴Tin, ani chuan, “LALPA, sipaihote Pathian tân hian ṭhahnem ka ngai êm êm ṭhîn a, Israela thlahte lah chuan i thuthlung an hawisan a, i maichâmte an tichim a, i zâwlneite khandaihin an sât hlum si a. A la awm chu keimah chauh hi ka ni a, ka nunna mi lâksak an tum a ni,” a ti a.

¹⁵Tin, LALPAN a hnênah, “Haw leh ta langin, thlalêr lamah Damaska khuaan kal rawh; i va thlen chuan Suria lal atân Hazaela hriak i thih ang a.

¹⁶Tin, Israel lal atân Nimsia fapa Jehua hriak i thih ang a; tin, i aiawha zâwlnei ni tûrin Abel-mehola khuaa mi Saphata fapa Elisa hriak i thih bawk ang.

¹⁷Tin, heti hi a ni ang a, Hazaela khandaih pumpelh apiang chu Jehuan a that ang a; tin, Jehua khandaih pumpelh apiang chu Elisan a that ang.

¹⁸Nimahsela, Israel ramah hian Baala hmaa la ṭhingṭhi ngai lo leh, la fâwp ngai lo mi sângsarih ka tân ka hum dâwn a ni,” a ti a.

¹⁹Chutichuan, chuta ta chu a chhuak a, Saphata fapa Elisa chu a va hmu a, ani chuan lei a lo let a, a hmaah chuan sebâwng tuak sâwm leh tuak hnih a awm a, a sâwm leh pahnihna chu amahin a lo khalh a; tin, Elija chuan a va pan a, a puan a va bahtîr a.

²⁰Tin, sebâwngte chu a kalsan a, Elija chu a ûm a, “Ka nu leh ka pa ka va fâwp rih zet ang e aw; tichuan, ka rawn zui ang che,” a ti a. Tin, ani chuan a hnênah, “Va haw leh ta che, eng nge ka tih che kha le?” a ti a.

²¹Tin, a va zui chu a hâwng a, sebâwng tuak khat a khalha chu a talh a, a sa chu sebâwng thuamhnawte chuan a chhûm a, mite a sem a, an ei ta a. Tichuan, a tho va, Elija chu a ûm a, a rawng a bâwlsak ta a.