Read Mizo_Old_version LEHKHABU PAKHATNA LALTE 2 Bible Online

LEHKHABU PAKHATNA LALTE 2 - Mizo_Old_version bible

LEHKHABU PAKHATNA LALTE 2

¹Tin, Davida thih hun chu a lo hnai ta a, a fapa Solomona chu thu a pe a,

²“Leilung zawng zawng dân angin ka kal ve dâwn ta a ni; tichuan, chak takin awm la, patling takin awm rawh;

³i thiltih apiang leh, i hawina lam apianga i hmuingîl theih nân Mosia Dâna ziak anga LALPA i Pathianin a kawngte zawh tûr leh, a thuruat te, a thupêk te, a rorêl te leh a thuhriattîrte pawm tûra thu a pêkte hi zâwm rawh;

⁴LALPAN ka chungchâng thua, ‘I thlahten an thinlung tak leh an rilru taka ka mit hmuha thutaka awm tûra an awm dâna an fimkhur chuan, Israel-te lalṭhutthlênga ṭhu tûr i hmai lo vang,’ tia a sawi kha a tinghet dâwn nia.

⁵Tin, Zeruii fapa Joaba mi tih zia, Israel-te sipai hotu pahnih, Nera fapa Abnera leh Jethera fapa Amasa-te a tih zia ngei kha i hria e. Khatia a thaha, inrem laia indo thisen chhuaha a chhuaha, a taia kâwnghrênah leh a pheikhawk buna indo thisen a tihkai ziate kha.

⁶Tichuan, i remhriat dân angin ti langin, a lua kêlsam ṭo hi thlânah thlamuang takin liamtîr suh ang che.

⁷Gilead mi Barzilaia fate chungah erawh chuan khawngaihna lantîr langin, i dawhkâna chaw kîltuah teltîr ve ang che, i unau Absaloma laka ka tlân bo lai khân ka hnênah an lo kal si a.

⁸Tin, ngai teh, Bahurim khuaa mi Benjamina thlah, Gera fapa Simeia hi i hnênah a awm a, ani chuan Mahanaim hmuna ka kal lai khân ânchhe ṭha lo tak mi lawh a; amaherawhchu, Jordan-ah mi hmuak tûrin a lo chhuk a, chutah chuan, ‘Khandaihin ka that lo vang che,’ tiin LALPA hming chhâlin a hnênah chhia ka lo chham tawh a.

⁹Chutichuan, thiam chang zawngin chhuah suh, mi fing i ni si, a chungah engtia tih tûr nge ni tih zawng i hre mai ang a; a lua kêlsam ṭo chu thisen nên thlânah i liamtîr dâwn nia,” a ti a.

¹⁰Tin, Davida chu a puteho hnênah a muhîl ve ta a, Davida khawpuiah an phûm a.

¹¹Israel-hote chunga Davida lal chhûng chu kum sawmli a ni: Hebron khuaah kum sarih a lal a, Jerusalem khuaah kum sawmthum leh kum thum a lal a.

¹²Tin, Solomona chu a pa Davida lalṭhutthlêngah chuan a ṭhu a; tichuan, a ram chu nasa taka tihnghehin a lo awm ta a.

¹³Tin, Hagithi fapa Adonija chu Solomona nu Bathsebi hnênah a kal a. Ani chuan, “Ṭha lam thua lo kal em i nih le?” a ti a. Anin, “Ṭha lam thu-ah ni e,” a ti a.

¹⁴Tin, “I hnênah eng emaw sawi tûr ka nei a ni,” a ti leh a. Ani chuan, “Sawi ta che,” a ti a.

¹⁵Tin, ani chuan, “Ram hi ka ta a ni tawh tih leh, Israel-ho zawng zawngte pawh hian keimah hi lal atân mi thlîr reng a ni tih i hria a. Nimahsela, ram chu ka unaupa tân a lo inlet leh ta zâwk a; LALPA lo ruat dânah a ta a ni rêng a ni.

¹⁶Tûnah hian thil pakhat dîl tûr che ka nei a, mi remtih lohsak lul suh ang che,” a ti a. Tin, ani chuan a hnênah, “Sawi ta che,” a ti a.

¹⁷Tin, ani chuan, “Khawngaih takin Lal Solomona mi biaksak la (i thu zawng a hnial âwm si lo va), Sunam mi Abisagi hi nupuiah mi neihtîr rawh se,” a ti a.

¹⁸Tin, Bathsebi chuan, “Aw le, lal chu ka lo biaksak ang che,” a ti a.

¹⁹Chutichuan, Bathsebi chu Adonija biaksak tûrin Lal Solomona hnênah chuan a kal ta a. Tin, lal chu amah lâwm tûrin a tho va, a hmaah a kûn a, a lalṭhutthlêngah chuan a ṭhu a; tin, lal nu tân chuan lalṭhutthlêng a hûntîr a; a ding lamah chuan a ṭhu ta a.

²⁰Tichuan, “Thil pakhat tê tak tê ka dîl dâwn che a ni; min remtih lohsak lul suh ang che,” a ti a. Tin, lal chuan a hnênah, “Dîl ta che, ka nu, ka remtih lohsak hauh lo vang che,” a ti a.

²¹Tin, ani chuan, “Sunam mi Abisagi hi i unaupa Adonija nupui atân neihtîr rawh,” a ti a.

²²Tin, Lal Solomona chuan a chhâng a, a nu hnênah chuan, “Engtiziaa Sunam mi Abisagi hi Adonija tâna dîl nge maw i nih le? Ram pawh hi dîlsak ta nghâl law law che, ani chu ka u a ni alâwm; ama tân leh puithiam Abiathara leh Zeruii fapa Joaba tân pawh chuan dîl ta che,” a ti a.

²³Chutichuan, Lal Solomona chuan LALPA hming chhâlin, “Adonija thil dîl hian ama chunga thihna thu sawi a niha a nih loh nâ chuan Pathianin a tih tihin mi ti mai sela, chu aia nasa pawhin.

²⁴Tichuan, LALPA, a thutiam anga mi tingheta, ka pa Davida lalṭhutthlênga mi ṭhuttîra, chhûngkua mi lo dinsaktu nunna chhâlin ka sawi e, Adonija hi vawiin ni la la hian tihhlum ngei ngei tûr a ni,” tiin chhia a chham ta a.

²⁵Chutichuan, Lal Solomona chuan Jehoiada fapa Benaia chu a tîr a; ani chuan a va bei a, a that ta a.

²⁶Tin, puithiam Abiathara hnênah chuan lalin, “Anathoth khuaah nangma in leh lovah haw daih tawh, thi mai tlâk zawng i ni a; nimahsela, ka pa Davida hmaa Lalpa PATHIAN bâwm i lo zâwn ṭhin avâng leh, ka pa hrehawm tuarna zawng zawngahte chuan i lo tuar ve tawh ṭhin avângin tûnah zawng ka tihlum rih lo vang che,” a ti a.

²⁷Chutichuan, Solomona chuan Abiathara chu LALPA puithiam a nihna a bân ta a; LALPAN Silo khuaa Elia chhûngte chungchâng thu a sawi kha a thlentîr theihna tûrin.

²⁸Tin, chumi thu chu Joaban a lo hria a; Joaba chu Absaloma lamah khân a ṭang lo na a, Adonija lama ṭang a ni si a. Tichuan, Joaba chu LALPA puan inah a tlân a, maichâm kite chu a vuan ta a.

²⁹Tin, “LALPA puan inah Joaba a tlân a; ngai teh, maichâm bulah a awm,” tiin Lal Solomona chu an hrilh a. Tichuan, Lal Solomona chuan Jehoiada fapa Benaia chu, “Han bei tawh,” tiin a tîr a.

³⁰Tin, Benaia chu LALPA puan inah a han kal a, a hnênah chuan, “Lalin, ‘Lo chhuak rawh se,’ a ti e,” a ti a. Tin, ani chuan, “Ni lo ve; hetah hian ka thi mai ang e,” a ti a. Tin, Benaia chuan, “Joaban hetiang hian a lo ti a, hetiang hian mi lo chhâng a ni,” tiin lal hnênah thu a thlen leh a.

³¹Tin, lal chuan a hnênah, “A sawi ang chuan han ti la, han bei la, phûm rawh; a chhan awm hauh lova Joaban thisen a chhuah lak ata kha kei leh ka pa chhûngte hi i tihfihlîm theihna tûrin.

³²Tichuan, amah aia mi fel zâwk leh ṭha zâwk mi pahnih - Nera fapa Abnera, Israel-te sipai hotu leh Jethera fapa Amasa, Juda-te sipai hotu kha ka pa Davida hriat lohva a beiha, khandaiha a thah avângin LALPAN a thisen chu ama lu chungah ngei a rawn lêttîr ang.

³³Chutichuan, an thisen chu Joaba lu chungah leh a thlahte lu chungah kumkhuain a lêt ang a; Davida chungah te, a thlahte chungah te, a chhûngte chungah te, a lalṭhutthlêng chungah te erawh chuan LALPA hnên aṭanga thlamuanna kumkhuain a awm reng ang,” a ti a.

³⁴Chutichuan, Jehoiada fapa Benaia chu a han chho va, a han bei a, a that ta a; tin, thlalêra ama inah chuan an phûm ta a.

³⁵Tin, lalin Jehoiada fapa Benaia chu sipaihote chungah a ai a awhtîr a; tin, puithiam Zadoka chu lalin Abiathara ai a awhtîr a.

³⁶Tin, lalin Simeia chu a kohtîr a, a hnênah, “Jerusalem-ah hian in sa la, chutah chuan awm la, chuta ta chu khawi dangah mah chhuak suh.

³⁷I chhuah ni, Kidron lui i kân ni la la chuan i thi ngei ngei ang tih hre rawh khai; i thisen chu nangma lu chungah ngei a awm ang,” a ti a.

³⁸Tin, Simeia chuan lal hnênah, “A dik alâwm; lalpa ka puin a sawi ang chuan i chhiahhlawhin a ti zêl ang,” a ti a. Tin, Simeia chu Jerusalem-ah chuan rei fe chu a awm a.

³⁹Tin, heti hi a ni a, kum thum a lo vei hnu chuan Simeia chhiahhlawhte zînga pahnih chu Gath khaw lal Maaka fapa Akisa hnênah an tlân a. Tin, “Ngai teh, i chhiahhlawhte chu Gath khuaah an awm e,” tiin Simeia chu an hrilh a.

⁴⁰Tin, Simeia chu a tho va, a sabengtung a thuam a, a chhiahhlawhte zawng tûrin Gath khuaah Akisa hnênah chuan a kal ta a; tin, Simeia chuan Gath khua ata a chhiahhlawhte chu a va hruai ta a.

⁴¹Tin, Simeia chu Jerusalem khua ata a chhuak a, Gath khuaah a va kal a, a lo haw leh tih Solomona chu an hrilh a.

⁴²Tin, lal chuan Simeia chu a kohtîr a, a hnênah, “ ‘I chhuah ni, ram danga i chhuah ni la la chuan i thi ngei ngei ang,’ ti khân LALPA hming chhâlin chhia ka chhamtîr chein, ka hriattîr che a ni lâwm ni? Tin, nang pawhin ka hnênah khân, ‘I thusawi ka hriat hi a ṭha e,’ i tih kha.

⁴³Eng vânga LALPA chhechham leh thu ka pêk che kha hlen lo nge i nih?” a ti a.

⁴⁴Tin, lal vêk chuan Simeia hnênah, “I thinlung chhûngril suahsualzia, ka pa Davida chunga i tih zia te kha i hre vek a; chutichuan, LALPAN i suahsualna hi nangma lu chungah ngei a rawn lêttîr ang.

⁴⁵Lal Solomona erawh chu malsâwmin a awm ang a, Davida lalṭhutthlêng chu LALPA hmaa kumkhuaa tihngheh a ni ang,” a ti a.

⁴⁶Chutichuan, lal chuan Jehoiada fapa Benaia chu thu a pe a; ani chu a chhuak a, Simeia chu a va bei a, a that ta a. Tichuan, ram chu Solomona kutah tihnghehin a awm ta a.