Read Mizo_Old_version LEHKHABU PAKHATNA LALTE 20 Bible Online

LEHKHABU PAKHATNA LALTE 20 - Mizo_Old_version bible

LEHKHABU PAKHATNA LALTE 20

¹Tin, Suria lal Ben-hadada chuan a sipaiho zawng zawng a khâwm vek a; lal sawmthum leh pahnih an tel a, sakawr leh tawlailîrte nên a han chho va, Samari khua a han hual a, a han bei a.

²Israel lal Ahaba hnênah chuan khawpui chhungah mi a tîr a, a hnênah, “Ben-hadadan heti hian a ti,

³‘I tangkarua leh i rangkachakte kha ka ta a ni e; i nupuite leh i fate, a ṭha ṭhate chenin ka ta a ni,’ tiin,” a ti a.

⁴Tin, Israel lal chuan a lo chhâng a, “Aw lalber, ka pu, i sawi ang chuan a ni alâwm; keimah leh ka neih zawng zawng chu i ta a ni e,” a ti a.

⁵Tin, a mi tirhte chu an kal leh a, “Ben-hadadan heti hian a ti, ‘I hnênah, “I tangkarua te, i rangkachak te, i nupuite, i fate chu mi pe tûr a ni,” tiin mi ka rawn tîr tak a;

⁶nimahsela, naktûk hetih hun vêlah hian ka mite i hnênah ka rawn tîr ang a, i in leh i mite in chu an rawn dap dâwn a ni. Tin, heti hi a ni ang a, i mit la apiangte chu an la ang a, an rawn kalpui vek ang,’ tiin,” an ti a.

⁷Tichuan, Israel lal chuan a rama upaho zawng zawng chu a ko va, “Lo hre teh u khai, he mi hian thil ṭha lo tak tih a tum zia hi; ka hnênah mi a rawn tîr a, ka nupuite, ka fate, ka tangkarua te, ka rangkachak te a rawn ngên a, ka lo hnial pawh a ni si lo,” a ti a.

⁸Tin, upaho zawng zawng leh mipuiho zawng zawng chuan a hnênah, “Lo bengkhawn duh suh, rem pawh ti hek suh,” an ti a.

⁹Chutichuan, Ben-hadada mi tirhte hnênah chuan, “Lalber ka pu hnênah chuan, ‘I chhiahhlawh hnêna mi tîra i rawn ngen hmasak zawng zawng ang kha chuan ka ti ang a; amaherawhchu, hei hi zawng ka ti thei lo vang, a ti e,’ ti rawh u,” a ti a. Tin, a mi tirhte chu an kal leh ta a, chumi thu chu an va thlen leh a.

¹⁰Tin, Ben-hadada chuan a hnênah mi a tîr leh a, “Ka hnung zuitute zawng zawng hian Samari khaw vaivut vei khat ṭheuh pawh an hmuh theih dâwn chuan, pathianten an tih tihin mi ti sela, chu aia nasa pawhin,” a ti a.

¹¹Tin, Israel lal chuan a chhâng a, “ ‘Mi a inrâlthuam lai rengin, a inrâlthuamna hlîp thla tawh ang rengin an uang ngai lo ve,’ tiin va hrilh rawh u khai,” a ti a.

¹²Tin, heti hi a ni a, amah leh lalten bûktêa zu an lo in ho laiin chumi thu chu Ben-hadada chuan a lo hria a, a mite hnênah chuan, “Insiam rawh u khai,” a ti a. Tichuan, khaw bei tûr chuan an insiam ta a.

¹³Tin, ngai teh, zâwlnei pakhat hian Israel lal Ahaba chu a va hnaih a, “LALPAN heti hian a ti: ‘Hêng mipui tam tak hi i hmu em? Ngai teh, vawiinah hian i kutah ka pe dâwn a ni; tichuan, kei hi LALPA chu ka ni tih i hria ang,’ tiin,” a ti a.

¹⁴Tin, Ahaban, “Tu hmangin maw?” a ti a. Tin, ani chuan, “LALPAN heti hian a ti, ‘Ram ṭhentea hotute tlangvâlho hmang hian,’ tiin,” a ti a. Tichuan, ani chuan, “Tuin nge râl rêl ang?” a ti a. Tin, ani chuan a chhâng a, “Nangmahin,” a ti a.

¹⁵Tichuan, ani chuan ram ṭhentea hotute tlangvâlho chu a han khâwm a, zahnih leh sawmthum leh pahnih an ni a; tin, chung mite zawhah chuan mi zawng zawng, Israela thlahte zawng zawng chu a khâwm a, sângsarih an ni a.

¹⁶Tin, chhûnlai takah hian an va chhuak ta a. Ben-hadada leh lalho, amah ṭanpuitu lal sawmthum leh pahnihte erawh chu bûktêah an lo inin rui a.

¹⁷Tin, ram ṭhentea hotute tlangvâlho chu an va chhuak hmasa a; tin, Ben-hadada chuan mi a tîr a, anni chuan, “Samari khua aṭanga lo chhuak an awm e,” tiin an hrilh a.

¹⁸Tin, ani chuan, “Inrem tuma lo kal an nih leh a nungin lo man ula; indo tuma lo kal an nih leh a nung bawkin lo man rawh u,” a ti a.

¹⁹Tichuan, chûngho, ram ṭhentea hotute tlangvâlho leh a rawn zuitu sipaihote chu khua ata an chhuak a.

²⁰Tin, an va bitum ṭheuh chu an va that a; tichuan, Suria-ho chu an tlânchhe ta a, Israel-ho chuan an ûm a; tin, Suria lal Ben-hadada chu sakawr chunga chuangin sakawr chung chuang mite nên an tlân chhuak ta a.

²¹Tin, Israel lal chu a va chhuak a, sakawr leh tawlailîrte chu a va bei a, Suria-ho chu a that chiam a.

²²Tin, zâwlnei chuan Israel lal chu a va hnaih a, a hnênah, “Intichak sauh sauh langin, i tih dân tûr ngaihtuah rawh khai, kum a lo vei hian Suria lal chuan a rawn bei leh dâwn che a nia,” a ti a.

²³Tin, Suria lal hote chuan a hnênah, “An pathian hi tlâng pathian a ni a; chuvângin, keimahni aiin an chak a nih hi. Phaizâwlah bei tawh ila, anni ai chuan kan chak zâwk ngei ang e.

²⁴Tin, hetiang hian ti ang che: lalho hi an zavaiin thlâk vek la, an aiah ram awptute dah langin;

²⁵tin, sipaiho sakawr leh tawlailîr te, i chân tâk zât chiah kha sipaiho din ṭha leh ang che; tichuan, phaizâwlah kan bei ang a, anni ai chuan kan chak zâwk ngei ang e,” an ti a. Tin, an thu chu a pawm a, chutiang chuan a ti ta a.

²⁶Tin, a kum lehah chuan heti hi a ni a, Ben-hadada chuan Suria-ho chu a khâwm a, Israel-hote bei tûrin Aphek khuaah a han chho va.

²⁷Tin, Israela thlahte chu an pung khâwm a, ei tûr te an chhêk tê tê a, bei tûrin an thawk ta a; tin, Israela thlahte chuan kêlno tlêm tê tê rual hnih ang lek hian an va ep ve a; Suria-hote erawh chu a ram khahin an khat mup mai a.

²⁸Tin, Pathian mi chuan Israel lal chu a va hnaih a, a va bia a, a hnênah, “LALPAN heti hian a ti: ‘Suria-hovin, “LALPA chu tlâng Pathian a ni a, ruam Pathian zawng a ni lo va,” an ti a ni; chuvângin, hêng mipui tam takte hi i kutah ka pe dâwn e; tichuan, kei hi LALPA chu ka ni tih in hria ang,’ tiin,” a ti a.

²⁹Tin, ni sarih chhûng zet chu an inep reng a. Tin, heti hi a ni a, a ni sarih ni chuan an inbei ta a; tin, Israela thlahte chuan Suria mite chu ni khatah sipai nuai khat an that a.

³⁰Mi dangte erawh chu Aphek-ah, khawpui chhûngah an tlân lût a, a la awmate chu mi sînghnih leh sângsarih kulh chimin a delh hlawm a. Tin, Ben-hadada chu a tlânchhia a, khawpui chhûngah pindan chhûngrilan a lût a.

³¹Tin, a hoten a hnênah, “Ngai teh, Israela chhûngkaw zînga lalte hi mi khawngaih thei tak lal an ni tih thu kan hria a. Saiip puan fêngin, kan luah hruia inhlîngin Israel lal hnênah min va kaltîr rawh khai; ani chuan a zuah duh mial mahna che,” an ti a.

³²Chutichuan, saiip puan an fêng a, an luah hruiin an hlîng a, Israel lal hnênah chuan an va kal a, “I chhiahhlawh Ben-hadadan, ‘Khawngaih takin mi zuah rawh se,’ a ti e,” an ti a. Ani chuan, “A la dam a ni maw? Ka unaupa a ni alâwm,” a ti a.

³³Chu mite chuan ngaihṭha takin, a rilru thu tak a sawi a ni ang tih ringin, “I unaupa Ben-hadada ni e,” an ti var a. Tichuan, ani chuan, “Va kal ula, rawn hruai rawh u,” a ti a. Tichuan, Ben-hadada chu a lo chhuak a, a hnênah a kal a; tin, ani chuan tawlailîrah a lo chuantîr a.

³⁴Tin, Ben-hadada chuan a hnênah, “Ka pain i pa laka khua a lo lâk tâkte kha ka pe kîr leh ang a; tin, ka pain Samari khuaa dâwrpui hmun a siam ang khân Damaska khuaah i dâwrpui hmun tûr i siam ve dâwn nia,” a ti a. Tin, Ahaba chuan, “Chutianga thu inthlung chuan ka kaltîr ang che,” a ti a. Chutichuan, a hnênah thu a thlung a, a kaltîr ta a.

³⁵Tin, zâwlnei fapate zînga mi pakhat hian LALPA thuin a ṭhianpa hnênah, “Mi han vaw teh khai,” a ti a. Tin, chu mi chuan a vaw duh lo va.

³⁶Tichuan, a hnênah, “LALPA thu i awih loh avângin, ngai teh, nang hian mi liamsan veleh, sakeibakneiin a lo seh ang che,” a ti a. Tin, a liamsan tâk veleh chuan sakeibakneiin a lo hmu a, a seh ta a.

³⁷Tichuan, mi dang a va hmu leh a, “Mi han vaw teh khai,” a ti a. Chu mi chuan a han vua a, a vaw sil ta a.

³⁸Chutichuan, zâwlnei chu a kal a, kalkawngah lal a lo châng a, a chal hrênnaa a mit khuhin a inbâwl danglam a.

³⁹Tin, lal a lo thlen chuan lal chu a lo au va, “I chhiahhlawh hi indona rûnpui hmunah ka va kal a; tin, ngai teh, mi pakhat hi a lo hawi a, ka hnênah mi pakhat a rawn hruai a, ‘He mi hi lo vêng rawh; a tlân bo hlauh zawngin a nun aiah i nun i chân ang a, a nih loh leh tangkarua talent khat i pe tûr a ni,’ a ti a.

⁴⁰Tin, i chhiahhlawh hi ka buai vêl chung avângin a lo bo ta daih mai a,” a ti a. Tin, Israel lal chuan a hnênah, “Chutiang tak chu a ni, i chunga thu tlu chu; nangmahin zuk titlu tawh diam chia,” a ti a.

⁴¹Tin, ani chuan a mit ata chal hrênna chu a hlîm ta thuai a; tin, Israel lal chuan zâwlneite zînga mi a ni tih a hre ta a.

⁴²Tin, ani chuan a hnênah, “LALPAN heti hian a ti: ‘Ka ânchhe lawha chu i chhuah tâk avângin a nun aiah i nun, a mite aiah i mite i chân ang,’ tiin,” a ti a.

⁴³Tin, Israel lal chu ngui tak leh lungni lo takin a haw a, Samari khuaah a kal ta a.