Read Mizo_Old_version LEHKHABU PAKHATNA LALTE 21 Bible Online

LEHKHABU PAKHATNA LALTE 21 - Mizo_Old_version bible

LEHKHABU PAKHATNA LALTE 21

¹Tin, chûng thil hnuah chuan heti hi a ni a, Jezreel mi Nabothan grêp huan a nei a, chu chu Jezreel-ah Samari lal Ahaba in bul lawkah a awm a.

²Tin, Ahaban Nabotha chu, “Ka in bul a nih avâng hian, thlai hmunah i grêp huan hi mi pe rawh khai, a aiah grêp huan ṭha zâwk ka pe ang che; a nih loh leh i duh zâwk phei chuan a tangkain a man tâwk chu ka pe ang che,” tiin a bia a.

³Tin, Nabotha chuan Ahaba hnênah, “Ka pute ro han pêk che chu ka tân a âwmin a âwm lo ve,” a ti a.

⁴Tin, Jezreel mi Nabothan chutiang thu a hnêna a sawi avâng chuan Ahaba chu ngui tak leh lungni lo takin a inah a lût ta a, “Ka pute ro ka pe thei lo vang che,” a ti tlat si a. Tichuan, a khumah a mu a, lehlam a hawi a, chaw rêng rêng a ei duh ta lo va.

⁵Chutichuan, a nupui Jezebeli chu a va kal a, a hnênah, “Engtizia nge i rilru chuti taka a lungngaiha, chaw rêng rêng i ei loh le?” a ti a.

⁶Tin, ani chuan a hnênah, “Jezreel mi Nabotha ka bia a, a hnênah, ‘I grêp huan hi mi leitîr rawh, a nih loh leh i duh zâwk chuan a aiah grêp huan dang ka pe ang che,’ ka ti a; tin, ani chuan, ‘Ka grêp huan zawng ka pe lo vang che,’ tiin mi chhâng alâwm maw le,” a ti a.

⁷Tin, a nupui Jezebeli chuan a hnênah, “Israel ram lal hi i ni lâwm ni? Tho la, chaw ei la, rilru hlim takin awm rawh khai; Jezreel mi Nabotha grêp huan chu keiman ka pe ang che,” a ti a.

⁸Chutichuan, Ahaba hmingin lehkha a ziak a, nemnain a nem a; tin, lehkha chu a awmna khuaa Nabotha ṭhenawm upate leh mi ṭhate hnênah a thawn a.

⁹Tin, lehkhaah chuan, “Chaw nghei thu lo puang ulangin, mipui zîngah Nabotha chu hmatâwntîr ula;

¹⁰mi pahnih Beliala fate a hmaah ṭhuttîr ula, ‘Pathian leh lal i sawichhia a ni,’ tia a hêktu atân lo siam rawh u. Tin, hruai chhuak ula, lo dêng hlum rawh u,” a ti a.

¹¹Tin, a awmna khuaa mi, a awmna khuaa awm upate leh mi ṭhate chuan Jezebelin an hnêna a thawn lehkhaa a ziak ang chuan an lo ti a.

¹²Chaw nghei thu an puang a, mipui zîngah Nabotha chu an hmatâwntîr a.

¹³Tin, mi pahnih Beliala fapate chu a hmaah chuan an va ṭhu a; tin, Beliala mite chuan mipuiho hmaah chuan, “Nabotha hian Pathian leh lal a sawichhia e,” tiin amah Nabotha chu an hêk a. Tichuan, khua ata an hruai chhuak a, lungin an dêng a, a thi ta a.

¹⁴Tichuan, Jezebeli hnênah, “Nabotha chu lungin an dêng a, a thi ta e,” tiin mi an tîr a.

¹⁵Tin, Jezebelin Nabotha chu lungin an dêng a, a thi ta tih a hriatin heti hi a ni a, Jezebeli chuan Ahaba hnênah, “Tho la, Jezreel mi Nabotha grêp huan, a leitîr phal loh che kha nei tawh rawh le; Nabotha chu a dam tawh lo, a thi tawh e,” a ti a.

¹⁶Tin, Ahaban Nabotha a thi ta tih a hriatin heti hi a ni a, Jezreel mi Nabotha grêp huan nei tûra thawk thla tûrin Ahaba chu a tho ta a.

¹⁷Tin, LALPA thu chu Tisbe mi Elija hnênah a lo thleng a,

¹⁸“Tho la, Samari khuaa awm Israel lal Ahaba be tûrin zuk kal rawh khai. Ngai teh, Nabotha grêp huanah a awm a, neih tumin chutah chuan a chhuk a ni e.

¹⁹A hnênah, ‘LALPAN heti hian a ti, “I that a, i neihsak lehnghâl elo?” tiin,’ ti langin; a hnênah, ‘LALPAN heti hian a ti, “Uiin Nabotha thisen an liahna hmun ngeiah hian nanga thisen pawh hi an liak ve dâwn a ni,” tiin,’ ti ang che,” tiin.

²⁰Tin, Ahaba chuan Elija hnênah, “Mi rawn hmu ta maw, ka hmêlmapa?” a ti a. Tin, ani chuan a chhâng a, “Ka hmu ta che a nih hi, LALPA mit hmuha thil ṭha lo ti tûrin inhralh ta hek che.

²¹Ngai teh, i chungah hian thil ṭha lo ka rawn thlentîr ang a, ka rawn tibo hlauh ang chia, Ahaba aṭang hian mipa fa tawh phawt chu Israel rama mi khuahkhirh leh khirh loh pawh ka tiboral ang.

²²Nangin mi tihthinrim avâng leh Israel-ho thil i tihsualtîr avângin, Nebata fapa Jeroboama chhûngte leh Ahija fapa Baasa chhûngte ang maiin i chhûngte hi ka siam ang,” a ti a.

²³Tin, Jezebeli chungchâng thu pawh LALPAN a sawi a, “Jezreel khaw kulh bulah uiin Jezebeli hi an la ei ang.

²⁴Ahaba chhûngkaw zînga mi khawpuia thi apiangte chu uiin an ei ang a; rama thi apiangte chu chunglêng savaten an ei ang,” tiin.

²⁵A nupui Jezebeli fuihpawrha LALPA mit hmuha thil ṭha lo ti tûra inpe, Ahaba ang rêng rêng hi tu mah an awm lo.

²⁶LALPAN Israela thlahte hmaa a hnawh chhuah Amor-hote thiltih tinrêng ang milemte biain thil tenawm takin a ti ṭhîn a.

²⁷Tin, Ahaban chûng thu a hriat chuan heti hi a ni a, a puan a pawt thlêr a, saiip puan a sin a, chaw a nghei a, saiip puanah a mu a, dîm takin a che ta a.

²⁸Tin, LALPA thu chu Tisbe mi Elija hnênah a lo thleng a,

²⁹“Ahaba ka hmaa a inngaihtlâwmzia hi i hmu em? Ka hmaa a inngaihtlâwm avâng hian ama chhanah hi chuan thil ṭha lo ka thlentîr lo vang a, a fapa chhanah erawh chuan a chhûngte chungah thil ṭha lo ka thlentîr ang,” tiin.