Read Mizo_Old_version LEHKHABU PAKHATNA LALTE 22 Bible Online

LEHKHABU PAKHATNA LALTE 22 - Mizo_Old_version bible

LEHKHABU PAKHATNA LALTE 22

¹Tin, kum thum chhûng chu Suria-ho leh Israel-hote chu indo lovin an awm a.

²Tin, a kum thum kum chuan heti hi a ni a, Juda lal Jehosaphata chu Israel lal hnênah a zuk kal a.

³Tin, Israel lal chuan a puipate hnênah, “Ramoth-gilead khua hi keimahni ta a ni tih hre reng sia engtia Suria lal hi chhuhsak lova awm mai mai nge kan nih le?” a ti a.

⁴Tin, Jehosaphata hnênah chuan, “Ramoth-gilead khua mi han beihpui ve duh ang emaw chu?” a ti a. Tin, Jehosaphatan Israel lal hnênah chuan, “Kei leh nang, ka mite leh i mite chu pumkhat kan ni a, ka sakawrte leh i sakawrte chu pumkhat an ni alâwm,” a ti a.

⁵Tin, Jehosaphata chuan Israel lal hnênah, “LALPA thu ngaichâng rih zet la maw le,” a ti a.

⁶Chutichuan, Israel lal chuan zâwlneiho mi zali lai a ko khâwm a, an hnênah, “Ramoth-gilead khua bei tûrin ka han thawk ang nge thawk lo vang?” a ti a. Tin, anni chuan, “Han thawk rawh, Lalpan lal kutah a pe dâwn a ni,” an ti a.

⁷Nimahsela, Jehosaphatan, “Hetah hian LALPA zâwlnei dang tu emaw tal han râwn tûr an awm lo vem ni le?” a ti a.

⁸Tin, Israel lal chuan Jehosaphata hnênah, “LALPA min râwnsak tûr mi pakhat, Imla fapa Mikaia zawng a la awm kha maw! Nimahsela, ani hi chu ka huat zâwng tak a ni, ka chungchâng thu hi a chhe lam ngawt lo chu a ṭha rêng rêng a sawi ngai si lo va,” a ti a.

⁹Tichuan, Israel lal chuan hotu pakhat a han ko va, “Imla fapa Mikaia han hruai thuai teh,” a ti a.

¹⁰Tin, Israel lal leh Juda lal Jehosaphata chu Samari kulh kawngka luhna bula hruih zâwlah an lal puana inthuamin, an lalṭhutthlêng ve veah an ṭhu a; tin, zâwlnei zawng zawng chuan an hmaah thu an sawi a.

¹¹Tin, Kenaana fapa Zedekia chuan thîr kîte a siamsak a, “LALPAN heti hian a ti, ‘Hêngte hian Suria-hote chu boral dêr khawpin i si ang,’ tiin,” a ti a.

¹²Chutiang bawkin zâwlnei zawng zawng chuan, “Ramoth-gilead-ah chuan han chho la, han hlawhtling rawh khai, LALPAN lal kutah hian a pe dâwn a ni,” tiin an sawi a.

¹³Tin, Mikaia va ko tûra an tirha chuan a hnênah, “Ngai teh khai, zâwlnei hian thukhat vuain a ṭha lamin lal hnênah thu an sawi ṭheuh va; an sawi tâk ṭheuh ang chuan han sawi ve la, a ṭha lamin han sawi ve rawh aw,” tiin a sawi a.

¹⁴Tin, Mikaia chuan, “LALPA nunna chhâlin ka sawi e, LALPAN ka hnêna a sawi chu a ni, ka han sawi dâwn ni,” a ti a.

¹⁵Tin, lal hnên a han thlen chuan, lal chuan a hnênah, “Mikai, Ramoth-gilead khua bei tûrin kan han thawk ang nge thawk lo vang?” a ti a. Tin, ani chuan a chhâng a, “Han thawk u la, han hlawhtling rawh u khai; LALPAN lal kutah a pe dâwn a ni,” a ti a.

¹⁶Tin, lalin a hnênah, “Thutak ngawt lo chu ka hnênah LALPA hminga sawi lo tûrin vawi eng zât nge maw chhia ka chhamtîr dâwn che le?” a ti a.

¹⁷Tin, ani chuan, “Israel-ho zawng zawng chu vêngtu nei lo berâm angin tlângahte an darh vek ka hmu a; LALPAN, ‘Hêngho hian hotu an nei ta lo va, mi tin mahni in lamah thlamuang takin haw dial mai rawh se,’ a ti a ni,” a ti a.

¹⁸Tin, Israel lal chuan Jehosaphata hnênah, “Ka chungchâng thu hi a chhe lam ngawt lo chu a ṭha lam rêng rêng zawng a sawi lo vang tih ka hrilh che a ni lâwm ni kha?” a ti a.

¹⁹Tin, Mikaia chuan, “Chuvângin, LALPA thu hi ngaithla teh, LALPA chu a lalṭhutthlênga ṭhu ka hmu a, vâna mipuiho zawng zawng, a ding lam leh vei lama dingte nên.

²⁰Tin, LALPAN, ‘Ahaba hi Ramoth-gilead khuaa han kala, râla thi tûrin tuin nge thlêm ang?’ a ti a. Pakhatin hetiang hian a ti a, mi dangin chutiang chuan a ti a.

²¹Tichuan, thlarau pakhat hi a lo chhuak a, LALPA hmaah a ding a, ‘Keiman ka thlêm ang e,’ a ti a.

²²Tin, LALPAN a hnênah, ‘Engin maw?’ a ti a. Tin, ani chuan, ‘Ka va kal ang a, zâwlnei zawng zawng hmuiah chuan thlarau dawtheiah ka va chang ang,’ a ti a. Tin, anin, ‘I thlêm ngei ang a, hlawh pawh i hlawhtling bawk ang; va kal ta la, chutiang chuan va ti tawh le,’ a ti a.

²³Chutichuan, ngai teh, LALPAN hêng i zâwlneiho zawng zawng hmuiah hian thlarau dawthei a dah a, i chungchâng thu hi a ṭha lo lamin LALPAN a sawi tawh a ni,” a ti a.

²⁴Tichuan, Kenaana fapa Zedekia chuan a rawn hnaih a, Mikaia biangah a rawn bêng a, “LALPA thlarau chuan i hnêna thu sawi tûrin khawi lamah nge mi kalsan?” a ti a.

²⁵Tin, Mikaia chuan, “Ngai rawh, pindan chhûngrila biru tûra i luh niah i la hria ang,” a ti a.

²⁶Tin, Israel lal chuan, “Mikaia hi hruai ula, khawpui awptu Amona leh lal fapa Joasa hnênah kalpui leh tawh u;

²⁷tin, ‘Lalin heti hian a ti: “He mi hi lung inah khung ula, thlamuang taka ka lo haw leh hma loh chuan chaw leh tui tlêm tê chauh pe rawh u,” tiin,’ ti rawh u,” a ti a.

²⁸Tin, Mikaia chuan, “Thlamuang taka i lo haw leh hrim chuan LALPAN kei mi hmangin thu a sawi lo a ni ang le,” a ti a. Tin, amah vêk chuan, “Nangni mipuite u, in vaiin lo hre rawh u,” a ti a.

²⁹Chutichuan, Israel lal leh Juda lal Jehosaphata chu Ramoth-gilead khuaah chuan an han chho va.

³⁰Tin, Israel lal chuan Jehosaphata hnênah, “Ka inbâwl danglam ang a, inbeihnaah chuan ka han kal ve ang e; nang erawh chuan i lal puan sin ang che,” a ti a. Tichuan, Israel lal chu a inbâwl danglam a, inbeihnaah chuan a han kal a.

³¹Tin, Suria lal chuan a tawlailîr chunga hotu sawmthum leh pahnihte hnênah chuan, “Israel lal ngawt lo chu mi tê pawh, mi lian pawh a tua mah bei suh ang che u,” tiin thu a pe a.

³²Tin, tawlailîr chunga hotute chuan Jehosaphata an han hmuh chuan, heti hi a ni a, “Israel lal a ni ngei mai le!” an ti a. Tichuan, beih tumin an hual ta a; tin, Jehosaphata chu a au chhuak a.

³³Tin, tawlailîr chunga hotute chuan Israel lal a ni lo tih an hriat chuan heti hi a ni a, an ûm chu an lêt leh ta a.

³⁴Tin, mi pakhat hian tum bîk nei lovin a thalngul a kuai a, Israel lal chu âwmphaw leh âwmphaw inkârah a kâp a; tichuan, a tawlailîr khalhtu hnênah, “Kai her la, sipaiho zîng ata hi mi chhuahpui rawh khai, hliam na tak ka tawh tâk hi,” a ti a.

³⁵Tin, chumi ni chuan inbeihna chu a nasa ta hle mai a; lal chu a tawlailîrah chuan Suria-hote hmuhah an dintîr a; tin, tlai lamah chuan a thi ta a. Tin, amah an hliamna aṭang chuan thisen chu tawlailîr chhûngah chuan a luang zawih zawih a.

³⁶Tin, ni tlâk dâwn vêl lai chuan, sipaihote zîngah, “Mi tin mahni khaw lamah, mi tin mahni ram lamah haw vek tawh rawh se,” tiin an au vêl ta chiam a.

³⁷Chutichuan, lal chu a thi ta a, Samari khuaah an luhpui a; tichuan, Samari khuaah lal chu an phûm ta a.

³⁸Tin, Samari khaw dîl kamah tawlailîr chu an sil a; tin, LALPA thu sawi ang ngei khân uiin a thi te chu an liak ta a (chutah chuan nawhchizuarhote chu an insil ṭhîn).

³⁹Tichuan, Ahaba chanchin dang te, a thiltih zawng zawng te, a saingho in sak te, a khaw siam zawng zawngte chu Israel lalte lal lai thu ziakna buah a chuang a ni lâwm ni?

⁴⁰Chutichuan, Ahaba chu a pute hnênah chuan a muhîl ta a. Tichuan, a fapa Ahazia chu a aiawhin a lal ta a.

⁴¹Tin, Israel lal Ahaba lal kum linaah Asa fapa Jehosaphata chu Juda-te chungah a lal ṭan a.

⁴²Jehosaphata chu a lal ṭan lai chuan kum sawmthum leh kum nga a ni a; Jerusalem khuaah kum sawmhnih leh kum nga ro a rêl a. A nu hming chu Azubi, Silhia fanu a ni.

⁴³Tin, a pa Asa kawng zawh zawng zawng chu a zawh ve a. Pênsan hauh lovin LALPA mit hmuha thil ṭha a ti ṭhîn a. Hmun sângte erawh chu a thehthang bo lo va, hmun sângahte chuan mite chu an la inthawiin, rimtui an la hâl reng ṭhîn.

⁴⁴Tin, Jehosaphata chuan Israel lal nêna inremna a siam a.

⁴⁵Tichuan, Jehosaphata chanchin dang te, a thiltihtheihzia a tihlan thu te, a râl beih thu te chu Juda lalte lal lai thu ziakna buah a chuang a ni lâwm ni?

⁴⁶Tin, a pa Asa dam laia mipa inzuarho la awmate kha a ram ata a hnawt chhuak vek a.

⁴⁷Tin, Edom ramah chuan lal an awm lo va, lal aiawhtuin ro a rêl a.

⁴⁸Jehosaphata chuan Ophir-a rangkachak phur tûr Tarsis lawngte a tu a; nimahsela, a kal ta lo, Ezion-geber hmunah lawngte chu a chhe ta vek si a.

⁴⁹Tichuan, Ahaba fapa Ahazia chuan Jehosaphata hnênah, “Ka mite hi i mite nên lawngahte kal za ang hmiang,” a ti a. Nimahsela, Jehosaphata chuan a remti lo.

⁵⁰Tin, Jehosaphata chu a pute hnênah a muhîl a, a pute zîngah a pu Davida khawpuiah an phûm ta a. Tichuan, a fapa Jehorama chu a aiawhin a lal ta a.

⁵¹Tin, Juda lal Jehosaphata lal kum sâwm leh kum sarih kumin, Ahaba fapa Ahazia chu Samari khuaah Israel-te chungah a lal ṭan a, Israel-te chungah kum hnih a lal a.

⁵²Tin, LALPA mit hmuhah thil ṭha lo a ti ṭhîn a, a nu leh a pa kawng zawh te, Nebata fapa Israel-hote tihsualtîrtu Jeroboama kawng zawhte a zawh ve ṭhîn a.

⁵³Tin, a pa tih ang apiang tiin Baala rawng a bâwl a, a be ṭhîn a, LALPA, Israel-te Pathian chu a tithinrim ṭhîn a ni.