Read Mizo_Old_version LEHKHABU PAKHATNA LALTE 4 Bible Online

LEHKHABU PAKHATNA LALTE 4 - Mizo_Old_version bible

LEHKHABU PAKHATNA LALTE 4

¹Tin, Lal Solomona chu Israel-ho zawng zawng lalah a awm ta a.

²Hêngte hi a mi lianho neihte chu an ni: Zadoka fapa Azaria chu puithiam a ni a;

³Sisa fapa, Elihorepha leh Ahija-te chu lehkhaziaktu an ni a; Ahiluda fapa Jehosaphata chu chanchin ziaktu a ni a;

⁴Jehoiada fapa Benaia chu sipai hotu a ni a; Zadoka leh Abiathara chu puithiam an ni a;

⁵Nathana fapa Azaria chu hotute chunga mi a ni a; Nathana fapa Zabuda chu puithiam leh lal ṭhian a ni fâwm a;

⁶Ahisara chu in chhûng lam hotu a ni a; Abda fapa Adonirama chu hnathawka rawih luihte hotu a ni.

⁷Tin, Solomona chuan Israel-ho zawng zawng chungah chuan hotu sâwm leh pahnih a nei a, chûngho chuan lal tân leh a chhûngkuate tân chuan ei tûr an ngaihtuah ṭhîn a; mi pakhatin kum khatah thla khat zêl ei tûr a ngaihtuah tûr a ni.

⁸Hêngte hi an hmingte chu a ni: Ephraim tlâng ramah Ben-hura;

⁹Makaz khuaah te, Saalbim khuaah te, Beth-semes khuaah te, Elon-beth-hanan khuaah te Ben-dekera;

¹⁰Aruboth ramah Ben-heseda; ani chuan Soko leh Hepher ram zawng zawng a chang tel a;

¹¹Dor khaw zosang ram zawng zawngah Ben-abinadaba; ani chuan Solomona fanu Taphathi nupuiah a nei a;

¹²Taanak khua leh Meggido khuaah te, Jezreel khaw hnuai, Zarethan khaw bula awm Beth-san bial zawng zawngah te, Beth-san aṭanga Abel-mehola-ah te, Jokneam ram dep thlengin Ahiluda fapa Baana;

¹³Ramoth-gilead khuaah Ben-gebera; ani chuan Manasea fapa Jaira khua, Gilead rama awmte chu a chang tel a; Basan rama Argob bial, khaw ropui tak tak khaw sawmruk, kulh leh a kalhna dâr tlâwn neite pawh a chang tel a;

¹⁴Mahanaim khuaah Idova fapa Ahinadaba;

¹⁵Naphtali ramah Ahimaaza; ani pawh chuan Solomona fanu Basemathi nupuiah a nei a;

¹⁶Aser leh Bealoth khuaahte Husaia fapa Baana;

¹⁷Isakar ramah Parua fapa Jehosaphata;

¹⁸Benjamin raman Ela fapa Simeia;

¹⁹Amor-ho lal Sihona leh Basan lal Oga ram, Gilead ramah Uria fapa Gebera; chu ramah chuan hotu pakhat a awm.

²⁰Juda-te leh Israel-te chu tuifinriat kama ṭiauvaivut zât zetin an tam a, en eiin an in a, hlim takin an awm ṭhîn a.

²¹Tichuan, Solomona chuan Lui aṭangin Philistia-ho ram leh Aigupta ramri thlengin ram zawng zawng chungah chuan ro a rêl a. Lâwmmante an rawn keng ṭhîn a, Solomona dam chhûng zawng chuan a rawng an bâwl ṭhîn a.

²²Solomona ni khat ei tâwk chu chhangphut dip tak tehkhâwng sawmthum leh, chhangphut tehkhâwng sawmruk a ni a;

²³bâwngpa thau tak sâwm te, bâwngpa tla mi sawmhnih te, berâm za te nên; chûng lo pawh chu sakhi te, sangai te, sakhipa te, âr châwm thaute pawh.

²⁴Lui râl piah lam ram zawng zawng - Tipsa aṭanga Gaza thlengin, Lui ral piah lama lalho zawng zawng chungah chuan a lal a; a chhehvêla mi zawng zawngte nên chuan râlmuangin an awm hlawm a.

²⁵Tin, Solomona dam chhûng zawng chuan Juda-ho leh Israel-ho chu, Dan aṭanga Beer-seba khaw thlengin, mi tin mahni grêp hrui bulah leh mahni theipui bulah chuan thlamuang takin an awm ṭheuh va.

²⁶Tin, Solomona chuan a tawlailîr hnûktu sakawr in sîngli [1] leh sakawr chung chuang mi [2] sîngkhat leh sânghnih a nei a.

²⁷Chûng hotute chuan mahni chan thla zêlah, Lal Solomona leh Lal Solomona dawhkâna rawn kîl vetu zawng zawngte ei tûr chu an ngaihtuah ṭhîn a; pêk kim loh an nei ngai lo.

²⁸Mi tinin an tih tûra ruat ang zêlin a awmna tûr hmunah chuan, sakawrte leh ran tlân chak takte tân barli leh buhpâwlte an rawn dah bawk ṭhîn a.

²⁹Tin, Pathianin Solomona chu finna leh hriatna nasa tak leh, rilru zauna, tuifinriat kama ṭiauvaivut ang mai a pe a.

³⁰Solomona finna chuan khawchhak fate zawng zawng finna leh Aigupta mite finna zawng zawng chu a khûm vek a.

³¹Mi zawng zawng aiin a fing a ni: Mahola fate - Ezra mi Ethana te, Hemana te, Kalkola te, Darda te ai pawhin; tichuan, a vêl hnam zawng zawngte zîngah chuan a hming a thang ta a.

³²Thufing sângthum a sawi a; tin, a hlate chu sângkhat leh panga a ni.

³³Thing chanchin te pawh Lebanon tlânga sidar thing aṭanga kulha lo chawr chhuak husop chenin a sawi ṭhîn a; sa chanchin te, bawkvâka kal chi chanchin te, sangha chanchin te pawh a sawi ṭhîn a.

³⁴Tichuan, Solomona finna chanchin hre tawh phawt chu, khawvêl lalho zawng zawng aṭangin, chi tina mi a finna ngaithla tûr an lo kal ṭhîn a.