Read Mizo_Old_version LEHKHABU PAKHATNA LALTE 5 Bible Online

LEHKHABU PAKHATNA LALTE 5 - Mizo_Old_version bible

LEHKHABU PAKHATNA LALTE 5

¹Tin, Tura lal Hiraman Solomona hnênah a mite a tîr a, a pa aiah lal atân hriak an thih tih a lo hre ta si a; Hirama chu Davida ngaina ṭhîntu a ni fo rêng a.

²Tin, Solomona chuan Hirama hnênah,

³“Ka pa Davida khân LALPAN a kephah hnuaia a dah hma loh kha chuan a vêl kil tin kil tanga indonate avâng khân, LALPA a Pathian hming atân in a sa thei lo tih i hria a.

⁴Tûnah erawh chuan LALPA ka Pathianin kil tin kil tangah muanna min lo neihtîr ta a; hmêlmate an awm ta lo va, vânduaina pawh a awm ta hek lo.

⁵Tin, ngai teh, LALPAN ka pa Davida hnêna, ‘I fapa, i aia i lalṭhutthlêng ka la luahtîr tûra chuan ka hming atân in chu a la sa ang,’ tia a lo sawi tawh ang khân, LALPA ka Pathian hming atân in sak ka tum a.

⁶Chutichuan, Lebanon tlânga mi sidar thingte mi kihsak tûrin thu pe langin, ka chhiahhlawhte pawh i chhiahhlawhte zîngah an tel ve ang a; tin, i chhiahhlawhte hlawh chu i sawi ang apiang ka pe zêl ang che; Zidon mite anga thing kih thiam kan zîngah tu mah an awm lo tih i hre si,” tiin mi a tîr a.

⁷Tin, heti hi a ni a, Hiraman Solomona thu a lo hriat chuan a lâwm ta êm êm mai a, “Hêng mi tam tak chunga rorêl tûra fapa fing tak Davida petu LALPA chu vawiinah hian fakin awm rawh se,” a ti a.

⁸Tin, Hiraman Solomona hnênah, “I thu mi han chah chu ka lo hria a; sidar thing thu leh fâr thing thu chu i mamawh apiang ka lo ti ang e.

⁹Ka chhiahhlawhten Lebanon tlâng aṭangin tuifinriat thlengin an rawn la thla ang a; i hmun mi ruatsak tûra tuifinriata tawlh tûrin ka têltîr ang a, chumi hmunah chuan ka phelhtîr ang a, nangin i lo la dâwn nia; tin, nang pawhin ka chhûngkuate ei tûr tumin ka mamawh i lo phuhru ve thung a ni ang chu,” tiin mi a tîr a.

¹⁰Chutichuan, Hirama chuan sidar thing leh fâr thing chu Solomona hnênah a mamawh apiang a pe a.

¹¹Tin, Solomonan Hirama chu a chhûngkuate ei atân buh tehkhâwng sînghnih leh hriak sâwr tehkhâwng sawmhnih a pe a. Chu chu Solomonan kum tina Hirama a pêk ṭhin dân chu a ni.

¹²Tin, LALPAN a tiam ang ngeiin Solomona chu finna a pe a; tin, Hirama leh Solomona kârah chuan inremna a awm a, an pahnih chuan thu an thlung dûn ta a.

¹³Tin, Lal Solomona chuan Israel-ho zawng zawng zînga mi hnathawka rawih luih pâwl a siam a; rawih luih pâwl chu mi sîngthum an ni.

¹⁴Lebanon-ah chuan thla khata inthlâk zêlin sîngkhat a tîr ṭhîn a: thla khat Lebanon-ah an han awm a, thla hnih anmahni in lamah; Adonirama chu hnathawka rawih luihte hotu a ni.

¹⁵Tin, Solomona chuan thil phur mi sîngsarih leh, lung chhêr mi sîngriat tlângahte a nei a;

¹⁶chûngte chu tiam lovin Solomona chuan a hna chunga hotu bîk, hnathawk vêngtu sângthum leh zathum a nei bawk a.

¹⁷Tin, lal thupêkin in lungphûm chu lung chher saa rem tûrin lung lian pui pui, lung man tam tak takte an rawn la a.

¹⁸Tin, in satuho, Solomona mite leh Hirama mite leh Gebal mite chuan lungte chu an chher a, in sakna tûr chuan thing leh lungte chu an buatsaih a.