Read Mizo_Old_version LEHKHABU PAKHATNA LALTE 6 Bible Online

LEHKHABU PAKHATNA LALTE 6 - Mizo_Old_version bible

LEHKHABU PAKHATNA LALTE 6

¹Tin, heti hi a ni a, Israela thlahte Aigupta ram ata an chhuah achin kum zali leh sawmriatna kum, Israel-hote chunga Solomona a lal kum lina, Ziv thla, thla hnihnaah chuan LALPA in sak chu a ṭan a.

²Tin, Solomonan LALPA tâna in a sak chu a dung lam tawng sawmruk a ni a, a vâng lam chu tawng sawmhnih a ni a, a sân lam chu tawng sawmthum a ni.

³Tin, chumi ina hmun thianghlim hma lama hulhliap chu a in vâng lam chen, tawng sawmhniha sei a ni a, a hma lama mi vâng lam chu tawng sâwm a ni.

⁴Tin, in atân chuan tukverh zîm tê thil kawkalh awmin a siam a.

⁵Tin, a in bang vêlin, biak in bang vêlah pawh, biakna hmun bang vêlah pawh chumi in bang si chuan in chhâwng nei a sa a; tin, a vêl chuan pindan a siam a.

⁶A chhâwng hnuaihnung ber chu a vâng lam tawng nga a ni a, a laita chu a vâng lam tawng ruk a ni a, a pathumna chu a vâng lam tawng sarih a ni; kalkhangte chu in banga inrawlh ngai lovin pâwn lamah chuan a vêlin in bangah chuan a nghahna a siam vâng a ni.

⁷Tin, in chu, an sak lai chuan lung a laihna hmuna chher sa veka sak a ni; tichuan, an sak chhûng zawng chu tuboh ri te, hreipui ri te, thîr hriamhrei ri rêng rêngte chumi inah chuan hriat a ni lo.

⁸Pindan laita berte kawngka chu chumi in ding lampangah chuan a awm a. A laitaah chuan rahka vialah an lâwn chho va; tin, a laita aṭang chuan a pathumnaah.

⁹Chutichuan, in chu a han sa a, a zo ta a; in chu sidar khanchhuk leh a phêkin a khuh a.

¹⁰Tin, in chhâwng neite chu a in si vekin tawng nga ṭheuhva sângin a sa a; chûngte chu in nên chuan sidar thinga zawm a ni.

¹¹Tin, LALPA thu chu Solomona hnênah a lo thleng a,

¹²“He in i sak lai mêk chungchâng thu hi - ka thuruatte i pawma, ka rorêlte i zawma, ka thupêk zawng zawngte zâwm tûra i pawm phawt zawngin, i pa Davida hnêna ka lo sawi tawh, ka thu kha i chungah hian ka tinghet ang.

¹³Tin, Israela thlahte zîngah hian ka chêng ang a, ka mi Israel-hote hi ka thlahthlam lo vang,” tiin.

¹⁴Tichuan, Solomona chuan in chu a sa a, a zo ta a.

¹⁵In chhûng lam bangah chuan sidar thingphel a hmang a; a chhuat aṭanga chung lam thlengin a chhûng lamah chuan thing a bel vek a; a chhuatah chuan fâr thingphel a phah belh a.

¹⁶Tin, kawmchâr lam tawng sawmhnih chu a chhuat aṭanga a bangte chenin sidar thingphel vekin a siam a; biakna hmun, hmun thianghlim ber atân pawh a chhûng lamah chuan a hmang a.

¹⁷Tin, in, biakna hmun bula biak in chu a dung lam tawng sawmli a ni.

¹⁸Tin, in chhûng lamah chuan a kuhmûm leh a pâr parh lema ker mawi sidar thing a awm a. A vai chuan sidar thing vek a ni a; lung rêng rêng a lang lo.

¹⁹Tin, LALPA thuthlunna bâwm dahna tûrin chumi inah a chhûnga biakna lamah chuan hmun a buatsaih a.

²⁰Tin, chumi biakna hmun chhûng chu a dung lam tawng sawmhnih, a vâng lam tawng sawmhnih, a sân lam tawng sawmhnih a ni a. Chu chu rangkachak hlîr hlak tîin a luan a; tin, sidar maichâm chu a luan bawk a.

²¹Chutichuan, Solomona chuan chumi in chhûng chu rangkachak hlîr hlak tîin a luan a. Pindan chhûngril ber luhna kawngkaah chuan rangkachak khaidiat a thlung a, rangkachakin a luan a.

²²Tin, in chu a zaa a peih thlengin a pumin rangkachak tîin a luan zêl a; biakna hmuna maichâm pum pui pawh chu rangkachak tîin a luan a.

²³Tin, biakna hmunah chuan tawng sâwm ve vea sâng, cherub pahnih olive thingin a siam a.

²⁴Tin, cherub thla pakhat chu tawng nga a ni a, cherub thla lehlam chu tawng nga bawk a ni: thla pakhat hmâwr aṭanga a thla lehlam hmâwr inkâr chu tawng sâwm a ni.

²⁵Cherub pakhat pawh chu tawng sâwm a ni a; cherub-te chu intiat chiah leh pian dân inang ve ve chiah an ni.

²⁶Cherub pakhat sân zâwng chu tawng sâwm a ni a, cherub pakhat pawh chu chumi chen bawk chu a ni.

²⁷Tin, cherub-te chu in chhûngril zâwkan chuan a dah a; tin, cherub-te thla chu a inzâr a, pakhat thla chuan bang lehlam a va dek a, cherub pakhat thla pawhin bang lehlam chu a dek bawk a. Chumi in lai takah chuan an thla leh an thla chu a insi a.

²⁸Tin, cherub-te chu rangkachak tîin a luan a.

²⁹Tin, in bang zawng zawngte chu a vêlin cherub te, tûm thing leh pangpâr parh lem ker mawite in chhûng lam leh pâwn lamah chuan a siam a.

³⁰Tin, a in chhuat chu chhûng lam leh pâwn lamah rangkachak tîin a luan a.

³¹Tin, biakna hmun luhna atân olive thing kawngkhâr a siam a; kawngka lu chung leh kawngka biangte chu a bang hmun ngaa ṭhena hmun khat tiat a ni.

³²Tichuan, olive thingin kawngkhâr pahnih a siam a; chumiah chuan cherub-te, tûm thing leh pangpâr parh lemte ker mawiin a siam a, chûng chu rangkachak tîin a luan a; tin, cherub-te leh tûm thingte chu rangkachak a hnawih a.

³³Tin, biak in luhna atân a bang hmun lia ṭhena hmun khat tiatin olive thing kawngka ban a siam a.

³⁴Fâr thingin kawngkhâr pahnih a siam bawk a; kawngkhâr pakhata phêk hnih chu thlep thei a ni a, kawngkhâr pakhata phêk hnih pawh chu thlep thei a ni.

³⁵Chûngahte chuan cherub-te, tûm thing leh pangpâr parh lemte a ker a; chûng ker mawi chu mâm takin rangkachak tîin a luan a.

³⁶Biak in hung chhûng kawtlai chhûngril zâwk chu lung chher chhâwng thum leh sidar thingphel thuah khatin a siam a.

³⁷A kum lina, Ziv thlaah chuan LALPA in lungphûm chu rem a ni a.

³⁸Tin, kum sâwm leh kum khatna, Bul thla, thla riatnaah chuan in chu ruahman ang chiahin a engkim chu peih vek a ni a. Chutichuan, kum sarih a sa a ni.