Read Mizo_Old_version LEHKHABU PAKHATNA LALTE 7 Bible Online

LEHKHABU PAKHATNA LALTE 7 - Mizo_Old_version bible

LEHKHABU PAKHATNA LALTE 7

¹Tin, Solomona chuan ama in chu kum sâwm leh kum thum a sa a, a in chu a peih vek a.

²Lebanon Ngawpui In sidar ban tlar li, ban chunga sidar thingphel chungah chuan a sa bawk a; a dung lam chu tawng za a ni a, a vâng lam chu tawng sawmnga a ni a, a sân lam chu tawng sawmthum a ni.

³Tin, chu chu bana innghat pindan sawmli leh panga chung lamah chuan sidar thingphela khuh a ni a; tlar khatah chuan sâwm leh panga zêl.

⁴Tin, tlar thumin tukverh a awm a, êng leh êngte chu tlar thumin a inep vek a.

⁵Tin, kawngkhâr leh ban zawng zawngte chu thingphelin kil lia siam a ni a; êng leh êngte chu tlar thumin a inep vek a.

⁶Tin, hulhliap chu ban neiin a siam a: a dung lam chu tawng sawmnga a ni a, a vâng lam chu tawng sawmthum a ni a; tin, chûng hmaahte chuan hulhliap a siam a, bante leh a hmaa luhna kailâwnte nên.

⁷Tin, a rorêlna tûr lalṭhutthlêng hulhliap, rorêlna hulhliap chu a siam bawk a; chu chu chhuat lehlam aṭanga a lehlam thlenga sidar thinga khuh a ni.

⁸Tin, a awmna tûr in, hulhliap chhûng, hung chhûng kawtlai danga awm chu chutiang bawka siam a ni. Pharaoa fanu (Solomonan nupuia a neih) chu hulhliap ang bawk chuan a in a saksak bawk a.

⁹Chûng zawng zawng chu lung man tam tak tak, lung a tâwk chiah zêla chher, zainaa zaia sak a ni a, chhûng lam pawh, pâwn lam pawh a lungphûm aṭanga a lêr thlengin; tin, chutiang bawkin pâwn lamah hung chhûng kawtlai zau tak thlengin.

¹⁰Tin, lungphûm chu lung man tam tak tak, lung lian pui pui, lung tawng sâwm te, lung tawng riat tea rem a ni a.

¹¹Chumi chung lam chu lung man tam tak tak, lung a tâwk chiah zêla chher, leh sidar thing a ni a.

¹²Tin, a vêlin hung chhûng kawtlai zau tak chu lung chher chhâwng thum leh sidar thingphel thuah khata hung a ni a; LALPA in hung chhûng kawtlai chhûngril zâwk leh, in hulhliap ang bawk khân.

¹³Tin, Lal Solomona chuan mi a tîr a, Tura khua ata Hirama a ko va.

¹⁴Chu mi chu Naphtali hnam hmeithai fa a ni a, a pa chu Tura khuaa mi, dâr chher mi a ni; ani chu dâr chher kawngah rêng rêng chuan a fingin a hre thiamin a themthiam hle mai a. Lal Solomona hnênah chuan a kal a, hna zawng zawng chu a thawhsak vek a.

¹⁵Tin, dâr ban pahnih a siam a, tawng sâwm leh tawng riata sâng ve ve, teh kuala tawng sâwm leh tawng hnih ve ve a ni a.

¹⁶Ban chhîpa dah tûr dâr chhûn bâwk pahnih a siam a: bâwk pakhat sân lam chu tawng nga a ni a, bâwk pakhat sân lam pawh chu tawng nga a ni.

¹⁷Ban chhîpa bâwk atân te chuan ṭial chik chek leh herh chîn chiante hi a awm a; bâwk pakhat atân chuan pasarih, bâwk dang pakhat atân pawh chuan pasarih bawk.

¹⁸Tichuan, bante chu a siam a; chûng ban chhîpa bâwkte tuamna tûr chuan ṭial chik chek pakhat chungah a vêlin tlar hnih a awm a; tin, chutiang bawk chuan bâwk pakhat chungah pawh a awmtîr bawk a.

¹⁹Hulhliap chhîpa bâwkah chuan lili lem hi a chuang a, tawng li.

²⁰Ban pahnih chhîpa bâwkahte chuan a tlângah, ṭial chik chek bul lawkah chuan pawmgranet te a awm bawk a; tin, pawmgranet chu chumi bâwkahte chuan zahnih ve ve a tlarin a awm a.

²¹Biak in hulhliapah chuan bante chu a dintîr a; ding lam ban chu a dintîr a, a hmingah Jakin a vuah a; tin, vei lam ban chu a dintîr a, a hmingah Boaz a vuah a.

²²A ban chhîpah chuan lili lem a chuang a; tichuan, ban lam hna chu peih a ni ta a.

²³Tin, dâr tuizêm lian pui, tawng sâwm tla, a sân lam tawng nga a chhûng a, a tlâng chu tawng sawmthum bial vêl a ni.

²⁴A tlâng hnuaiah chuan kuhmûm lem hian a vêl chhuak a, tawng sâwm a ni a, zêm vêl chuan a awm a. Chûng kuhmûmte chu tlar hnihin a awm a, chhûn tel nghâl a ni.

²⁵Chu chu bâwngpa sâwm leh pahnih chungah a innghat a, pathumin hmâr lam an hawi a, pathumin thlang lam an hawi a, pathumin chhim lam an hawi a, pathumin chhak lam an hawi a. Tin, tuizêm chu a chungah chuan a inhûng a, an mei lam chuan chhûng lam a hawi a.

²⁶Kutphah bawka chhah a ni a; a tlâng chu lili pangpâr ang, no tlang anga siam a ni a. Bath sânghnih dawng a ni.

²⁷Hûnchhan sâwm dârin a siam bawk a; hûnchhan pakhat sei lam chu tawng li a ni a, a vâng lam chu tawng li bawk a ni a, a sân lam chu tawng thum a ni.

²⁸Tin, hûnchhan siam dân chu hetiang hi a ni: chûng chuan khuar a nei a, a khuarte chu a tlângte inkârah a awm a;

²⁹a tlângte inkâr khuarahte chuan sakeibaknei te, sebâwngpa te, cherub-te a chuang a; a tlâng chungahte chuan hûnchhan a awm a. Sakeibakneite leh sebâwngpate hnuai lamah chuan cheimawina tê tête pawh a awm thliah a.

³⁰Hûnchhanahte chuan dâr tawlailîr pali leh dâr tlûng a awm ṭheuh va, a kil liahte chuan innghahna a awm ṭheuh va. Insilna bêl hnuai lamah chuan a innghahna chhûn a awm a, a sîrah chuan cheimawina a awm ṭheuh va.

³¹Belvâlkual chhûng kotlâng chu tawng khat tla a ni a; a rawng kotlâng chu belvâl anga bial a ni a, tawng khat leh a chanve a ni; tin, a rawng tlâng vêl chu ṭial mawi a ni a, a khuarte chu kil li a ni a, a bial lo.

³²Tawlailîr palite chu a khuar hnuai lamahte chuan a awm a; tin, tawlailîr tlângte chu hûnchhanah chuan a awm a. Tawlailîr sân lam chu tawng khat leh a chanve a ni.

³³Chûng tawlailîrte siam dân chu sakawr tawlailîr ke siam dân ang hi a ni a; a tlûng te, a belvâlkual te, a chhunkalhna te, a lai bâwkte chu chhûn vek a ni.

³⁴Tin, hûnchhan kil li ṭheuhvah chuan innghahna pali a awm a; chumi innghahnate chu hûnchhan nên pumkhat vek a ni.

³⁵A hûnchhan chungah chuan belvâlkual, tawng chanvea sâng hi a awm a. Hûnchhan chunga a hûnna kete leh a khuarte chu pumkhat vek a ni.

³⁶A hûnna ke phêkahte leh a khuarahte chuan a zau ang zia ziain cherub te, sakeibaknei te, tûm thingte a chuantîr a, a vêl chuan cheimawina hi a awm thliah a.

³⁷Chutiang vek chuan hûnchhan sâwmte chu a siam a. A vai chuan pumkhata chhûn a ni ṭheuh va, intiat ṭhiau, siam dân inang chiah vek a ni.

³⁸Tin, insilna bêl sâwm dârin a siam a; insilna bêl pakhat chuan bath sawmli a dawng a, insilna bêl chu tawng li ṭheuh a ni. Hûnchhan sâwm chungah chuan insilna bêl pakhat a inhûng ṭheuh va.

³⁹Tin, hûnchhante chu in ding lampangah panga a hûng a, in vei lampangah panga. Tuizêm chu in ding lampangah chhak lamah chhim chhawngin a hûng a.

⁴⁰Hirama chuan insilna bêl te, vut lawhna te, maihûnte a siam a. Chutichuan, Hirama chuan LALPA in atâna Solomona a siamsak zawng zawng chu a peih ta vek a:

⁴¹ban pahnih te, ban chhîpa bêl anga bâwk pahnih tuamna ṭial chik chek pahnih te,

⁴²chumi tuamna ṭial chik chek pahnih atâna pawmgranet zali te, ban chhîpa bêl anga bâwk pahnih tuamna tûr ṭial chik chek ve ve atâna pawmgranet tlar hnihte kha;

⁴³hûnchhan sâwm leh hûnchhan chunga insilna bêl sâwm te,

⁴⁴tuizêm leh a hnuaia sebâwngpa sâwm leh pahnih te,

⁴⁵bêlte leh, vut lawhte leh, maihûnte nên. Chûng bungbêl zawng zawng LALPA in atâna Hiraman Lal Solomona a siamsak chu dâr nawh tlêta siam vek a ni.

⁴⁶Jordan phaizâwlah Sukkoth leh Zarethan inkâr bellei hmunah a ni, lal chuan a chhûn ni.

⁴⁷Tin, Solomona chuan chûng bungbêl zawng zawng chu a tam êm êm avângin bûk chhuah lohvin a dah mai a; dâr bûk zât chu hriat chhuah rual a ni lo.

⁴⁸Tin, Solomona chuan LALPA ina bungbêl awm zawng zawng chu a siam a; rangkachak maichâm leh chhangdah awmna dawhkân chu rangkachakin;

⁴⁹biakna hmun hmazâwn khâwnvâr dahna ding lama panga leh vei lama panga chu rangkachak hlîr hlakin; pangpâr te, khâwnvâr te leh chaichehte chu rangkachakin;

⁵⁰no te, khâwnvâr puan chehna te, maihûn te, fian te, mei lâknate chu rangkachak hlîr hlakin; in chhûngril zâwk, hmun thianghlim ber kawngkhâra mite leh in (biak in chu) kawngkhâr vuahnate chu rangkachakin.

⁵¹Chutichuan, Lal Solomonan LALPA in atâna a siam zawng zawng chu a lo peih ta vek a; tichuan, Solomona chuan a pa Davida lo hlan sa tawh - tangkarua te, rangkachak te, bungbêl te chu a la lût a, LALPA ina rote zîngah a dah ta a.