Read Mizo_Old_version LEHKHABU PAKHATNA LALTE 8 Bible Online

LEHKHABU PAKHATNA LALTE 8 - Mizo_Old_version bible

LEHKHABU PAKHATNA LALTE 8

¹Chutichuan, Solomona chuan Israel upaho te, an hnam puipa zawng zawng te, Israela thlahho chhûngkaw puipate chu, Jerusalem khuaa Lal Solomona hnênah chuan Davida khawpui Zion ata LALPA thuthlung bâwm zâwn chho tûrin a khâwm chiam a.

²Tin, Israel mi zawng zawng chu Ethanim thla (thla sarihnaah chuan) kûtnaah Lal Solomona hnênah an inkhâwm chiam a.

³Tin, Israel upaho zawng zawng chu an lo kal a, puithiamte chuan bâwm chu an zâwn a.

⁴Tin, LALPA bâwm leh, inbiakna puan in leh, chuta bungbêl thianghlim zawng zawng chu an zâwn chho va; chûngte chu puithiamte leh Levi chite chuan an zâwn chho va.

⁵Tin, Lal Solomona leh Israel-ho pung khâwm zawng zawng, a hnêna rawn inkhâwmte chu bâwm hmaah an awm ho va, berâm leh bâwngpa, a tam avânga chhiar sên rual loh leh a zât hriat sên rual lohvin an inthawi a.

⁶Tichuan, puithiamte chuan LALPA thuthlung bâwm chu a awmna tûrah an la lût a, in chhûnga biakna hmun, hmun thianghlim berah, cherub-te thla hnuaiah chuan.

⁷Cherub-te chuan bâwm awmna chung zâwnah chuan an thla an zâr reng si a, cherub-te chuan bâwm leh a zâwnfungte chu an huap vek a.

⁸Tin, a zâwnfungte chu a sei khawp a, a zâwnfung hmâwrte chu biakna hmunhma, hmun thianghlim aṭang chuan a hmuh theih a; amaherawhchu, pâwn lamah zawng a lang lo. Tûn thleng hian chutah chuan a la awm reng a ni.

⁹Aigupta ram ata an chhuaha LALPAN Israela thlahte hnêna thu a thlun laia, Mosian Horeb tlânga lungphêk pahnih a dahte chauh lo kha chu, chumi bâwm chhûngah chuan eng mah dang a awm lo.

¹⁰Tin, heti hi a ni a, puithiamhote chu hmun thianghlim ata an lo chhuah veleh chuan LALPA in chu chhûm chuan a khat ta mup mai a;

¹¹tichuan, chhûm avâng chuan puithiamte chu rawngbâwlin an awm thei ta lo hial a; LALPA ropuinain LALPA in chu a tikhat ta vek si a.

¹²Chutichuan, Solomona chuan thu a sawi ta a: “LALPAN, ‘Thim chhah mupah chuan ka awm ang,’ a ti rêng a.

¹³I chênna tûr in, kumkhuaa i awmna tûr chu ka lo saksak ta ngei che a nih hi,” a ti a.

¹⁴Tin, lal chu a lehhawi a, Israel-ho pung khâwm zawng zawng chu mal a sâwm a; tichuan, Israel-ho pung khâwm zawng zawng chu an ding ṭhup a.

¹⁵Tin, ani chuan, “LALPA, Israel-te Pathian, ka pa Davida hnêna ama kâ ngeia, ‘Aigupta ram ata ka mi Israel-te ka hruai chhuah ni aṭangin Israel-ho hnam zînga khawii khua mah hi ka hming awmna tûr in sak nân ka la thlang ngai lo va; amaherawhchu, ka mi Israel-te hotu atân hian Davida hi ka thlang a ni,’ tia lo sawitu, ama kut ngeia rawn puitlintu hi fakin awm rawh se.

¹⁶

¹⁷Ka pa Davida khân Israel-te Pathian, LALPA hming tân in sak a rilruin a tum ṭhîn a.

¹⁸Nimahsela, LALPAN ka pa Davida hnênah, ‘I rilruah chuan ka hming tân in sak i tum ṭhîn a, hetiang rilru i lo pu hi i tiṭha e.

¹⁹Nimahsela, nang zawngin in chu i sa lo vang; i fapa, i ṭhâlbea la chhuak tûra chuan ka hming tân in chu a la sa zâwk ang,’ a lo ti tawh a.

²⁰Tin, LALPAN a thusawi chu a rawn tinghet ta a; LALPA lo tiam tawh ang ngeiin ka pa Davida hmun chu ka lo luah tain, Israel lalṭhutthlêngah chuan ka lo ṭhu ta a; Israel-te Pathian, LALPA hming tân in chu ka lo sa ta ngei si a.

²¹Chutah chuan bâwm awmna tûr hmun chu ka lo ruat ta a, chumiah chuan Aigupta ram ata a hruai chhuah laia kan pute hnêna a lo thlun, LALPA thuthlung chu a awm a,” a ti a.

²²Tin, Solomona chu LALPA maichâm hmaa Israel pung khâwmho zawng zawng hmuhah a ding a, vân lam banin a kut a phar a,

²³“Aw LALPA, Israel-te Pathian, i chhiahhlawh, an thinlung zawng zawnga i mit hmuha awm ṭhate hnêna thuthlung hlena khawngaihna tilang ṭhîn, i chhiahhlawh ka pa Davida hnêna thutiam hlentu, chung lam vânah leh hnuai lam leiah hian nangmah ang hi Pathian dang rêng rêng an awm lo ve; a ni, nangin i kâin thu i sawi a, i kutin i rawn hlawhtlintîr ta a, vawiina a lo awm ta ngei ang hian.

²⁴

²⁵Chutichuan, aw LALPA, Israel-te Pathian, i chhiahhlawh ka pa Davida hnêna, ‘I thlahte chu ka mit hmuha i awm anga ka mit hmuha awm ve tûra an awm dâna an fîmkhur phawt chuan, ka mit hmuhah Israel-te lalṭhutthlênga ṭhu tûr i hmai lo vang,’ tia i lo tiam tâk kha hlen ang che.

²⁶Chutichuan, aw Israel-te Pathian, nangin i chhiahhlawh ka pa Davida hnêna thu i lo sawi tawh kha khawngaih takin thlentîr ngei ang che.

²⁷Nimahsela, Pathian chu leiah hian a awm takmeuh ang emaw chu? Ngai teh, vân leh vânte vânah pawh i leng lo a ni a; he ka in sakah hian i va leng lo nasa lehzual âwm êm!

²⁸Nimahsela, aw LALPA ka Pathian, vawiina i chhiahhlawhin a auhna che leh ṭawngṭaina a chham hi ngaihthlâksakin, i chhiahhlawh ṭawngṭaina leh dîlna hi rawn ngaihsak ang che:

²⁹hemi hmun lam hawia i chhiahhlawh hian ṭawngṭaina a chham tûr chu ngaithlaa nangin, ‘Chutah chuan ka hming chu a awm ang,’ i tihna hmun ngei in lamah hian chhûn leh zâna i mit i lên reng ṭhin theihna tûrin.

³⁰Tin, i chhiahhlawh leh i mi Israel-te hian hemi hmun lam hawia an ṭawngṭai hunin an dîlnate lo ngaihthlâksak ṭhîn ang che. A ni, i chênna hmun vânan lo ngaithla langin; tin, lo ngaithlain ngaidam ang che.

³¹“Mi tu pawhin a vêngte chungah thil tisualin, chhechhamtîr hial lo ṭûl sela, hemi ina i maichâm hmaah hian rawn chham sela,

³²nangin vân aṭangin lo ngaithla langin, che la, mi sual chu ama lu chungah ngei a awm dân nghata thiam loh chantîrin, mi fel chu a felna ang ang hlawhtîra thiam chantîrin i chhiahhlawhte ro rêlsak ang che.

³³“I mi Israel-te hian i chungah thil an tihsual avânga hmêlmate laka an lo tlâwma i lam an lo hawi leha, i hming an faka, hemi ina ṭawngṭaia thil an rawn dîl chuan,

³⁴nangin vân aṭangin lo ngaihthlâksak la, i mi Israel-te sualna chu ngaidam la, an pute ram i pêkah hruai leh ang che.

³⁵“I chunga thil an tihsual avânga vân a pina, ruahte a lo sûr loh hunah chuan, hemi hmun lam hawia an ṭawngṭaia, i hming an faka, anmahni i tihretheih avânga an sualte an sim chuan,

³⁶nangin vân aṭangin lo ngaithla la, i chhiahhlawhte leh i mi Israel-te sualna hi ngaidam langin, an kalna tûr kawng ṭha i kawhhmuh dâwn si a; tin, i mite an rochan atâna i pêk i ramah hian ruah han sûrtîr ang che.

³⁷“Kan ramah hian ṭâm te a lo tlâka, hri te a lo lêna, rona emaw, ṭawihna emaw, khaukhuap emaw, pangang emaw a lo awma, an hmêlmaten an kawngka vêlahte an rawn huala, hri eng pawh, natna eng pawh a lo thlen chuan,

³⁸i mi Israel zawng zawng zînga mahni thinlunga hri awma hriaa, hemi in lam hawia kut rawn phar apiangin ṭawngṭaina leh dîlna an rawn hlan rêng rêng chu,

³⁹i awmna vân aṭangin lo ngaithla la, ngaidam la, che la, nang an thinlung hretu, mi tin an awm dân ang zêlin hlawhtîr ang che (nang zawng, nangmah chauh hi mihring fa zawng zawng thinlung hretu i ni si a);

⁴⁰kan pute i pêk rama an awm chhûng zawng hian an ṭih theihna tûr chein.

⁴¹“I mi Israel-te ni lo hnam dang mi, i hming avânga ram hla tak ata lo kalte chungchâng thu pawh hi

⁴²(i hming ropui tak te, i kut chak tak te, i bân i phar thu te hi an la hre hlawm dâwn si a): chûngte chuan hemi in lam hawia an rawn ṭawngṭai hunin,

⁴³nangin i awmna vân aṭangin lo ngaithla la, hnam dang mi chuan a dîl ang ang che chu lo tihsak ang che; i mi Israel-te ang bawka khawvêla hnam tinin i hming an hriata, an ṭih chia, hemi ka in sak hian i hming a pu a ni tih an lo hriat theih nân.

⁴⁴“I miten an hmêlmate chu i tirhna lam apiangah lo bei sela, i khawpui thlan lam hawi leh, i hming tân in ka lo sak lam hawia LALPA hnêna an ṭawngṭai chuan,

⁴⁵an ṭawngṭaina leh an dîlna chu nangin vân aṭangin lo ngaithla la, an thu-ah che ang che.

⁴⁶I chunga thil an tihsuala (tu mah thil tisual lo an awm âwm si lo va), an chunga i thinura, hmêlma kuta i pêka, hmêlma ram hla takah emaw, hnai teah emaw pawh sala an hruaia,

⁴⁷sala an hruaina rama an inngaihtuah chhuaha, an inchhîra, ‘Thil kan lo tisual a, dik lo tak leh sual takin kan ti ta,’ tia sala hruaitute rama an rawn ngen chea,

⁴⁸an hmêlma sala hruaitute rama an thinlung tak leh an rilru taka i lam an lo hawia, an pute i pêk ram lam leh, i khawpui thlan lam leh i hming tâna ka in sak lam hawia i hnêna an ṭawngṭai chuan,

⁴⁹an ṭawngṭaina leh an dîlna chu nangin i awmna vân aṭangin lo ngaithla la, an thu-ah che ang che;

⁵⁰tin, i mi i chunga thil tisualtute leh i laka an lo bawhchhiat kawnga an bawhchhiatna zawng zawng chu ngaidam la; sala hruaitute chuan anmahni an khawngaih theih nân khawngaihna neihtîr ang che,

⁵¹i mi, i rochan, Aigupta ram ata, thîr rawh tuina chhûng ata i hruai chhuahte an ni si a;

⁵²an auh apiang chea i lo ngaihthlâk tûra i chhiahhlawh dîlna leh, i mi Israel dîlna lama i mit i len theih nân.

⁵³Aw Lalpa PATHIAN, kan pute Aigupta ram ata i hruai chhuah laia i chhiahhlawh Mosia hmanga i sawi angin, i rochan atân khawvêl hnam tin zîng ata i tihrang a ni si a,” a ti a.

⁵⁴Tin, heti hi a ni a, Solomonan LALPA hnêna a ṭawngṭaina leh dîlna zawng zawng a chham zawh chuan, LALPA maichâm lama ṭhingṭhia, vân lam bana kut phara a awm chu a tho va.

⁵⁵Tin, a ding a, aw ring takin, “A thutiam zawng zawng ang zêla a mi Israel-te chawlhna petu LALPA chu fakin awm rawh se. A chhiahhlawh Mosia hmanga a thutiam ṭha zawng zawng kha thu pakhat mah a thlâwn lo va.

⁵⁶

⁵⁷LALPA kan Pathian chu kan pute hnêna a awm ang khân kan hnênah awm sela; min kalsanin, min thlahthlam suh se;

⁵⁸tichuan, a kawng zawng zawng zawh tûr leh, kan pute thu a pêk tawh anga a thupêkte, a thuruatte, a rorêlte pawm tûra kan thinlungte a lama a hawitîr theihna tûrin.

⁵⁹Tin, LALPA hi Pathian a ni a, tu mah dang an awm lo tih khawvêla hnam tinin an lo hriat theihna tûra a chhiahhlawh thu-ah leh, a mi Israel-te thu-ah hian a ni zir ang zêla a chêt theihna tûrin hêng ka thusawi, LALPA hmaa dîlna ka thlente hi chhûn leh zân LALPA kan Pathian hmaah chuan châm reng rawh se.

⁶⁰

⁶¹Chutichuan, a thuruat anga awm tûr leh a thupêkte zâwm tûrin LALPA kan Pathian lamah chuan in thinlungte ṭha famkim rawh se, vawiin ang hian,” tiin Israel pung khâwmho zawng zawng chu mal a sâwm a.

⁶²Tin, lal leh Israel-ho zawng zawng chuan LALPA hmaah inthawina an hlân za a.

⁶³Tin, Solomonan LALPA tâna a hlan remna thilhlan inthawi nân sebâwngpa sînghnih leh sânghnih leh, berâm nuai khat leh sînghnih a hlân a. Chutiang chuan lal leh Israela thlahte zawng zawng chuan LALPA in chu an hlân a ni.

⁶⁴Chumi ni vêkah chuan lalin LALPA in hma zâwna hung chhûng kawtlai tak chu a tithianghlim a, chutah chuan hâlral thilhlan te, chhangphut thilhlan te, remna thilhlan sa thau te chu a hlân a, LALPA hmaa dâr maichâm chu chûng thilhlante dawng tûra a têt luattuk avângin.

⁶⁵Chutichuan, chumi ṭum chuan Solomona leh Israel-ho zawng zawng, mipui pung khâwmho tam tak, Hamath khaw luhna achin Aigupta ram lui thlenga mite chu, LALPA kan Pathian hmaah chuan ni sarih leh ni sarih - ni sâwm leh ni li chhûng zet an kût za a.

⁶⁶A ni riat ni chuan mipuihote chu a ṭîntîr a; tin, lal chu mal an sâwm a, LALPAN a chhiahhlawh Davida leh a mi Israel-te chunga a ṭhatna chuti zozaia a lantîr avâng chuan rilru hlim leh lâwm takin an in lamah an haw ta a.