Read Mizo_Old_version LEHKHABU PAKHATNA LALTE 9 Bible Online

LEHKHABU PAKHATNA LALTE 9 - Mizo_Old_version bible

LEHKHABU PAKHATNA LALTE 9

¹Tin, heti hi a ni a, Solomonan LALPA in leh lal in a saka, Solomonan châk taka a tum zawng zawng a tih zawh vek hnuah chuan,

²Gibeon khuaa a hnêna a inlâr ang khân LALPA chu Solomona hnênah a rawn inlâr leh a.

³Tin, LALPA chuan a hnênah, “I ṭawngṭaina leh i dîlna ka hmaa i rawn thlente kha ka lo ngaithla a; hemi in i sak hi kumkhuaa ka hming awmtîr nân ka tithianghlim tawh e, ka mit leh ka thinlung chu chutah chuan a awm kumkhua tawh ang.

⁴Tin, nang pawh hi thu ka pêk apiang che anga ti tûra i pa Davida awm anga thinlung ṭha tak pu leh rilru dik tak pua ka mit hmuha i awma, ka thuruatte leh ka rorêlte i pawm reng zawngin,

⁵Israel-te chungah hian i ram lalṭhutthlêng chu kumkhua atân ka tinghet ang, i pa Davida hnêna, ‘Israel-te lalṭhutthlênga ṭhu tûr i hmai lo vang,’ tia ka lo tiam tawh ang khân.

⁶Amaherawhchu, nangin emaw, in thlahten emaw min zui chu min kîrsana, ka thupêkte leh ka thuruatte ka hriattîr che u hi in pawm lohva, pathian dangte rawng in va bâwla, in va biak chuan,

⁷Israel-hote hi ram ka pêk ata ka tiboral ang a; tin, hemi in, ka hming tâna ka tihthianghlim tawh sa hi ka mit hmuh phâk lohvah ka sawn bo daih ang. Tichuan, Israel-te hi hnam tinrêngte zîngah tihelna leh a chhe lam tehkhinnaah hman an la ni ang.

⁸Tin, he in hi sâng teh mah sela, a kal pêl apiangte chu mak tiin an la faifûk ang a, ‘Engati nge LALPAN he ram leh he in hi heti taka a tih le?’ an ti ang.

⁹Tin, miten, ‘LALPA an Pathian, an pute Aigupta ram ata hruai chhuaktu kha an kalsana, pathian dangte an vawna, an biaka, an rawng te an bâwl tâk vâng a ni; chuvângin, LALPAN hêng chhiatna zawng zawng hi an chungah a rawn thlentîr ta a nih hi,’ tiin an la chhâng ang,” a ti a.

¹⁰Tin, heti hi a ni a, Solomonan in pahnih, LALPA in leh lal in a sak chhûng, kum sawmhnih a vei hnuin

¹¹(Tura lal Hiraman Solomona chu sidar thing te, fâr thing te, rangkachak te a mamawh apiang a tum vek a ni a), Lal Solomona chuan Hirama chu Galili rama khaw sawmhnih a pe a.

¹²Tin, Hirama chu Tura khua aṭangin Solomonan khua a pêkte chu en tûrin a chhuak a; a duh zâwng a ni lo hle a.

¹³Tin, ani chuan, “Ka unaupa, hêng i khaw mi pêkte hi khaw eng nge maw ni ngai le?” a ti a. Tichuan, tûn thleng hian Kabul ram an ti ta a ni.

¹⁴Tin, Hirama chuan lal chu rangkachak talent 120 a thawn a.

¹⁵Lal Solomonan hnathawka rawih luih pâwl a siam chhan chu hei vâng hi a ni: LALPA in leh ama in satu atân leh, Milo te, Jerusalem kulh te, Hazor khua te, Megido khua te, Gezer khua te siamtu atân a ni.

¹⁶Aigupta lal Pharaoa chu a han chho va, Gezer khua a han la a, a hâl a, chu khuaa awm Kanaan-hote chu a that a, a fanu Solomona nupui hnênah inthlahna thilpêk atân a lo pe tawh a ni.

¹⁷Tin, Solomonan Gezer khua te, Beth-horon thlangta zâwk khua te,

¹⁸Baalath khua te, Israel rama thlalêra Tamar khua te,

¹⁹Solomonan thil dah khâwmna khua a neih zawng zawng te, a tawlailîr dahna khua te leh, a sakawr chung chuang mi dahna khua te, Jerusalem khua te, Lebanon-ah te leh a rorêlna ram chhûng zawng zawnga Solomonan châk taka siam a tum zawng zawngte chu a siam a ni.

²⁰Tin, Israela thlahte ni ve lo, Amor-hote, Hit-hote, Periz-hote, Hiv-hote, Jebus-ho la awm zawng zawngte kha chu,

²¹an thlah, chûng rama la awm Israela thlahten an tihboral zawh vek theih lohvate zîngah chuan Solomonan chhiahhlawh, hnathawka rawih luih pâwl a siam a, tûn thleng hian.

²²Israela thlahte erawh chu Solomonan chhiahhlawhah a siam ve lo va; indo mi te, a puipa te, a mi lian te, a sipai hotu te, a tawlailîr leh a sakawr chung chuang mi hotute an ni zâwk a ni.

²³Chûngte chu Solomona hna chunga hotu bîk zanga leh sawmnga, hnathawk vêngtute chu an ni.

²⁴Pharaoa fanu erawh chu Davida khawpui ata chu ama in, Solomonan a saksakah chuan a chho ta a; tichuan, Milo chu a siam ta a.

²⁵Tin, Solomona chuan LALPA tâna maichâm a siamah chuan kum tin vawi thum hâlral thilhlan leh remna thilhlan a hlân ṭhîn a, LALPA hmaa maichâmah chuan rimtuite a hâl tel bawk ṭhîn a. Chutichuan, in chu a peih ta a.

²⁶Tin, Lal Solomona chuan Edom rama Tuifinriat Sen kam Eloth bula awm Ezion-geber hmunah lawng rual a siam a.

²⁷Tin, Hiraman a chhiahhlawh lawng mite tuifinriata che ṭhang, lawnga Solomona chhiahhlawhte kalpuiah a tîr a,

²⁸Chung mite chu Ophir-ah an va kal a, chuta mi chu rangkachak talent zali leh sawmhnih an rawn hâwn a, Lal Solomona hnênah an rawn thlen a.