Read Mizo_Old_version LEHKHABU PAHNIHNA LALTE 1 Bible Online

LEHKHABU PAHNIHNA LALTE 1 - Mizo_Old_version bible

LEHKHABU PAHNIHNA LALTE 1

¹Tin, Ahaba thih hnuin Moab-ho chu Israel-te chungah an hel a.

²Tin, Ahazia chu Samari khuaa a pindan chungnung kawkalh tukverhah a tla thla a, a intina ta a; tichuan, mi a tîr a, an hnênah, “Kal ta ula, he ka nâ hi ka ṭha chhuak leh thei ang emaw Ekron khaw pathian Baal-zebuba va râwn teh u,” a ti a.

³Nimahsela, LALPA vântirhkohvin Tisbe mi Elija hnênah, “Tho la, Samari khaw lal mi tirhte lo be tûrin han kal la; tin, an hnênah, ‘Israel ramah hian Pathian a awm tâk loh vângin em ni Ekron khaw pathian Baal-zebuba chu râwn tûra in kal ni?

⁴LALPAN heti hian a ti a ni: “Khuma i kai kha i lo chhuk leh tawh lo vang a, i thi ngei ngei ang,” tiin,’ ti rawh,” a ti a. Tichuan, Elija chu a kal ta a.

⁵Tin, a mi tirhte chu a hnênah an lo lêt a, ani chuan an hnênah, “Engtizia nge in lo kîr leh mai?” a ti a.

⁶Tin, anni chuan a hnênah, “Mi pakhat min be tûrin a lo kal a, kan hnênah, ‘Kal ta ula, rawn tîrtu che u lal hnênah chuan kîr leh ta ula, a hnênah, “LALPAN heti hian a ti: Israel ramah hian Pathian a awm tâk loh vângin em ni Ekron khaw pathian Baal-zebuba chu râwn tûra i tirh ni? Chutichuan, khuma i kai kha i lo chhuk leh tawh lo vang a, i thi ngei ngei ang, tiin,” ti rawh,’ a ti a ni,” an ti a.

⁷Tin, ani chuan an hnênah, “Rawn be tûr che ua lo kal, chûng thu rawn hrilhtu che u chu mi eng ang nge ni?” a ti a.

⁸Tin, anni chuan an chhâng a, “Sahmul puana inthuam mi a ni a, a kâwng savun kâwnghrênin a hrêng,” an ti a. Tin, ani chuan, “Tisbe mi Elija a nih chu,” a ti a.

⁹Tichuan, lal chuan sipai sawmnga hotu, a hote sawmnga nên a hnênah a tîr ta a. Tin, a hnênah a han chho va; tin, ngai teh, ani chu tlâng chhîpah hian a lo ṭhu a. Tin, ani chuan, “Nang, Pathian mi, lalin, ‘Lo chhuk rawh,’ a ti e,” a ti a.

¹⁰Tin, Elija chuan a chhâng a, sipai sawmnga hotu hnênah chuan, “Pathian mi ka nih zet chuan vân ata mei lo tla thla sela, nangmah leh i hote sawmnga kha rawn kâng ral vek che u rawh se,” a ti a. Tichuan, vân ata mei a lo tla a, amah leh a hote sawmnga chu an kâng ral ta vek a.

¹¹Tin, a hnênah sipai sawmnga hotu dang, a hote sawmnga nên a tîr leh a. Ani chu a han chho va, a hnênah, “Nang Pathian mi, lalin, ‘Lo chhuk thuai rawh,’ a ti e,” a ti a.

¹²Tin, Elija chuan a chhâng a, an hnênah, “Pathian mi ka nih zet chuan vân ata mei lo tla thla sela, nangmah leh i hote sawmnga kha rawn kâng ral vek che u rawh se,” a ti a. Tichuan, Pathian mei chu vân ata a lo tla a, amah leh a hote sawmnga chu an kâng ral ta vek a.

¹³Tin, sipai sawmnga dang hotu, a hote sawmnga nên a tîr leh pek a. Tin, chu mi sipai sawmnga dang hotu chu a han chho va, Elija hmaah chuan a han ṭhingṭhi a, a hnênah, “Aw Pathian mi, ka nunna leh hêng i chhiahhlawh mi sawmngate nunna hi i mit hmuhah hian lo hlu teh se.

¹⁴Ngai teh, vân ata mei a lo tla a, sipai sawmnga hotute pahnih kha an hote sawmnga nên khân an lo kâng ral ta a; keia nunna erawh hi chu i mit hmuhah hian lo hlu teh se,” tiin a han ngen a.

¹⁵Tichuan, LALPA vântirhkoh chuan Elija hnênah, “A rual hian chhuk rawh, amah chu hlau suh,” a ti a. Tin, a tho va, lal hnênah an chhuk dûn ta a.

¹⁶Tin, ani chuan a hnênah, “LALPAN heti hian a ti: ‘Ekron khaw pathian Baal-zebuba râwn tûra mite i tirh vei hi, Israel ramah hian Pathian râwn tûr a awm tâk loh vâng em ni le? Chuvângin, khuma i kai kha i lo chhuk leh tawh lo vang a, i thi ngei ngei ang,’ tiin,” a ti a.

¹⁷Chutichuan, Elijan a sawi LALPA thu ang chuan Ahazia chu a thi ta a. Tin, fapa a neih loh avângin Juda lal Jehosaphata fapa Jehorama kum hnih a lal kum chuan Jehorama chu a aiawhin a lal ṭan ta a.

¹⁸Ahazia thiltih chanchin dangte chu Israel lalte lal lai thu ziakna buah a chuang a ni lâwm ni?