Read Mizo_Old_version LEHKHABU PAHNIHNA LALTE 11 Bible Online

LEHKHABU PAHNIHNA LALTE 11 - Mizo_Old_version bible

LEHKHABU PAHNIHNA LALTE 11

¹Ahazia nu Athalin a fapa a thi tih a lo hriat chuan, a tho va, lal fate zawng zawng chu a that vek a.

²Ahazia fapa Joasa erawh chu Lal Jorama fanu, Ahazia farnu Jehosebi chuan lal fapa an thahte zîng ata chu a hruai bo va, a enkawltu nên khum pindanah a awmtîr a, Athali hmuh theih loh tûrin an thukru a; tichuan, thah a ni ta lo va.

³Tin, ani chu amah nên chuan LALPA inah kum ruk an biru a; tichuan, Athali chuan chu ramah chuan ro a rêl ta a.

⁴Tin, a kum sarihnaah chuan Jehoiadan Kereth mite leh vêngtu sipaite zînga mi sipai za hotute chu a kohtîr a, LALPA inah a hnênah a hruai luhtîr a; tin, an hnênah thu a thlung a, LALPA inah chuan chhia a chhamtîr a, lal fapa chu a entîr hlawm a.

⁵Tin, ani chuan, “In tih tûr chu hetiang hi a ni: in zînga Chawlhnia lo kal tûrte hi hmun thuma ṭhena hmun khatin lal in chu in vêng ang a,

⁶hmun thuma ṭhena hmun khat chu Sur kulh kawngkaah in awm ang a, hmun thuma ṭhena hmun khat chu vêngtute hnung lama kulh kawngkaah in awm ang; chutiang chuan in chu in vêng ang a, a dangtuah in awm tûr a ni.

⁷In zînga pawl hnih, Chawlhnia ṭîn tûr zawng zawng chuan lal kiang velah LALPA in chu in vêng ang a.

⁸Tin, mi tinin hriamhrei kengin lal chu in hual vêl ang a; tu pawh hual chhûnga lo lût apiang chu lo thah zêl tûr a ni. Lal chu a lût leh a chhuak chu zui zêl rawh u,” tiin thu a pe a.

⁹Tin, sipai za hotute chuan puithiam Jehoiada thupêk ang zawng zawng chuan an ti a; tin, mahni hote ṭheuh Chawlhnia lo kal tûrte leh, Chawlhnia ṭîn tûrte chu an hruai a, puithiam Jehoiada hnênah an kal a.

¹⁰Tin, puithiam chuan sipai za hotute chu LALPA ina awm, Lal Davida fei leh phawte chu a pe a.

¹¹Tin, vêngtu sipaite chuan hriamhrei keng ṭheuhvin, in ding lampang aṭanga vei lampang thlengin, maichâm leh in hrûlah chuan lal chu an din hual mup a.

¹²Tichuan, lal fapa chu a rawn hruai chhuak a, lallukhum a khumtîr a, hriattîrna thu chu a pe a; tin, lalah an siam a, hriak an thih a; tin, an kut an bêng a, “Pathianin lalber humhim rawh se,” an ti a.

¹³Tin, vêngtu sipaite leh mipuihote thâwm chu Athalin a lo hriat chuan, LALPA inah mipuite zîngah chuan a va kal a.

¹⁴Tin, a han en a, ngai teh, lal chu dân angin ban hrûlah a lo ding a, sipai hotute leh tawtawrâwt tumtute chu lal bulah an ding a. Tin, chumi rama mi zawng zawng chu an hlim êm êm a, tawtawrâwt an hâm chiam a. Tichuan, Athali chuan a puante a pawt thlêr a, “Phiarrûkna! Phiarrûkna a ni ta le!” tiin a au va.

¹⁵Tin, puithiam Jehoiada chuan sipaite chunga hotua ruat sipai za hotute chu thu a pe a, an hnênah, “Sipaihote kârah chhuahtîr rawh u; tu pawh a zui apiang chu khandaiha sah hlum tûr a ni,” a ti a; puithiam chuan, “LALPA inah zawng thah tûr a ni lo ve,” a lo ti tawh si a.

¹⁶Chutichuan, kawng an kian a; tin, sakawr luhna kawngah lal inah a kal a; chutah chuan a ni, an thah tâk ni.

¹⁷Tin, Jehoiada chuan LALPA leh lal leh mipuite kârah chuan LALPA mite an lo nihna tûr thu a thlung ta a; lal leh mipuite kârah pawh.

¹⁸Tin, chumi rama mi zawng zawng chu Baala inah an kal a, an tichim a; a maichâmte leh a lemte chu an tisawm dep a, Baala puithiam Matana pawh maichâm bulah an that a. Tin, puithiam chuan LALPA in vêngtu hotute a ruat a.

¹⁹Tin, sipai za hotute, Kereth mite, vêngtu sipaite leh, chumi rama mi zawng zawng chu a hruai a, LALPA in ata lal chu an han hruai thla a, vêngtute kawngkaa lûtin lal inah an kal a. Tichuan, lalhote lalṭhutthlêngah a ṭhu ta a.

²⁰Chutichuan, chumi rama mi zawng zawng chu an lâwm a; tin, khawpui chu buai lovin a awm ta a; tin, Athali chu khandaihin lal inah an that a.

²¹Jehoasa chu ro a rêl ṭan lai chuan kum sarih mi a ni.