Read Mizo_Old_version LEHKHABU PAHNIHNA LALTE 13 Bible Online

LEHKHABU PAHNIHNA LALTE 13 - Mizo_Old_version bible

LEHKHABU PAHNIHNA LALTE 13

¹Juda lal Ahazia fapa Joasa kum sawmhnih leh kum thum a lal kum chuan, Jehua fapa Jehoahaza chu Israel-te chungah Samari khuaan a lal ṭan a, kum sâwm leh kum sarih a lal a.

²Tin, LALPA mit hmuha thil ṭha lo tak a ti ṭhîn a, Israel-hote thil tihsualtîra a tih Nebata fapa Jeroboama sualnate kha a chîng ve a, a kalsan leh ta lo.

³Tin, LALPA chu Israel-te chungah chuan a thinrim ta êm êm a; tichuan, Suria lal Hazaela kutah leh Hazaela fapa Benhadada kutah chuan a pe ta zêl a.

⁴Tin, Jehoahaza chuan LALPA hnênah a ngên chiam a; tin, LALPAN a thu chu a lo ngaihthlâksak a; Israel-te hnehchhiaha an awma, Suria lalin anmahni a hnehchhiahzia chu a hmu reng si a.

⁵Tichuan, LALPAN Israel-hote chu chhandamtu a pe a; chutichuan, Suria-hote hnuaia an awm chu an chhuak a, Israela thlahte chu tûn hma ang bawk khân anmahni in lamah an awm leh ta hle hle a.

⁶(Amaherawhchu, Israel-te thil tihsualtîra a tih Jeroboama chhûngteho sualnate kha an kalsan lo va, an la chîng ta reng zâwk a; tin, Samari khuaah chuan Aseri pawh chu a la awm reng nghe nghe a.)

⁷Jehoahaza chu a mite zînga sakawr chung chuang mi sawmnga leh, tawlailîr sâwm leh, sipai sîngkhat tih loh chu neih a phalsak si lo va; Suria lal chuan a tiboral vek a, vaivut chîl dip ang maiin a siam a ni.

⁸Tichuan, Jehoahaza chanchin dang te, a thiltih zawng zawng te, a thiltihtheihziate chu Israel lalte lal lai thu ziakna buah a chuang a ni lâwm ni?

⁹Tin, Jehoahaza chu a pi leh pute hnênah a muhîl ta a; tin, Samari khuaah an phûm a. Tin, a fapa Joasa chu a aiawhin a lal ta a.

¹⁰Juda lal Joasa kum sawmthum leh kum sarih a lal kum chuan Jehoahaza fapa Jehoasa chu Israel-te chungah Samari khuaan a lal ṭan a, kum sâwm leh kum ruk a lal a,

¹¹Tin, LALPA mit hmuha thil ṭha lo tak a ti ṭhîn a; Israel-te thil tihsualtîra a tih Nebata fapa Jeroboama sualna zawng zawngte kha a kalsan lo va, a la chîng ta reng zâwk a.

¹²Tichuan, Joasa chanchin dang te, a thiltih zawng zawng te, Juda lal Amazia a beih laia a thiltihtheihziate chu Israel lalte lal lai thu ziakna buah a chuang a ni lâwm ni?

¹³Tin, Joasa chu a pi leh pute hnênah a muhîl ta a; tin, Jeroboama chu a lalṭhutthlêngah a ṭhu a; tin, Joasa chu Samari khuaah Israel lalte zîngah an phûm a.

¹⁴Tin, Elisa chu a thihpuina tûr natnain a lo na tawh a; tichuan, Israel lal Joasa chu a hnênah a zuk kal a, a ṭah a, “Ka pa, ka pa, Israel-te tawlailîr leh sakawr chung chuang mite hentu,” a ti a.

¹⁵Tin, Elisa chuan a hnênah, “Thalngul leh thalte han la teh,” a ti a; tin, thalngul leh thalte a han la a.

¹⁶Tin, Israel-te lal hnênah chuan, “Thalngul kha han chelh teh,” a ti a; tichuan, a han chelh a. Tin, Elisa chuan lal kut chungah a kut a nghat a.

¹⁷Tin, ani chuan, “Chhak lam tukverh han hawng teh,” a ti a; tin, a han hawng a. Tin, Elisa chuan, “Kâp rawh,” a ti a; tin, a han kâp a. Tin, ani chuan, “LALPA hnehna thal, Suria-ho hnehna thal a nih kha; Aphek khuaah chuan Suria-hote chu boral dêr khawpin i hneh dâwn nia,” a ti a.

¹⁸Tin, “Thalte kha han la teh,” a ti leh a; tichuan, a han la a. Tin, Israel lal hnênah chuan, “Lei kha han chhun teh,” a ti a; tichuan, vawi thum a chhun a, a bâng ta mai a.

¹⁹Tichuan, Pathian mi chu a chungah a thinrim ta a, “Vawi nga vawi ruk lai i chhun tûr asin ni le; tichuan, Suria-hote chu boral dêr khawpin i hneh tûr a ni a. Amaherawhchu, Suria-ho chu vawi thum chauh i hneh dâwn a nih tâk hi,” a ti a.

²⁰Tin, Elisa chu a thi a, an phûm ta a. Tin, kum a lo vei hian Moab-ho pâwlte chuan an ram chu an rawn rûn ṭhîn a.

²¹Tin, mi pakhat an phûm dâwn lai takin heti hi a ni a, ngai teh, hmêlma pâwl pakhat an han hmu a; tichuan, chu mi chu Elisa thlânah chuan an thlâk ta mai a; tin, a ruang chuan Elisa ruhte chu a zuk deh veleh a lo nung leh a, a ding ta mai a.

²²Tin, Suria lal Hazaela chuan Jehoahaza chhanah chuan Israel-te chu a hnehchhiah reng a.

²³Nimahsela, LALPAN Abrahama hnênah te, Isaaka hnênah te, Jakoba hnênah te thu a thlun avângin anmahni chu a khawngaih a, a lainat a, a ngaihsak a, anmahni chu a tiboral duh lo va, a hnên ata a la paih thla duh lo cheu va.

²⁴Tin, Suria lal Hazaela chu a thi a; a fapa Benhadada chu a aiawhin a lal ta a.

²⁵Tin, Jehoahaza fapa Jehoasa chuan Hazaela fapa Benhadadan a pa Jehoahaza a rûna, khua a lâksakte kha a chhuhsak leh a. Joasa chuan vawi thum a hneh a, Israel ram khuate chu a la leh a.