Read Mizo_Old_version LEHKHABU PAHNIHNA LALTE 14 Bible Online

LEHKHABU PAHNIHNA LALTE 14 - Mizo_Old_version bible

LEHKHABU PAHNIHNA LALTE 14

¹Israel lal Joahaza fapa Joasa kum hnih a lal kum chuan Juda lal Joasa fapa Amazia a lal ṭan a.

²A lal ṭan tirh chuan kum sawmhnih leh kum nga mi a ni a, Jerusalem-ah kum sawmhnih leh kum kua a lal a; a nu hming chu Jehoadini, Jerusalem mi a ni.

³Tin, LALPA mit hmuha thil fel tak a ti ṭhîn a, a pu Davida erawh chu a tluk lo; a pa Joasa thiltih ang apiang a ti ve ṭhîn a.

⁴Amaherawhchu, hmun sângte zawng thehthang bo a ni chuang lo; hmun sângahte chuan mite chu an la inthawiin, rimtui an la hâl reng ṭhîn.

⁵Tin, a ram chu a han din ngheh veleh heti hi a ni a, a mite, a pa, lal thattute chu a that ve thung a.

⁶Amaherawhchu, chûng tualthattu fate chu a that lo; Mosia dân bua, “Fate avângin pate tihhlum tûr a ni lo va, pate avângin fate tihhlum tûr a ni hek lo, mi tin mahni sual avângin an thi tûr a ni,” tia LALPA thupêk dân ziak ang khân.

⁷Edom-ho chu Chi Ruamah sîngkhat a that a, Sela khua a bei a, a la a, a hmingah chuan Joktheel a ti a, tûn thlengin an la ti a ni.

⁸Tichuan, Amazian Israel lal Jehua fapa Jehoahaza fa Jehoasa hnênah, “Hawh teh, hmaichhanah i lo inen teh ang,” tiin mi a tîr a.

⁹Tin, Israel lal Jehoasa chuan Juda lal Amazia hnênah, “Lebanon tlânga hlîngin Lebanon tlânga sidar hnênah, ‘I fanu kha ka fapa nupuiah neihtîr teh khai,’ tiin a chah a; tin, Lebanon tlânga ramsa a lo kal a, hling chu a rawn chîl thlu ta dêr mai a.

¹⁰Nang hian Edom-ho chu i hneh ngei tak a, i rilru a lo chapo ta a nih hi. I chapo kha tawmpui hle hle mai rawh; nang leh Juda ram chawp chawpa chhiatna, i tâna ṭha lo tûr thil enga tân nge i cho chhuah dâwn ni?” tiin mi a tîr ve a.

¹¹Nimahsela, Amazia chuan a lo ngaithla duh lo va. Chutichuan, Israel lal Jehoasa chu a han chho va; Juda lal Amazia nên chuan Juda ram Beth-semes khuaah hmaichhanah an inen ta ngei a.

¹²Tin, Juda chu Israel-te lakah a lo tlâwm ta a; mi tin mahni in lamah an tlân haw ta ṭheuh va.

¹³Tin, Israel lal Jehoasa chuan Juda lal Ahazia fapa Jehoasa fa Amazia chu Beth-semes-ah chuan a man a, Jerusalem khuaah a kal a, Jerusalem kulh chu Ephraim kulh kawngka aṭanga kulh kil kawngka thlengin tawng zali zet a tichim a.

¹⁴Tin, LALPA ina mi leh lal ina ro dah khâwmnaa mi, rangkachak leh tangkarua leh bungbêl zawng zawng, a awm apiang a la a, hrênga tâng tûrte nên; tin, Samari khaw lamah a haw leh ta a.

¹⁵Tichuan, Jehoasa thiltih chanchin dang te, a thiltihtheihzia te, Juda lal Amazia a beih thute chu Israel lalte lal lai thu ziakna buah a chuang a ni lâwm ni?

¹⁶Tin, Jehoasa chu a pi leh pute hnênah a muhîl a, Samari khuaan Israel lalte zîngah an phûm a. Tichuan, a fapa Jeroboama chu a aiawhin a lal ta a.

¹⁷Juda lal Joasa fapa Amazia chu Israel-te lal Jehoahaza fapa Jehoasa thih hnuin kum sâwm leh kum nga a la dam a.

¹⁸Tichuan, Amazia chanchin dangte chu Juda lalte lal lai thu ziakna buah a chuang a ni lâwm ni?

¹⁹Tin, Jerusalem khuaah amah an phiarru a; tichuan, Lakis khuaah a tlân a; nimahsela, Lakis khuaah chuan mi an ûmtîr a, chutah chuan an that ta a.

²⁰Tin, a ruang chu sakawrin an kalpui a, a pi leh pute zîngan Davida khawpui Jerusalem-ah an phûm ta a.

²¹Tin, Juda mi zawng zawngten kum sâwm leh kum ruk mi, Azaria an hruai a, a pa Amazia aiah lalah an siam ta a.

²²Ani chuan Elath khua chu a siam ṭha leh a, Juda ramah a telh leh a, chumi hnuah chuan lal chu a pi leh pute hnênah a muhîl ta a.

²³Juda lal Joasa fapa Amazia kum sâwm leh kum nga a lal kum chuan Israel lal Joasa fapa Jeroboama chu Samari khuaah a lal ṭan a, kum sawmli leh kum khat a lal a.

²⁴Tin, LALPA mit hmuha thil ṭha lo tak a ti ṭhîn a; Israel-te thil tihsualtîrtu Nebata fapa Jeroboama sualna zawng zawng kha kalsan rêng a nei lo va.

²⁵LALPA, Israel-te Pathianin a chhiahhlawh, Gath-hepher mi Amittaia fapa zâwlnei Jona hmanga thu a sawi ang khân, Hamath luhna aṭanga Araba tuifinriat thlengin Israel ramah a telh leh a.

²⁶LALPAN Israel-te hrehawmzia chu a nasa êm êm mai tih a hre si a; khuahkhirh leh khirh lohte pawh an awm si lo va, Israel-te ṭanpuitu tûr tu mah an awm hek lo.

²⁷LALPAN Israel-te hming hi vân hnuaiah hian a tichimit hlauh dâwn tih zawng a sawi lo rêng a; Joasa fapa Jeroboama hmangin a chhandam ta zâwk a ni.

²⁸Tichuan, Jeroboama chanchin dang te, a thiltih zawng zawng te, a thiltihtheihzia te, a râl beih thu te, tûn hmaa Juda ram chan ni ṭhîn Damaska leh Hamath khua Israel-te tân a lo lâksak leh tâk thute chu Israel lalte lal lai thu ziakna buah a chuang a ni lâwm ni?

²⁹Tin, Jeroboama chu a pi leh pu, Israel lalte hnênah chuan a muhîl ve a. Tichuan, a fapa Zekaria chu a aiawhin a lal ta a.