Read Mizo_Old_version LEHKHABU PAHNIHNA LALTE 15 Bible Online

LEHKHABU PAHNIHNA LALTE 15 - Mizo_Old_version bible

LEHKHABU PAHNIHNA LALTE 15

¹Israel lal Jeroboama kum sawmhnih leh kum sarih a lal kum chuan Juda lal Amazia fapa Azaria a lal ṭan a.

²A lal ṭan tirh chuan kum sâwm leh kum ruk mi a ni a, Jerusalem-ah kum sawmnga leh kum hnih a lal a; a nu hming chu Jekoli, Jerusalem mi a ni.

³Tin, a pa Amazia thiltih ang apiang ti vein, LALPA mit hmuha thil ṭha tak a ti ṭhîn a.

⁴Amaherawhchu, hmun sângte zawng thehthang bo a ni chuang lo; hmun sângahte chuan mite chu an la inthawiin, rimtui an la hâl reng ṭhîn.

⁵Tin, LALPAN lal chu a rawn hrem ta a; chutichuan, a thih ni thlengin a lo phâr a, in hrangah a awm ta a. Tin, lal fapa Jothama chu an rama mite rorêlsakin in chhûng lam hotuah a awm ta a.

⁶Tichuan, Azaria chanchin dang, a thiltih zawng zawngte chu Juda lalte lal lai thu ziakna buah a chuang a ni lâwm ni?

⁷Tin, Azaria chu a pi leh pute hnênah chuan a muhîl a; tin, a pi leh pute zîngan Davida khawpuiah an phûm ta a. Tichuan, a fapa Jothama chu a aiawhin a lal ta a.

⁸Juda lal Azaria kum sawmthum leh kum riat a lal kum chuan Jeroboama fapa Zekaria chu Israel-te chungah Samari khuaan thla ruk a lal a.

⁹Tin, a pute tih ang bawk LALPA mit hmuha thil ṭha lo tak a ti ṭhîn a; Israel-te thil tihsualtîrtu Nebata fapa Jeroboama sualnate kha a kalsan lo va.

¹⁰Tin, Jabesa fapa Saluman amah a phiarru a, mipuite hmaah a bei a, a that a, a aiawhin a lal ta a.

¹¹Tichuan, Zekaria chanchin dangte chu ngai teh, Israel lalte lal lai thu ziakna buah chuan a chuang a ni.

¹²Chu chu LALPAN Jehua hnêna, “I fapate chu chhuan lina thlengin Israel-te lalṭhutthlêngah an ṭhu ang,” tih thu a sawi kha a ni. Tichuan, chutiang tak chu a lo ni ta ngei rêng a.

¹³Juda lal Uzia kum sawmthum leh kum kua a lal kum chuan Jabesa fapa Saluma chu a lal ṭan a; Samari khuaah thla khat chhûng a lal a.

¹⁴Tin, Gadia fapa Menahema chu Tirza khua aṭangin a han chho va, Samari khuaah a kal a, Jabesa fapa Saluma chu Samari khuaah chuan a bei a, a that a, a aiawhin a lal ta a.

¹⁵Tichuan, Saluma chanchin dang te, a phiarrûkna thute chu ngai teh, Israel lalte lal lai thu ziakna buah a chuang a ni.

¹⁶Chutichuan, Menaheman Tirza aṭang chuan Tipsa khua leh a chhûnga awm zawng zawng leh a ramte chu a bei a; an inhawn loh avângin a bei a ni; chûnga nau pai lai hmeichhia zawng zawng chu a pir thlêr a.

¹⁷Juda lal Azaria kum sawmthum leh kum kua a lal kum chuan, Gadia fapa Menahema chu Israel-te chungah a lal ṭan a, Samari khuaah kum sâwm a lal a.

¹⁸Tin, LALPA mit hmuha thil ṭha lo tak a ti ṭhîn a; Israel-te thil tihsualtîrtu Nebata fapa Jeroboama sualnate kha a dam chhûngin a kalsan lo.

¹⁹Assuria lal Pulan an ram chu a rawn bei a; ram chu a neih nghehpui theih nân Menahema chuan Pula chu tangkarua talent sâng a pe a.

²⁰Tin, Menahema chuan Assuria lal pêk atân Israel mi neinungho zawng zawng lakah chuan tangkarua sekel sawmnga ṭheuh a khawn a. Chutichuan, Assuria lal chu a haw leh a, chu ramah chuan a awm reng lo.

²¹Tichuan, Menahema chanchin dang te, a thiltih zawng zawngte chu Israel lalte lal lai thu ziakna buah a chuang a ni lâwm ni?

²²Tin, Menahema chu a pi leh pute hnênah a muhîl a. Tichuan, a fapa Pekahia chu a aiawhin a lal ta a.

²³Juda lal Azaria kum sawmnga a lal kum chuan Menahema fapa Pekahia chu Israel-te chungah Samari khuaan a lal ṭan a, kum hnih a lal a.

²⁴Tin, LALPA mit hmuha thil ṭha lo tak a ti ṭhîn a; Israel-te thil tihsualtîra a tih Nebata fapa Jeroboama sualnate kha a kalsan lo.

²⁵Tin, a sipai hotu Remalia fapa Pekan amah chu a phiarru a, Samari khuaa lal ina kulhah Argoba nên, Ariea nên a that ta a; a hnênah chuan Gilead mi sawmnga an awm ve a. Tichuan, Pekahia chu a that a, a aiawhin a lal ta a.

²⁶Tichuan, Pekahia chanchin dang te, a thiltih zawng zawngte chu ngai teh, Israel lalte lal lai thu ziakna buah chuan a chuang a ni.

²⁷Juda lal Azaria kum sawmnga leh kum hnih a lal kum chuan, Remalia fapa Peka chu Israel-te chungah Samari khuaan a lal ṭan a, kum sawmhnih a lal a.

²⁸Tin, LALPA mit hmuha thil ṭha lo tak a ti ṭhîn a; Israel-te thil tihsualtîrtu Nebata fapa Jeroboama sualnate kha a kalsan lo.

²⁹Israel lal Peka lal laiin Assuria lal Tiglath-pileseran Ijon khua te, Abel-beth-maaka khua te, Janoa khua te, Kedes khua te, Hazor khua te, Gilead leh Galili ram te, Naphtali ram zawng zawng chu a la a; tin, Assuria raman salah a hruai a.

³⁰Tin, Ela fapa Hosean Remalia fapa Peka chu a phiarru a, a bei a, a that a, Uzia fapa Jothama kum sawmhnih a lal kum chuan a aiawhin a lal ta a.

³¹Tichuan, Peka chanchin dang te, a thiltih zawng zawngte chu ngai teh, Israel lalte lal lai thu ziakna buah chuan a chuang a ni.

³²Israel lal Remalia fapa Peka kum hnih a lal kum chuan Juda lal Uzia fapa Jothama chu a lal ṭan a.

³³A lal ṭan tirh chuan kum sawmhnih leh kum nga mi a ni a; Jerusalem-ah kum sâwm leh kum ruk a lal a; a nu hming chu Jerusi, Zadoka fanu a ni.

³⁴Tin, a pa Uzia thiltih ang apiang ti vein LALPA mit hmuha thil ṭha tak a ti ṭhîn a.

³⁵Amaherawhchu, hmun sângte zawng thehthang bo a ni chuang lo; hmun sângahte chuan mite chu an la inthawiin, rimtui an hâl reng ṭhîn. LALPA in kawngka chhakta zâwk chu a siam ṭha a.

³⁶Tichuan, Jothama chanchin dang te, a thiltih zawng zawngte chu Juda lalte lal lai thu ziakna buah a chuang a ni lâwm ni?

³⁷Chûng lai chuan Suria lal Rezina leh, Remalia fapa Peka chu Juda-ho bei tûrin LALPAN a tîr ṭan ta a.

³⁸Tin, Jothama chu a pi leh pute hnênah a muhîl a, a pi leh pute zîngan a pu Davida khawpuiah an phûm ta a. Tichuan, a fapa Ahaza chu a aiawhin a lal ta a.