Read Mizo_Old_version LEHKHABU PAHNIHNA LALTE 16 Bible Online

LEHKHABU PAHNIHNA LALTE 16 - Mizo_Old_version bible

LEHKHABU PAHNIHNA LALTE 16

¹Remalia fapa Peka kum sâwm leh kum sarih a lal kum chuan Juda lal Jothama fapa Ahaza chu a lal ṭan a.

²Ahaza chu a lal ṭan tirhin kum sawmhnih mi a ni; tin, Jerusalem-ah kum sâwm leh kum ruk a lal a. A pu Davida angin LALPA a Pathian mit hmuha thil ṭha tak a ti ve lo va.

³Israel lalte kawng zawh chu a zawh ve a, a ni, LALPAN Israela thlahte hmaa a hnawh chhuah tâk hnamten thil tenawm tak an tih ṭhin angin a fapa meiah a luhtîr a.

⁴Tin, hmun sângah te, tlângah te, thing hring tin hnuaiahte a inthawi a, rimtui a hâl ṭhîn a.

⁵Tichuan, Suria lal Rezina leh Israel lal Remalia fapa Peka chu Jerusalem bei tûrin an han chho va, Ahaza chu an han hual a; nimahsela, an hneh thei lo va.

⁶Chûng lai chuan Suria lal Rezina chuan Elath khua chu Suria ram atân a la leh a, Juda-te chu Elath khua ata a hnawt chhuak a; tin, Suria-ho chuan Elath khua chu an va luah a, tûn thlengin an la awm a.

⁷Chutichuan, Ahaza chuan Assuria lal Tiglath-pilesera hnênah, “I chhiahhlawh leh i fapa ka ni alâwm. Mi bei tûra lo thawk Suria lal kut ata leh Israel lal kut ata hi mi han chhanchhuak teh khai,” tiin mi a tîr a.

⁸Tin, Ahaza chuan LALPA ina tangkarua leh rangkachak awm apiang, lal ina ro dah khâwmnaa mi nên a la a, Assuria lal hnênah lâwmmanah a thawn a.

⁹Tin, Assuria lal chuan a thusawi chu a lo pawm a; tichuan, Assuria lal chuan Damaska khua chu a han bei a, a la a, a mite chu Kir raman salah a hruai a, Rezina chu a that a.

¹⁰Tin, Lal Ahaza chu Assuria lal Tiglath-pilesera be tûrin Damaska khuaah a kal a, Damaska khuaa maichâm chu a va hmu a; tichuan, Lal Ahaza chuan chu maichâm lem leh an siam dân ang chiaha entawn tûr puithiam Urija hnênah a thawn a.

¹¹Tin, puithiam Urija chuan maichâm a han siam a; Lal Ahazan Damaska khua aṭanga a thawn ang chiah chuan puithiam Urija chuan Damaska khua aṭanga Lal Ahaza lo haw leh hmain a lo siam hman diam a.

¹²Tin, Damaska khua ata lal a lo thlenin lal chuan maichâm chu a han hmu a; tin, lal chuan maichâm chu a pan hnai a, a han lâwn chho va.

¹³Tin, maichâmah chuan a hâlral thilhlan te hâlin a chhangphut thilhlan te a hlân a, a in tûr thilhlan a leih a, a remna thilhlan te thisen chu a theh a.

¹⁴Tin LALPA hmaa dâr maichâm, a maichâm leh LALPA in inkâra mi, in hma zâwn ata chu a la sawn a, a maichâm hmâr lampangah chuan a dah ta a.

¹⁵Tin, Lal Ahaba chuan, “Maichâm lian puiah hian zîng hâlral thilhlan te, tlai lam chhangphut thilhlan te, lal hâlral thilhlan te, a chhangphut thilhlan te, kan rama mipui zawng zawng hâlral thilhlan te, an chhangphut thilhlan te, an in tûr thilhlante nên hian hâlin hlân la; tin, a chungah chuan hâlral thilhlan thisen zawng zawng leh inthawina thisen zawng zawng chu theh ang che. Dâr maichâm erawh chu ka biakna tûr a ni ang,” tiin puithiam Urija chu thu a pe a.

¹⁶Chutichuan, puithiam Urija chuan Lal Ahaza thupêk ang zawng zawng chuan a ti ta a.

¹⁷Tin, Lal Ahaza chuan hûnchhan khuarte chu a tichhia a, insilna bêl chu a dah sawn a; a hûnna dâr sebâwngpa ata te tuizêm chu a la thla a, lungrem chungah a hûng a.

¹⁸Tin, Chawlhni atâna chung nei kawng ina an siam leh pâwn lama lal luhna chu Assuria lal avângin LALPA inah a thlâkthleng ta hlauh va.

¹⁹Tichuan, Ahaza thiltih chanchin dangte chu Juda lalte lal lai thu ziakna buah a chuang a ni lâwm ni?

²⁰Tin, Ahaza chu a pi leh pute hnênah a muhîl a, a pi leh pute zîngan Davida khawpuiah an phûm ta a. Tichuan, a fapa Hezekia chu a aiawhin a lal ta a.