Read Mizo_Old_version LEHKHABU PAHNIHNA LALTE 17 Bible Online

LEHKHABU PAHNIHNA LALTE 17 - Mizo_Old_version bible

LEHKHABU PAHNIHNA LALTE 17

¹Juda lal Ahaza kum sâwm leh kum hnih a lal kum chuan Ela fapa Hosea chu Israel-te chungah Samari khuaan a lal ṭan a, kum kua a lal a.

²Tin, LALPA mit hmuha thil ṭha lo tak a ti ṭhîn a; amaherawhchu, a hmaa Israel lalte ang êm zawngin a ti lo.

³Assuria lal Salmaneseran a han rûn a; tichuan, Hosea chu a chhiah khuaah a awm ta a, chhiah te a pe ṭhîn a.

⁴Tin, Assuria lal chuan Hosean a phiar rûk thu a lo hria a, Aigupta lal Soa hnênah mi a tîr bawk a, kum tina a pêk ṭhin ang khân Assuria lal chu chhiah a pe ta bawk si lo va; chuvângin, Assuria lal chuan tân inah phuar chungin a khung ta a.

⁵Tichuan, Assuria lal chuan ram zawng zawng chu a hrût chhuak vek a, Samari khuaah a han chho va, kum thum a hual a.

⁶Hosea kum kua a lal kum chuan Assuria lal chuan Samari khua chu a la a, Israel-hote chu Assuria ramah a hruai a, Hala ramah te, Gozan rama Habor luiah te, Media-ho khuaahte a awmtîr a.

⁷Chutianga an lo awmna chhan chu Israela thlahte chuan Aigupta lal Pharaoa kut ata, Aigupta ram aṭanga hruai chhuaktu LALPA an Pathian chunga thil an tihsuala, pathian dangte an pawisak zâwka,

⁸LALPAN Israela thlahte hmaa a lo hnawh chhuah tâk hnamte thuruat leh Israel lalte pawm thuruatte anga an awm vâng a ni.

⁹Tin, Israela thlahte chuan LALPA an Pathian chungah chuan thil ṭha lo tak a rûkin an ti ṭhîn a, an khua zawng zawngah râlvêngtute in sâng aṭanga kulh nei khaw thlengin hmun sâng te an siam a.

¹⁰Tlâng sâng tinah leh thing hring tin hnuaiah hian lungphunte phunin, Aseri te an siam a.

¹¹Chûng hmun sâng zawng zawngah chuan LALPAN an hmaa a ûm bo tâk hnamte tih dân ang khân rimtuite an hâl ṭhîn a; LALPA tihthinrim nân thil sual tak an ti bawk ṭhîn a,

¹²LALPAN an hnêna, “Hetiang hi ti suh u,” a tih milemte rawng an bâwl bawk ṭhîn.

¹³ LALPA chuan, “Dân zawm tûr, in pi leh pute ka pêk leh ka chhiahhlawh zâwlneite hmanga ka hriattîr che u ang zêl chuan, in awm dân sual hi hawisan ula, ka thupêkte leh ka thuruatte chu pawm rawh u,” tiin, Israel-te leh Juda-te chu zâwlnei tin leh hmutheitu tin hmangin a hriattîr ṭhîn a.

¹⁴Chuti chung pawhin an pawm duh lo va, an pi leh pu, LALPA an Pathian ring duh lotute an intiluhlul angin an intiluhlul ve a.

¹⁵Tin, a thuruat te, an pi leh pute hnêna a thuthlun te, an hnêna a thuhriattîrte chu an pawisa duh lo va; thil lawilo mai mai an pawm a, engmahlo mai an lo ni ta a; an chungchâng thua LALPAN, “Ammahni ang chuan ti suh u,” a lo tih tawh, an kiang vêla hnamte tih dân an la ve a.

¹⁶Tin, LALPA an Pathian thupêk zawng zawng chu an hawisan a, bâwngno lem chhûn pahnih an siam a; tin, Aseri an siam a, vâna awm zawng zawng khi an bia a, Baala rawng an bâwl ṭhîn a.

¹⁷Tin, an fapate leh an fanute chu meiah an luhtîr a, aien te leh dawi te an chîng a, LALPA tihthinrim nâna a mit hmuha thil ṭha lo tak ti tûrin an inhralh a.

¹⁸Chu vâng chuan LALPA chu Israel-te chungah a thinrim ta êm êm a, a mit hmuh phâk lohvah a suan bo ta daih a; Juda hnam chauh lo chu awm an awm ta lo va.

¹⁹Juda-te pawh chuan LALPA an Pathian thupêkte chu an zâwm lo va, Israel-te pawm thuruatte angin an awm zâwk a.

²⁰Tin, LALPAN Israela thlahte rêng rêng chu a duh ta lo va, anmahni chu a tirethei a, a mit hmuh phâk lohva a suan bo daih hma loh chuan rawktute kutah a pe ta a.

²¹Israel-te chu Davida chhûngte an nihna a paihsak ta si a; tichuan, Nebata fapa Jeroboama kha lalah an siam a; tin, Jeroboama chuan Israel-ten LALPA an zui chu a lo kuai pêng a, thil sual nasa tak a tihtîr a.

²²Tin, Israela thlahte chuan Jeroboama thil tihsual ang zawng zawng chu an ti ve a; chûngte chu LALPAN a zâwlneite zawng zawng hmanga a lo sawi tawh anga a mit hmuh phâk lohva a suan bo daih hma loh chuan an kalsan lo va. Chutichuan, Israel-hote chu anmahni ram ata Assuria ramah an hruai ta a, tûn thlengin an la awm a ni.

²⁴Tin, Assuria lalin Babulon khuaa mite, Kutha khuaa mite, Ava khuaa mite, Hamath khuaa mite, Sepharvaim khuaa mite a chah chhuak a, Samari ram khuaahte chuan Israela thlahte hmun a luahtîr a; tichuan, Samari ram chu an luah a, a khuaahte chuan an awm ta a.

²⁵Tichuan, chuta an han awm tirh chuan heti hi a ni a, LALPA an ṭih lo va; chutichuan, LALPAN an zîngah sakeibakneite a tîr a, mi ṭhenkhat an seh a.

²⁶Chutichuan, Assuria lal hnênah, “I suanho hnamte, Samari ram khua i luhtîrte hian hêng lai ram Pathian biak dân hi an hre ve lo va; chu vâng chuan an zîngah sakeibakneite a tîr ta a; tin, ngai teh, hêng lai ram Pathian biak dân an hriat ve loh avângin an seh ṭhîn a ni,” tiin an sawi a.

²⁷Tichuan, Assuria lal chuan, “Khata sala in hruaite zînga mi puithiam pakhat hruai ula, lo awm ve sela, chu ram Pathian biak dân chu zirtîr rawh se,” tiin thu a pe a.

²⁸Chutichuan, Samari ram aṭanga an hruaite zînga puithiam pakhat chu Bethel khuaah a va awm a, LALPA an ṭih dân tûr a zirtîr a.

²⁹Nimahsela, hnam tin chuan mahni pathian thian an siam ṭheuh va, Samari miten hmun sâng an lo siam inahte chuan hnam tinin mahni awmna khua ṭheuhvah an dah a.

³⁰Babulon mite chuan Sukkoth-benoth an siam a; tin, Kuth-ho chuan Nergal an siam a; tin, Hamath-ho chuan Asima an siam a,

³¹Ava-ho chuan Nibhaz leh Tartak an siam a; tin, Sepharvaim-ho chuan Sepharvaim-ho pathian Adrammelek leh Anammelek hmingin an fate an hâl ṭhîn a.

³²Chutichuan, LALPA chu an ṭih a, an zînga mi hmun sâng puithiamahte an insiam a, hmun sâng inahte chuan mi an thawi ṭhîn a.

³³LALPA chu an ṭih a, an hruai chhuahna rama mite hnam tih dân angin anmahni pathiante rawng chu an bâwl ṭhîn a.

³⁴Tûn hma lama an tih dân angin tûn thlengin an la ti reng a ni; LALPA chu an ṭih lo va, LALPAN Jakoba thlah Israel-te tia a vuahte hnênah,

³⁵“Pathian dangte chu ṭih suh ula, anmahni chu chibai bûk suh ula, an rawng bâwl suh ula, an hnênah inthawi suh u;

³⁶LALPA, thiltihtheihna nasa tak leh bân phar meuhva Aigupta ram ata hruai chhuaktu che u amah chu in ṭih zâwk tûr a ni a, amah chu chibai in bûk tûr a ni a, ama hnênah in inthawi tûr a ni.

³⁷Tichuan, thuruat te, rorêl te, dân te, thupêkte a lo ziaksak tâk che u kha kumkhuain in pawm reng tûr a ni a; pathian dangte chu in ṭih tûr a ni lo.

³⁸Tin, in hnêna thu ka thlun hi in theihnghilh tûr a ni lo; pathian dangte in ṭih tûr a ni hek lo.

³⁹LALPA in Pathian erawh chu in ṭih tûr a ni; tichuan, in hmêlma zawng zawngte kut ata chu a chhanchhuak ang che u,” tia thu a thluna, an tâna LALPA thupêk te, thuruat te, rorêl te, dân siamte chu an zâwm hek lo.

⁴⁰Eng ti pawhin an pawm duh chuang lo va, tûn hma lama an tih dân angin an la ti reng a.

⁴¹Chutichuan, chûng hnamte chuan LALPA zawng an ṭih a, an milem siam chawpte rawng pawh an bâwl bawk a; chutiang bawkin an thlahte leh an thlahte thlah thleng pawhin, tûn thleng hian an pi leh pute tih angin an la ti reng a ni.