Read Mizo_Old_version LEHKHABU PAHNIHNA LALTE 18 Bible Online

LEHKHABU PAHNIHNA LALTE 18 - Mizo_Old_version bible

LEHKHABU PAHNIHNA LALTE 18

¹Tin, Ela fapa Israel lal Hosea kum thum a lal kum chuan heti hi a ni a, Juda lal Ahaza fapa Hezekia chu a lal ṭan a.

²A lal ṭan tirh chuan kum sawmhnih leh kum nga a ni; tin, Jerusalem-ah kum sawmhnih leh kum kua a lal a; a nu hming chu Abii, Zekaria fanu a ni.

³Tin, a pu Davida thiltih apiang ti vein LALPA mit hmuha thil ṭha tak a ti ṭhîn a.

⁴Hmun sângte a thehthang bo va, lungphunte a tichim a, Aseri te a kit a; tin, Mosia dâr rûl siamte chu a tikeh sawm vek a; chûng lai hun thleng chuan Israela thlahten a hnênah rimtui an hâl ṭhîn a ni; chu chu Nehustan an ti ṭhîn.

⁵Ani chuan LALPA, Israel-te Pathian chu a ring a; chutichuan, a hnua Juda lal zawng zawng zîngah amah ang tu mah an awm lo va, a hmaah pawh an awm hek lo.

⁶LALPA chu a vuan tlat a, amah a zui chu a bâng duh lo va, a thupêk LALPAN Mosia a pêkte chu a zâwm a.

⁷Tichuan, LALPA chu a hnênah a awm a; a chhuahvahna apiangah a hmuingîl zêl a. Assuria lal chungah a hel a, a rawng a bâwl ta lo va.

⁸Philistia-hote chu Gaza khaw thlengin a ram chin zawng zawng nên, râlvêngtute in sâng aṭanga kulh nei khaw thlengin a hneh vek a.

⁹Tin, Lal Hezekia kum li a lal kum, Israel lal Ela fapa Hosea kum sarih a lal kum chuan heti hi a ni a, Assuria lal Salmanesera chuan Samari khua a han bei a, a han hual a.

¹⁰Tin, kum thum a vei kumin an la ta a; Hezekia kum ruk a lal kum, Israel lal Hosea kum kua a lal kumin a ni, Samari khua chu an lâk ni.

¹¹Tin, LALPA an Pathian thu chu an pawm duh lohva, a thuthlung chu an bawhchhiat zâwka, LALPAN a chhiahhlawh Mosia thu a pêk zawng zawngte ngei kha an pawm duh lohva an tih duh loh avângin, Assuria lal chuan Israel-hote chu Assuria ramah a hruai a, Hala ramah te, Gozan rama Habor luiah te, Media-ho khuaahte a awmtîr ta a ni.

¹³Tin, Lal Hezekia kum sâwm leh kum li a kal kumin, Assuria ram lal Senakeriba chu Judai rama khua kulhpui nei zawng zawng bei tûrin a han chho va, a la ta a.

¹⁴Tin, Juda lal Hezekia chuan Lakis khuaa Assuria lal hnênah chuan, “Thil ka lo tisual ta a ni e; mi kiansan leh mai rawh; i mi tuk apiang chu ka pe zêl ang e,” tiin thu a thawn a. Tin, Assuria lal chuan Juda lal Hezekia chu tangkarua talent zathum leh rangkachak talent sawmthum a tuk a.

¹⁵Tichuan, Hezekia chuan LALPA ina tangkarua awm zawng zawng leh lal ina ro dah khâwmnaa mi zawng zawng chu a pe a.

¹⁶Chumi ṭum ngei chuan Hezekia chuan LALPA biak in kawngkhâra mi leh, Juda lal Hezekian bana rangkachak a luante chu a la thla vek a, Assuria lal a pe a ni.

¹⁷Tin, Assuria lal chuan Tartan te, Rabsari te leh Rabsake te sipai tam tak nên Lakis khua aṭangin Jerusalem khuaa Lal Hezekia hnênah chuan a tîr a. Tin, Jerusalem khua chu an han thleng a. Tin, an han thlen chuan Puansutu Phûl kalkawnga dîl chhakta zâwk tuilâkna kiangah chuan an ding a.

¹⁸Tin, lal chu an han auh chuan, in chhûng lam hotu Hilkia fapa Eliakima te, lehkhaziaktu Sebna te, chanchin ziaktu Asapha fapa Joa te chu an hnênah an va chhuak a.

¹⁹Tin, Rabsakea chuan an hnênah, “Hezekia hnênah han sawi rawh u khai, ‘Lal ropui tak Assuria lal chuan heti hian a ti: I rin i nghahna hi eng nge ni le?

²⁰Indona atân chuan remruat thiam leh chakna kan nei a ni, i ti a; nimahsela, chu chu ṭawngka mai a ni. Tu nge i rina ka chunga i hel tâk ni le?

²¹Ngai teh, he luang sâwp tiang, Aigupta hi i ring ta a ni a; chu chu miin a rinchhan chuan a kutah a chhun ang; Aigupta lal Pharaoa chu amah ringtu zawng zawng chungah chuan chutiang chu a ni ṭhîn.

²²A nih loh leh ka hnênah, “LALPA kan Pathian chu a ni kan rin ni,” in tih chuan, ani chu Hezekian Juda-ho leh Jerusalem-ho hnêna, “Jerusalem khuaa he maichâm hmaah hian in be tûr a ni,” tia a hmun sângte leh a maichâmte a lâk bosaka kha a ni lâwm ni?

²³“ ‘Chutichuan, ka pu Assuria lal nên chuan thu intiam rawh u khai; tichuan, sakawr sânghnih ka pe ang che, a chunga chuang tûrte i hmuh theih dâwn phawt chuan.

²⁴Engtin nge tawlailîrte leh sakawr chung chuang mite thu-ah Aigupta chunga i rinna nghatin, ka pu mite zînga tê ber hotu pakhat pawh hi i dan kîr zawh dâwn tehlul ni?

²⁵Tin, he ram hi LALPA thu lova tichhe tûra lo chho em ka nih? LALPAN chu ram chu han beia, tichhe tûrin min hrilh a ni,’ tiin,” a ti a.

²⁶Tin, Hilkia fapa Eliakima leh Sebna leh Joa-te chuan Rabsakea hnênah, “Khawngaih takin i chhiahhlawhte hi Suria ṭawngin min be tawh zâwk rawh, chu chu kan hre thei si a; kulh chunga mite beng hriatah hian Juda ṭawngin min be tawh suh,” an ti a.

²⁷Nimahsela, Rabsakea chuan an hnênah, “Ka pu chuan in pu hnên leh in hnên chauhvah hêng thu hi sawi tûrin mi tîr em ni? Kulh chunga ṭhuho, nangni leh anni, mahni êk la ei tûr leh mahni zun la in tûrte hnênah hian mi tîr bawk a ni lâwm ni?” a ti a.

²⁸Tin, Rabsakea chu a ding a, Juda ṭawngin aw ring takin a au va, “Lal ropui tak Assuria lal thu hi ngaithla rawh u.

²⁹Lal chuan heti hian a ti: Hezekia bumin awm suh u; ani chuan a kut ata a chhanhim thei dâwn si lo che u a;

³⁰Hezekia chuan, ‘LALPAN min chhanhim ngei ang a; tin, he khawpui hi Assuria lal kutah pêk a ni lo vang,’ tiin LALPA chu rintîr che u suh se.

³¹“Hezekia thu chu pawm suh u; Assuria lal chuan heti hian a ti a ni: ‘Min rem ula, ka hnênah hian lo chhuak rawh u; tin, nangmahni ram anga buh leh uain ram, chhang leh grêp huan ram, olive leh khawizu ram, thi lova in nun theihna tûr rama ka rawn hruai hma loh che u chuan mi tinin mahni grêp hruiha mi leh mi tinin mahni theipui kûnga mi ei ṭheuh ula, mi tinin mahni tuikhur tui tlân ṭheuh rawh u. Hezekian, LALPAN min chhanhim ang, tia a thlêm che u pawhin pawm duh suh u.

³³Hnam tinte pathian zawng zawng zînga mi rêng rêngin an ram chu Assuria lal lakah an chhanhim tawh ngai em ni?

³⁴Hamath leh Arpad pathiante kha khawiah nge an awm tâk? Sepharvaim te, Hena te, Iva te pathiante pawh kha khawiah nge an awm tâk? Samari khua kha ka lakah an chhanhim em ni?

³⁵Ram tin pathian zawng zawng zînga mi chuan tute nge an ram ka laka chhanhima, LALPA chuan Jerusalem khua hi ka lakah a han chhanhim tehlul ang?’ tiin,” a ti a.

³⁶Anni erawh chu an ngawi reng a, kam khat mahin an chhâng lo; lal thupêk dân chu, “Ani chu chhâng suh u,” tih a ni si a.

³⁷Chutichuan, lal in chhûng lam hotu Hilkia fapa Eliakima te, lehkhaziaktu Sebna te, chanchin ziaktu Asapha fapa Joa te chu an silhfên pawh thlêrte inbelin Hezekia hnênah chuan an kal a, Rabsakea thusawite chu an hrilh a.