Read Mizo_Old_version LEHKHABU PAHNIHNA LALTE 19 Bible Online

LEHKHABU PAHNIHNA LALTE 19 - Mizo_Old_version bible

LEHKHABU PAHNIHNA LALTE 19

¹Tin, Lal Hezekia chuan chu chu a hriatin heti hi a ni a, a silhfênte chu a pawt thlêr a, saiip puan a inbel a, LALPA inah chuan a lût ta a.

²Tin, in chhûng lam hotu Eliakima leh, lehkhaziaktu Sebna leh, puithiam upate chu saiip puan inbelin Amoza fapa zâwlnei Isaia hnênah a tîr a.

³Tin, anni chuan a hnênah, “Hezekian heti hian a ti: ‘Vawiin ni hi manganna leh zilhhauna leh hmingchhiatna ni a ni; nautê chu an pian a hun tawh si a, hring tûrin chakna a awm tawh si lo.

⁴A pu Assuria lalin Pathian nung sawichhe tûra a tirh Rabsakea thusawi zawng zawng chu LALPA i Pathian chuan a hria ang a, a thusawi, LALPA i Pathianin a hriata chu a la zilhhau mahna. Chumi avâng chuan a la awm chhunte chu ṭawngṭaisak rawh,’ a ti e,” an ti a.

⁵Chutichuan, Lal Hezekia mite chu Isaia hnênah an kal a.

⁶Tin, Isaia chuan an hnênah, “In pu hnênah heti hian sawi ang che u, ‘LALPA chuan heti hian a ti: “I thu hriat, Assuria lal miten mi sawichhiatnate kha hlau suh.

⁷Ngai teh, a kawchhûngah thlarau ka awmtîr ang a, thuthang a hria ang a, ama ramah a haw leh ang; tichuan, ama ram ngeiah khandaiha tihthlûkin ka awmtîr ang,” a ti e,’ tiin,” a ti a.

⁸Chutichuan, Rabsakea chu a kîr leh a, Assuria lal chuan Libna khua a lo beih lai a va hmu a; Lakis khua ata chu a chhuak tih a hre tawh rêng a ni.

⁹Tin, “Ngai teh, nangmah bei tûrin a chhuak ta,” tia Tirhaka, Ethiopia ram lal chungchâng thu mi sawi a lo hriat chuan Hezekia hnênah mite a tîr a,

¹⁰“Heti hian Juda lal Hezekia hnênah sawi ang che u: ‘I Pathian, i rina chuan, “Jerusalem khua chu Assuria lal kutah pêk a ni lo vang,” tiin bum che suh se.

¹¹Ngai teh, Assuria lalten ram zawng zawng tichhe veka a chunga an thiltihte kha i hria a; nang hi chhanhim i ni dâwn bîk em ni?

¹²Hnam tin pathiante chuan ka pi leh puten an tihboralte kha an chhanhim em ni? Gozan te, Haran te, Rezeph te, Eden fa Telasar khuaa awmte kha.

¹³Hamath lal te, Arpad lal te, Sepharvaim khawpui lal te, Hena lal te, Iva lal te kha khawiah nge an awm tâk?’ tiin,” a ti a.

¹⁴Tin, Hezekia chuan a mi tirhte kut ata lehkha chu a hmu a, a han chhiar a; tichuan, Hezekia chu LALPA inah chuan a han lût a, LALPA hmaah chuan a pharh a.

¹⁵Tin, Hezekia chu LALPA hmaah a ṭawngṭai a, “Aw LALPA, cherub-te chunga ṭhu Israela Pathian, nang, nang chauh hi leilung ram zawng zawng Pathian chu i ni; lei leh vân hi nangma siam a ni.

¹⁶Aw LALPA, i beng lo chhi la, ngaithla teh; Pathian nung sawichhe tûra Senakeriban thu a rawn sawi hi ngaithla teh.

¹⁷LALPA, Assuria lalten hnamte leh an ramte chu an tichhe ṭhîn tak a,

¹⁸an pathiante chu meiah an paih bawk ṭhîn a: chûngte chu pathian an ni lo rêng a, mihring kuta siam, thing leh lung an ni zâwk a. Chuvângin, an tiboral a ni.

¹⁹Chuvângin, aw LALPA kan Pathian, nang, nangmah chauh hi LALPA Pathian i ni tih leilung luah ram zawng zawng hian an hriat theih nân, a lakah hian min chhandam ngei ngei ang che,” tiin.

²⁰Chumi lai chuan Amoza fapa Isaia chuan Hezekia hnênah, “LALPA, Israela Pathian chuan heti hian a ti a ni: ‘Assuria lal Senakeriba chhiatna tûr lama ka hnêna i ṭawngṭai kha ka lo hria e,’ tiin.

²¹Hei hi a chungchâng thu LALPAN a sawi chu a ni: ‘Zion fanu nula chuan a hmusit chia, a nuihzatbûr che; Jerusalem fanu chuan a lu a thin khum che.

²²Tu nge i tihhmingchhiata, i sawichhiat? Tu chungah nge i aw i tihpâwra, i mit i lek sân? Israel-ho Mi Thianghlima chungah alâwm.

²³I mi tirhte hmangin Lalpa chu i tihmingchhia a, “Ka tawlailîr tam tak nên Lebanon ram ril tlâng sângte ka lo thleng chho ta a; chuta sidar thing sâng takte leh fâr thing ṭha ṭhate chu ka kit ang a; a lei ṭha hmun ramngaw, a chênna hmun ril berah chuan ka lût ang.

²⁴Ram dang tui ka lai chhuak a, ka tlân ṭhîn a, ka kephah hnuai hian Aigupta lui zawng zawng chu ka tikang vek ang,” i ti a.

²⁵Keiman hmânlai ata chûng chu ka tih a nihziate, hmasâng ata chûng chu ka siam a nihzia te i hre lo vem ni? Khaw kulh neite chu in chim khâwm ang maia tichhetu atân ka ruat ta che a nih hi.

²⁶Chu vâng chuan a chhûnga awmte chu chakna an nei lo va, an zâm a, an lo mualpho tâk kha; phûl hlobet ang leh, hnim hring ang leh, in chunga hlobet ang leh, buh a len hmaa thli em vuai ang an nih kha.

²⁷Kei chuan i ṭhut te, i luh leh i chhuah te, ka chunga i thinurte hi ka hria asin.

²⁸Ka chunga i thinur avâng leh, i ṭawng chaltlai chu ka bengah a lo luh chhoh tâk avâng hian ka hnârvuah chu i hnârah ka vuah ang a, ka thîrbarh chu i hmuiah, i lo kalna kawng ngeiah khân ka kîrtîr leh ang che,’ tiin.

²⁹“Tin, hei hi i tân chhinchhiahna a ni ang: kuminah buhhli in ring ang a, nakkumah a hli bawk; tin, a kum thumnaah chuan buhte tuh ula, ât ula, grêp huante siam ula, a rahte ei rawh u.

³⁰Tichuan, Juda chhûngte zînga la dam chhunte chuan a chhuk zâwngin zung an kai ang a, a chho zâwngin an rah leh ang.

³¹Jerusalem aṭangin a la awm chhunte, Zion tlâng aṭangin a la damte chu an chhuak dâwn a ni. LALPA ṭhahnemngaihna chuan chûng chu a ti ang.

³²Chuvângin, LALPA chuan Assuria lal chungchâng thu chu heti hian a sawi: ‘He khawpui hi a lo thleng lo vang a, hetah hian thal a kâp hek lo vang, phaw nên a kiangah a lo kal hek lo vang a, a khaw hrûlah lei an tiang pâwng hek lo vang.

³³A lo kalna kawngah, chumiah ngei chuan a lêt leh ang a, he khawpui hi a lo thleng lo vang.

³⁴Keimah avâng leh ka chhiahhlawh Davida avângin he khawpui hi chhanhim tûrin ka vêng dâwn a ni,’ LALPAN a ti,” tiin mi a tîr a.

³⁵Tichuan, chumi zân chuan heti hi a ni a, LALPA vântirhkoh chu a thawk chhuak a, Assuria-ho riahhmunah chuan mi nuai khat leh sîngriat leh sângnga a tihlum a; tin, zîng taka an han thawh chuan, ngai teh, mitthi ruang hlîr a lo ni ta mai a.

³⁶Chutichuan, Assuria lal Senakeriba chu a chhuak a, a lêt leh a, a kal leh ta zêl a, Ninevi khuaah chuan a awm ta a.

³⁷Tin, a pathian Nisroka inah chuan amah a biak laiin heti hi a ni a, a fapate Adrammeleka leh Sarezera-te chuan khandaihin an tihlum a; tichuan, Ararat ramah an tlân bo ta a. Tichuan, a fapa Esar-haddona chu a aiawhin a lal ta a.