Read Mizo_Old_version LEHKHABU PAHNIHNA LALTE 20 Bible Online

LEHKHABU PAHNIHNA LALTE 20 - Mizo_Old_version bible

LEHKHABU PAHNIHNA LALTE 20

¹Chûng lai chuan Hezekia chu thih ngamin a nâ a. Tichuan, Amoza fapa zâwlnei Isaia chu a hnênah a lo kal a, a hnênah, “LALPA chuan heti hian a ti: ‘I chhûngte awm dân tûr sawi rawh khai, i dam chhuak zo dâwn si lo va,’ tiin,” a ti a.

²Chutichuan, bang lam hawiin a let a, LALPA hnênah,

³“Aw LALPA, i hmaah thutak leh thinlung ṭha famkim pua ka awm ṭhinzia leh, i mit hmuha thil ṭha ka tih ṭhinzia kha khawngaih takin hre reng ang che,” tiin a ṭawngṭai a. Tin, Hezekia chu a ṭap ta zawih zawih a.

⁴Tin, Isaia chuan khawpui lai tak pawh chu a thlen hmain heti hi a ni a, LALPA thu a hnênah a lo thleng a,

⁵“Kîr leh la, ka mite hotu Hezekia hnênah sawi rawh, ‘LALPA, i pu Davida Pathian chuan heti hian a ti: “I ṭawngṭaina kha ka hria a, i mittui tla pawh ka hmu e; ngai teh, ka tidam ang chia, ni thum niah chuan LALPA inah i han kal ang.

⁶Tin, i dam chhûng kumte hi kum sâwm leh kum ngain ka tisei ang a; tin, nang leh he khawpui hi Assuria lal lakah ka chhanhim ang a; tin, keimah avâng leh ka chhiahhlawh Davida avângin he khawpui hi ka hum ang,” a ti,’ tiin,” a ti a.

⁷Tin, Isaian, “Theipui rah khâwn khat han la rawh u” a ti a. Tichuan, an rawn la a, khawihliah chuan an bel a, a lo dam leh ta a.

⁸Tin, Hezekia chuan Isaia hnênah, “LALPAN mi tidam ang a, LALPA inah a ni thum niin ka han kal ang tih chhinchhiahna eng nge ni ang?” a ti a.

⁹Tin, Isaian, “LALPAN a thil sawi hi a ti ngei dâwn tih hei hi i tân LALPA laka chhinchhiahna tûr chu a ni ang: hlim chu rahka sâwm thlenga a tawlh chhoh nge i duh rahka sâwm thlenga a tawlh kîr?” a ti a.

¹⁰Tin, Hezekia chuan a chhâng a, “Hlim chu rahka sâwm thlenga a tawlh chhoh chu a awl êm a, chu zawng ni lo ve, hlim chu rahka sâwm thlengin tawlh kîr zâwk rawh se,” a ti a.

¹¹Tichuan, zâwlnei Isaia chuan LALPA a han au va; tin, Ahaza dâr chin hriatnaa hlim hniam tawh chu rahka sâwm thlengin a tikîr leh ta a.

¹²Chumi lai chuan Baladana fapa Babulon lal Merodak-baladana chuan lehkhate leh lâwmpuinate Hezekia a thawn a, Hezekia chu a nâ tih a hriat avângin.

¹³Tichuan, Hezekia chuan anni chu a lo lâwm a, a thil hlu dahna in zawng zawng te, tangkarua te, rangkachak te, englo rimtui te, hriak hlu tak te, a râlthuam dahna in chhûng te, a ro awm zawng zawngte chu a entîr a. A ina mi leh a ram chhûnga mi Hezekian a entîr loh rêng rêng a awm lo.

¹⁴Chumi lai chuan zâwlnei Isaia chu Lal Hezekia hnênah a kal a, a hnênah, “Kha mite khân eng nge an sawi? Khawi aṭangin nge i hnênah an lo kal?” a ti a. Tin, Hezekia chuan, “Ram hla tak, Babulon aṭangin an lo kal a ni,” a ti a.

¹⁵Tichuan, ani chuan, “I inah hian eng eng nge an hmuh?” a ti a. Tin, Hezekia chuan, “Ka in chhûnga awm zawng zawng chu an hmu vek a, ka ro zînga mi ka entîr loh rêng rêng a awm lo,” tiin a chhâng a.

¹⁶Tin, Isaia chuan Hezekia hnênah chuan, “LALPA thu hi lo ngaithla rawh khai:

¹⁷‘Ngai teh, i in chhûnga awm zawng zawng leh vawiin thlenga i pi leh puten an lo khâwl khâwmte chu Babulon khuaa an kalpui nite a lo la thleng ang; eng mah rêng rêng hnutchhiah a awm lo vang,’ LALPAN a ti.

¹⁸‘Tin, i rîla rah, i hrin tûr, i fate ngei zînga mi pawh an kal bopui ang a; Babulon lal inah chuan mi tilreh an la ni ang,’ a ti,” a ti a.

¹⁹Tichuan, Hezekia chuan Isaia hnênah, “I sawi LALPA thu hi a ṭha e,” a ti a. Tin, “Ka dam chhûng hian remna leh thutak a awm dâwn phawt chuan,” a ti leh nghâl a.

²⁰Tichuan, Hezekia chanchin dang te, a thiltihtheihzia zawng zawng te, dîl leh tuilâkna a siama, khawpui chhûnga tui a lâk luh thute chu Juda lalte lal lai thu ziakna buah a chuang a ni lâwm ni?

²¹Tin, Hezekia chu a pi leh pute hnênah a muhîl ta a. Tichuan, a fapa Manasea chu a aiawhin a lal ta a.