Read Mizo_Old_version LEHKHABU PAHNIHNA LALTE 24 Bible Online

LEHKHABU PAHNIHNA LALTE 24 - Mizo_Old_version bible

LEHKHABU PAHNIHNA LALTE 24

¹A lal lai chuan Babulon lal Nebukadnezzara a lo lian a, Jehoiakima chu chhiah khuaah kum thum a awm a; chumi hnuah chuan a hawisan a, a chungah a hel ta a.

²Tin, LALPAN Kaldai pâwl tê te, Suria pâwl tê te. Moab pâwl tê te, Amona thlah pâwl tê te amah bei tûrin a tîr chhuak a; a chhiahhlawh zâwlneite hmanga a sawi LALPA thu angin Judai ram tihchhiattîr tûrin a tîr a.

³Manasea thiltih zawng zawng, a thil tihsual leh pawi khawih lo thisen a chhuaha, Jerusalem chu pawi khawih lo thisena a tihkhah avângin, a hmuh phâk lohva suan bo tûr thu Juda chungah LALPA thuin a lo thleng ta ngei a, LALPAN a ngaidam duh lo a ni.

⁵Tichuan, Jehoiakima chanchin dang leh a thiltih zawng zawng chu Juda lalte lal lai chanchin ziakna buah a chuang a ni lâwm ni?

⁶Chutichuan, Jehoiakima chu a pi leh pute hnênah a muhîl a. Tin, a fapa Jehoiakina chu a aiawhin a lal ta a.

⁷Tin, Aigupta lal chu a ram ata a lo chhuak leh ta lo va, Babulon lal chuan Aigupta ram luitê aṭanga Euphrates lui thlenga Aigupta lalram huam zawng zawng a la tawh si a.

⁸Jehoiakina chu a lal ṭan tirhin kum sâwm leh kum riat a ni a; Jerusalem-ah thla thum a lal a. A nu hming chu Nehusti, Jerusalem khuaa Elnathana fanu a ni.

⁹Tin, a pa tih dân ang zawng zawng tiin, LALPA mit hmuha thil ṭha lo tak a ti ṭhîn a.

¹⁰Chutih lai chuan Babulon lal Nebukadnezzara mite chu Jerusalem-ah an han chho va, khua chu an han hual ta a.

¹¹Tin, chutia a miten an han hual lai chuan Babulon lal Nebukadnezzara chu khuaah a han kal a;

¹²tichuan, Juda lal Jehoiakina chu a nu te, mi te, a mi lian te, a puipate nên chuan Babulon lal hnênah an va chhuak a; tin, a lal kum riat kumin Babulon lal chuan a man a.

¹³Tin, LALPA sawi ang khân LALPA ina ro zawng zawng leh lal ina ro zawng zawng chu a la chhuak a, LALPA biak ina Israel-te lal Solomonan rangkachak bungbêl a siam zawng zawng chu a sât sawm vek a.

¹⁴Tin, Jerusalem-a mi zawng zawng - mi lian zawng zawng te, mi chak huaisen ṭha zawng zawng te, sîngkhat zet, mi themthiam leh thîrdêng zawng zawng nên a hruai vek a; chumi rama mi, a rethei theite tih loh chu tu mah an awm tawh lo.

¹⁵Tin, Jehoiakina chu Babulon-ah a hruai a. Lal nu te, lal nupui te, a puipa te, chumi rama mi chakte chu Jerusalem aṭangin Babulon-ah salah a hruai a.

¹⁶Tin, Babulon lal chuan pasalṭha zawng zawng sângsarih zet leh, themthiam leh thîrdêng sângkhat, mi chak ṭha zawng indo thei mi ṭhiau chu Babulon-ah salah a hruai vek a.

¹⁷Tin, Jehoiakina pa unau Matania chu Babulon lal chuan a aiah a laltîr a, a hming chu Zedekia tiin a thlâksak a.

¹⁸Zedekia chu a lal ṭan tirhin kum sawmhnih leh kum khat a ni a; Jerusalem-ah kum sâwm leh kum khat a lal a. A nu hming chu Hamutali, Libna khuaa Jeremia fanu a ni.

¹⁹Tin, Jehoiakima tih dân ang zawng zawng tiin, LALPA mit hmuha thil ṭha lo tak a ti ṭhîn a.

²⁰LALPA thinurna avângin a hmuh phâk lohva a thehthang bo thlengin, Jerusalem leh Juda chungah thil a lo thleng zêl a ni. Zedekia chu Babulon lal chungah chuan a hel ta a.