Read Mizo_Old_version LEHKHABU PAHNIHNA LALTE 3 Bible Online

LEHKHABU PAHNIHNA LALTE 3 - Mizo_Old_version bible

LEHKHABU PAHNIHNA LALTE 3

¹Tin, Juda lal Jehosaphata kum sâwm leh kum riat a lal kumin, Ahaba fapa Jehorama chu Israel-ho chungah Samari khuaah a lal ṭan a; tin, kum sâwm leh kum hnih a lal a.

²Tin, LALPA mit hmuhah thil ṭha lo tak a ti ṭhîn a; amaherawhchu, a nu leh a pa ang êm zawngin thil a ti lo; ani zawngin a pain Baala lung a lo phun kha a paih a ni.

³Nimahsela, Israel-hote thil tihsualtîra a tih Nebata fapa Jeroboama sualnaahte chuan a bet tlat a; a kalsan leh tawh lo.

⁴Moab lal Mesa chu berâm vulh mi a ni a; ani chuan Israel lal lakah berâmno nuai khat hmul leh berâmpa nuai khat hmul chhiahah a chawi ṭhîn a.

⁵Amaherawhchu, Ahaba thih hnu chuan heti hi a ni a, Moab lal chu Israel lal chungah a hel ta a.

⁶Tin, chutih lai chuan Lal Jehorama chu Samari khua ata a chhuak a, Israel-ho zawng zawng chu a khâwm vek a.

⁷Tichuan, a chhuak a, Juda lal Jehosaphata hnênah, “Moab lal ka chungah a hel a, Moab-ho mi han beihpui duh ang emaw chu?” tiin mi a tîr a. Tin, ani chuan, “Han beihpui e a; kei leh nang, ka mite leh i mite chu pumkhat kan ni a, ka sakawrte leh i sakawrte chu pumkhat an ni alâwm,” a ti a.

⁸Tin, amah vêk chuan, “Khawi lam kawngah nge kan han kal ang?” a ti a. Tin, ani chuan a chhâng a, “Edom thlalêr lam kawngah le,” a ti a.

⁹Chutichuan, Israel lal chu Juda lal nên, Edom lal nên an kal ta a, ni sarih an kal kual a; tin, sipaihote leh an sa hruaite in tûr tui a awm lo va.

¹⁰Tin, Israel lal chuan, “E khai aw! LALPAN lal pathumte hi Moab-ho kuta pêk tûrin min hruai khâwm a ni ngei mai le,” a ti a.

¹¹Nimahsela, Jehosaphata chuan, “Hetah hian LALPA min râwnsak tûr LALPA zâwlnei tu emaw tal an awm lâwm ni?” a ti a. Tin, Israel lal chhiahhlawh pakhat chuan a chhâng a, “Elija kut tuia leih thîntu Saphata fapa Elisa hetah hian a awm asin,” a ti a.

¹²Tin, Jehosaphata chuan, “A hnênah chuan LALPA thu a awm mai chu,” a ti a. Chutichuan, Israel lal leh Jehosaphata leh Edom lal chu a hnênah an zuk kal ta a.

¹³Tin, Elisa chuan Israel lal hnênah chuan, “Nang leh keiin inhmanna eng nge kan neih le? I pa zâwlneite hnênah leh i nu zâwlneite hnênah kal daih tawh,” a ti a. Tin, Israel lal chuan a hnênah, “Kal lo ve; lal pathumte hi Moab-ho kuta pêk tûrin LALPAN min hruai khâwm a nih hi,” a ti a.

¹⁴Tin, Elisan, “A bula ka awm ṭhinna sipaihote LALPA nunna chhâlin ka sawi e, Juda lal Jehosaphata hi zah lo ni ila chuan i lam pawh ka hawi duhin, hmuh pawh ka hmu duh hlek lo tûr che a nia le.

¹⁵Eng pawh ni sela, ṭingṭang tum thiam mi han koh ta che u,” a ti a. Tin, ṭingṭang tum thiamin a han tum chuan, heti hi a ni a, LALPA kut chu a chungah a lo awm ta a.

¹⁶Tin, ani chuan, “LALPAN heti hian a ti: ‘Hemi ruam zawng zawng hi lai khuar thliah rawh u,’ tiin.

¹⁷LALPA vêkin heti hian a ti a ni: ‘Thli rêng rêng in hre lo vang a, ruah rêng rêng pawh in hmu hek lo vang; nimahsela, hemi ruam hi tuiin a khat vek ang; tichuan, nangni leh in ran rualte leh in sate hian in tlân ang,’ tiin.

¹⁸Chu chu LALPA ngaih chuan thil tê tham mai a ni a; Moab-ho hi in kutah a pe bawk dâwn a ni.

¹⁹Tin, kulhpui nei khua zawng zawng leh khawpui ṭha zawng zawng chu in tichhia ang a, thing ṭha zawng zawng chu in kit ang a, tuikhur zawng zawng chu in hnawh ping ang a, hmun ṭha lai zawng zawng chu lungin in vawm chhe vek ang,” a ti a.

²⁰Tin, zîngah, thil hlan hun vêl lai chuan heti hi a ni a, ngai teh, Edom ram lam aṭangin tui a lo luang chiam a, a ram chu tuiin a lo khat ta a.

²¹Tin, Moab-ho zawng zawng chuan anmahni bei tûrin lalho an lo thawk chho tih an lo hriat chuan, râlkai chin zawng zawng an inko khâwm chiam a, ramriah an lo ṭang a.

²²Tichuan, zîng takah an tho va, niin tui chu a zuk chhun a; tin, Moab-ho chuan an zâwna tui chu thisen ang maia sen kûkin an han hmu a.

²³“Thisen a nih saw, lalho hi anmahni leh anmahni an indo va, anmahni leh anmahni an inthat a ni ngei mai le; hawh u, Moab-hote u, râllâk sum i va chuh ang u,” an ti a.

²⁴Tin, Israel-ho riahhmun an va thlen chuan, Israel-ho chu an tho phut mai a, Moab-ho chu an bei a; tichuan, an hmaah an tlânchhe ta chiam a; tin, Moab-ho that chung zêlin an ramah an ûm lût a.

²⁵Tin, khuate chu an tichhia a; an hmun ṭha lai zawng zawng chu mi tinin an vawm a, lungin a khat ta vek a; tin, tuikhur zawng zawng an hnawh ping a, thing ṭha zawng zawng an kit a; Kir-hareseth khuaa mi chauh a ni, lung chu an khawih loh ni; chu pawh chu virvawma vawm miin an hual a, an bei a.

²⁶Tin, Moab lal chuan an indo chu chelh dâwnin a inhre ta lo va, Edom lal hnên thleng tûra tâwn tlang tumin khandaih keng mi zasarih a hruai chhuak a; nimahsela, an thei ta lo va.

²⁷Tichuan, a fapa upa ber, a aia la lal tûra chu kulh tlângah chuan hâlral thilhlanah a hmang ta a. Tin, Israel-hote chu an thinrim ta êm êm mai a, an kîrsan a, an ram lamah an haw leh ta a.