Read Mizo_Old_version LEHKHABU PAHNIHNA LALTE 5 Bible Online

LEHKHABU PAHNIHNA LALTE 5 - Mizo_Old_version bible

LEHKHABU PAHNIHNA LALTE 5

¹Suria lal sipai hotu Naamana chu LALPAN Suria-hote chhanhimtua a hman ṭhin avângin, a pu ngaiha ropui leh mi zahawm tak a ni a; amah chu mi chak huaisen a ni bawk a, phâr a ni pawh a.

²Suria-hote chu a pâwl pâwlin an rammu a, Israel ram aṭangin hmeichhe naupang tê hi salah an rawn hâwn a; ani chuan Naamana nupui rawng a bâwl ṭhîn a.

³Tin, ani chuan a pi hnênah, “Ka pu hi Samari khuaa zâwlnei hmaah va kal sela ka va ti êm ve aw! A phâr hi a lo tidam mai tûr a,” a ti a.

⁴Tin, Naamana chu a va lût a, “Israel rama hmeichhe naupang tê khân chutiang khatiang chuan a ti e,” tiin a pu chu a hrilh a.

⁵Tin, Suria lal chuan, “Va kal tak rawh khai, Israel lal hnênah lehkha ka thawn ang e,” a ti a. Tichuan, a chhuak ta a, tangkarua talent sâwm leh, rangkachak tlang sângruk leh silhfên inthlâkna tûr sâwm a keng a.

⁶Tin, “He lehkha hi i lo hmu ang a, ngai teh, ka puipa Naamana hi a phâr i lo tihdamsak tûrin i hnênah ka rawn tîr a ni e,” tihna lehkha chu Israel lal a va pe a.

⁷Tin, Israel lalin chu lehkha chu a han chhiar chuan heti hi a ni a, a puan a pawt thlêr a, “Mite tihlum theia, tinung leh thei ṭhîn Pathian em ka niha, he mi hian phâr tidam tûra ka hnêna a rawn tirh ngawt mai hi le? Ngaihtuah ula, ka chungah remchâng a zawng a ni tih hre rawh u khai,” a ti a.

⁸Tin, Pathian mi Elisan Israel lalin a puan a pawt thlêr tih a lo hriat chuan, heti hi a ni a. “Eng vângin nge i puan i pawh thlêr? Ka hnênah lo kal ang hmiang; tichuan, Israel ramah hian zâwlnei a awm tih a hre mai ang chu,” tiin lal hnênah mi a tîr a.

⁹Chutichuan, Naamana chu a sakawrte nên, a tawlailîrte nên chuan a va kal a, Elisa in kawngka bulah chuan a va ding a.

¹⁰Tin, Elisa chuan, “Jordan luiah vawi sarih va inbual la, i tisa ngai i pu leh ang a, i lo thianghlim tawh ang,” tiin mi a tîr a.

¹¹Nimahsela, Naamana chu a thinrim ta hle mai a, a kal leh ta a, “Ngai teh u, amah ngei chu ka hnênah a lo chhuak ang a, a lo ding ang a, LALPA a Pathian hming chu a han lam ang a, a phâr lai chunga a kut thênin phâr hi a han tidam dâwn emaw ka ti asin le.

¹²Damaska khaw lui Abana te, Pharpar te chu Israel ram lui zawng zawng aiin a ṭha zâwk lo vem ni? Chûngah chuan inbualin ka intithianghlim thei lo vem ni?” a ti a. Chutichuan, a lehhawi a, thinrim zetin a kal ta a.

¹³Tin, a chhiahhlawhte chuan an va hnaih a, an va bia a, “Ka pa, zâwlnei khân thil khirhkhân tak tihtîr dâwn ta che sela, i ti mai dâwn lâwm ni? ‘Va inbual la, va intithianghlim rawh,’ i hnêna a han ti kha tih zâwk âwm tak a ni lâwm ni le?” an ti a.

¹⁴Tichuan, a zuk chhuk a, Pathian mi sawi ang chuan Jordan luiah vawi sarih a zuk inhnim a; tin, a tisa chu nausên tisa ang mai a lo ni leh a, a lo thianghlim ta a.

¹⁵Tin, amah leh a hote zawng zawng nên chuan Pathian mi awmna lamah an kîr leh a, a hmaah an va ding a; tin, ani chuan, “Ngai teh hei, Israel ramah ngawt lo chuan leilung zawng zawngah hian Pathian a lo awm lo ve tih ka hre ta; chutichuan, i chhiahhlawh lâwmman hi la teh khai,” a ti a.

¹⁶Nimahsela, ani chuan, “A bula ka awm ṭhinna LALPA nunna chhâlin ka sawi e, eng mah hi ka la lo vang,” a ti a. Tichuan, la tûrin a thlêm chiam a; nimahsela, a duh lo tlat a.

¹⁷Tin, Naamana chuan, “A nih loh leh, i chhiahhlawh hi sabengtung pahnih phur lei mi lâktîr rawh khai; tûn achinah zawng i chhiahhlawh hian LALPA hnênah ngawt lo chuan, hâlral thilhlan leh inthawina rêng rêng hi, pathian dangte hnênah ka hlân dâwn tawh hauh lo a nia.

¹⁸He thilah hian LALPAN i chhiahhlawh hi ngaidam rawh se: ka pu hi ka kut rinchhana chibai bûk tûra Rimona ina a luha, Rimona ina ka kûn chuan, Rimona ina ka kûn ve thu-ah chuan, LALPAN i chhiahhlawh hi ngaidam rawh se,” a ti a.

¹⁹Tin, ani chuan a hnênah, “Thlamuang takin kal rawh,” a ti a. Chutichuan, a hnên ata chu a chhuak leh a, eng emaw chen a kal hman a.

²⁰Nimahsela, Pathian mi Elisa chhiahhlawh Gehazia chuan, “Khawinge, ka pu hian Suria mi Naamana hi a thil rawn kente la hlek lovin a chhuah leh ta mai a; LALPA nunna chhâlin ka sawi e, ka va ûm ang a, eng emaw tal ka va lâksak teh ang,” a ti a.

²¹Chutichuan, Gehazia chuan Naamana chu a ûm ta a. Tin, Naamanan tuin emaw a rawn ûm a han hmuh chuan, lo biak tumin tawlailîr ata chu a chhuk a, “Ṭha lam thu alâwm maw?” a ti a.

²²Tin, ani chuan, “Ṭha lam thu ni e. Ka puin, ‘Ngai teh hei, Ephraim tlâng ram aṭangin zâwlneiho fapate zînga tlangvâl pahnihin mi rawh tlawh ta thut mai a, anni chu tangkarua talent khat leh silhfên inthlâkna tûr pahnih pe rawh khai,’ tiin mi rawn tîr a ni e,” a ti a.

²³Tin, Naamana chuan, “Talent hnih hi la rawh khai,” a ti a. Tichuan, la tûrin a thlêm chiam a; tin, tangkarua talent hnih chu silhfên inthlâkna tûr pahnih nên chuan ip hnihah a thun a, a chhiahhlawhte pahnih a phurhtîr a, a hmaah chuan an kalpui ta a.

²⁴Tin, tlâng a va thlen chuan a lâksak a, in chhûngah a dah a; tin, chu mite chu a kaltîr a, an kal ta a.

²⁵Ani erawh chu a lût a, a pu hmaah chuan a va ding a. Tin, Elisa chuan a hnênah, “Khawi aṭangin nge i lo kal le, Gehazi?” a ti a. Tin, ani chuan “I chhiahhlawh hi khawiah mah ka kal lo ve,” a ti a.

²⁶Tin, ani chuan a hnênah, “A be tûr chea a tawlailîr ata kha mi lo chhuk lai khân ka rilru i hnênah a kal ve zêl a ni lâwm ni? Tangka te, silhfên te, olive huan te, grêp huan te, berâm te, sebâwngpa te, bawihpa leh bawihnu te hi lâk a hun em ni?

²⁷Chutichuan, Naamana phâr khân a man ang chia, kumkhuain i thlahte pawh a man zêl ang,” a ti a. Tichuan, a hnên ata chu vûr anga vâra phârin a kal chhuak ta a.