Read Mizo_Old_version LEHKHABU PAHNIHNA LALTE 9 Bible Online

LEHKHABU PAHNIHNA LALTE 9 - Mizo_Old_version bible

LEHKHABU PAHNIHNA LALTE 9

¹Tin, zâwlnei Elisan zâwlneiho fapate zînga pakhat a ko va, a hnênah, “I puan veng la, he hriak bâwm hi keng la, Ramoth-gilead khuaah va kal rawh.

²I va thlen chuan Nimsia fa Jehosaphata fapa Jehua va zawng chhuak langin; va lût la, a unauteho zîng ata ko chhuak la, pindan chhûngrilah luhpui rawh.

³Tichuan, hriak bâwm hi la la, a luah leih langin, ‘LALPAN heti hian a ti: “Israel-te chunga lalah hriak ka thih a che,” tiin,’ ti rawh. Tichuan, kawng hawng la, tlân chhuak rawh, awm rei suh,” a ti a.

⁴Chutichuan, tlangvâl, zâwlnei tlangvâl chu Ramoth-gilead-ah chuan a kal ta a.

⁵Tin, a va thlen chuan ngai teh, sipai hotuho an lo ṭhu khâwm a; tin, ani chuan, “Sipai hotu, i hnênah thuchah sawi tûr ka nei e,” a ti a. Tin, Jehua chuan, “A tu bera hnênah hian nge ni?” a ti a. Tin, ani chuan, “Nangma hnênah hian a ni, sipai hotu,” a ti a.

⁶Tin, a tho va, inah chuan a lût a; tin, a luah hriak chu a leih a, a hnênah, “LALPA, Israel-te Pathianin heti hian a ti: ‘LALPA mipuiho, Israel-ho chunga lalah hriak ka thih a che.

⁷Ka chhiahhlawh zâwlneite thisen leh LALPA chhiahhlawh zawng zawngte thisen phuba chu Jezebeli laka ka lâk theihna tûrin i pu Ahaba chhûngte chu i tiboral vek ang.

⁸Ahaba chhûngte zawng zawng chu an boral vek ang a; Ahaba aṭang hian mipa fa tawh phawt chu Israel rama mi khuahkhirh leh khirh loh pawh ka tiboral dâwn a ni.

⁹Tin, Ahaba chhûngte chu Nebata fapa Jeroboama chhûngte leh Ahija fapa Baasa chhûngte angin ka siam ang a.

¹⁰Tin, uiin Jezebeli chu Jezreel khaw kulh bulah an ei ang a, a phûmtu tûr rêng rêng an awm lo vang,’ tiin,” a ti a. Tichuan, kawng a hawng a, a tlân chhuak ta a.

¹¹Tichuan, Jehua chu a pu puipate hnênah chuan a lo chhuak a; pakhat chuan a hnênah, “Ṭha lam thu em ni le? Kha mi âpa kha engtiziaa i hnêna lo kal nge ni le?” a ti a. Tin, ani chuan an hnênah, “In hriat mi a ni a, a thusawi pawh kha in hria alâwm,” a ti a.

¹²Anni chuan, “Hre teh suh e! Min han hrilh teh khai,” an ti a. Ani chuan, “Hetiang tak hian min ti alâwm maw le: ‘LALPAN heti hian a ti: “Israel-ho chunga lal atân hriak ka thih a che,” ’ tiin,” a ti a.

¹³Tichuan, mi tinin an puan chu an hlîp hmawk hmawk a, kailâwn chungah an phahsak ta ṭheuh va, “Jehua lal a ni ta e,” tiin tawtawrâwt an hâm ta a.

¹⁴Chutichuan, Nimsia fa Jehosaphata fapa Jehua chuan Jorama chu a phiar ta a (Suria lal Hazaela avângin Jorama leh Israel-ho zawng zawng chuan Ramoth-gilead khua chu an vêng a;

¹⁵Lal Jorama erawh chu Suria lal Hazaela nên an inbeihnaa Suria miten an hliam kha Jezreel khuaa intidam tûrin a kîr leh a nih kha). Tin, Jehua chuan, “Ka lama ṭang in nih chuan tu mah rêng rêng Jezreel khuaa hêng thu hi sawi tûrin khua ata hi kal chhuahtîr suh u,” a ti a.

¹⁶Chutichuan, Jehua chu tawlailîrah a chuang a, Jezreel khuaah a kal a; Jorama chu chutah chuan a mu a ni a. Tin, Juda lal Ahazia pawh Jorama kan tûrin a zuk kal a.

¹⁷Tin, Jezreel kulhah râlvêng a ding a, ani chuan Jehua ho lo kal chu a han hmu a, “Mi tam tak ka hmu e,” a ti a. Tin, Jorama chuan, “Sakawr chung chuang mi anmahni hmuak tûrin va tîr la, ‘ṭha lam thu em ni le?’ va ti teh se,” a ti a.

¹⁸Chutichuan, mi pakhat sakawr chunga chuang hi a hmuak tûrin a va kal a, “Lalin heti hian a ti: ‘ṭha lam thu em ni le?’ tiin,” a ti a. Tin, Jehua chuan, “Ṭha lam thu chu nanga lo hriat tûr eng nge awm ni? Ka hnungah hian va kal ve rawh,” a ti a. Tin, râlvêng chuan, “Kan mi tirha chuan an hnên chu a va thleng ngei a; nimahsela, a lo kîr leh ta hauh lo mai,” tiin a hrilh a.

¹⁹Tichuan, mi pakhat sakawr chunga chuang hi a tîr leh a, chu mi pawh chuan an hnên a va thleng a, “Lalin heti hian a ti: ‘ṭha lam thu em ni le?’ tiin,” a ti a. Tin, Jehuan a chhâng a, “Ṭha lam thu chu nanga lo hriat tûr eng nge awm ni? Ka hnungah hian va kal ve rawh,” a ti a.

²⁰Tin, râlvêng chuan, “Ani pawhin an hnên chu a va thleng ngei a, ani pawh chu a lo kîr leh ta hauh lo mai; tin, a khalh dân pawh Nimsia fapa Jehua khalh dân chiah a ni; mi â ang maiin a khalh ṭhîn a ni,” a ti a.

²¹Tin, Jorama chuan, “Buatsaih teh u,” a ti a. Tin, a tawlailîr chu an buatsaih a. Tin, Israel lal Jorama leh Juda lal Ahazia chu mahni tawlailîr ve vein an va chhuak a, Jehua hmuak tûrin an va kal a, Jezreel mi Nabotha huanah an va hmu a.

²²Tin, Joraman Jehua a han hmuh chuan heti hi a ni a, “Ṭha lam thu em ni le, Jehu?” a han ti a. Tin, ani chuan a lo chhâng a, “I nu Jezebeli hian uirê leh dawi a chîn nasat chhûng hian ṭha lam thu eng nge awm thei ang?” a ti a.

²³Tin, Jorama chuan a kai her a, a tlân a, Ahazia hnênah, “Inbumna a awm a nih hi, Ahazi,” a ti a.

²⁴Tin, Jehua chuan a thalngul chu a theihpatâwpin a kuai a, Jorama dâr leh dâr inkârah a kâp a, thal chu a lungah a lût tlang a, a tawlailîrah a awp ta rawk a.

²⁵Tichuan, Jehuan a sipai hotu Bidkara hnênah, “Pawm la, Jezreel mi Nabotha huan hmunah paih thla rawh; hmâna nang nêna a pa Ahaba hnunga kan chuan dun laia LALPAN he phur hi a chunga a nghah rêng a nih kha:

²⁶LALPAN, ‘Niminah Nabotha thisen leh a fapate thisen ka hmu ngei alâwm,’ a tih kha; tin, LALPAN, ‘Hemi hmun ngeiah hian ka thungrûl dâwn che a ni,’ a tih leh kha. Chutichuan, LALPA thu angin pawm la, hemi hmunah ngei hian paih thla rawh,” a ti a.

²⁷Nimahsela, Juda lal Ahazian chu chu a hmuh chuan huan in lamah a tlân ta a. Tin, Jehua chuan a ûm a, “Ani pawh tawlailîrah khân that nghâl rawh u,” a ti a; tichuan, Ibleam khaw kiang, Gur chhohnaah an bei a. Tin, Migiddo khuaah a tlân lût a, chutah chuan a thi ta a.

²⁸Tin, mite chuan Jerusalem khuaah tawlailîrin a kalpui a, ama thlânah, a pi leh pute zîngah Davida khawpuiah an phûm ta a.

²⁹Ahaba fapa Jorama kum sâwm leh kum khat a lal kumin Ahazia chu Juda-ho chungah a lal ṭan a.

³⁰Tin, Jehua chu Jezreel khuaa a va luh chuan, Jezebelin a lo hria a; tichuan, a mitte a lo hnawih a, a sam te a lo chei a, tukverhah a dâk a.

³¹Tin, Jehua kulh kawngkaa a lo luh lai takin, “Ṭha lam thu em ni le, nang, mahni pute thattu, Zimri pa?” a lo ti a.

³²Tin, ani chu tukverh lam hawi chuan a han dâk chho va, “Tu nge ka lama ṭang che u? Tute nge?” a ti a. Mi tilreh pahnih emaw, pathum emaw hi a lam hawiin an lo dâk chhuak a.

³³Tin, ani chuan, “Han theh thla rawh u,” a ti a. Chutichuan, an theh thla a, a thi chuan bang leh sakawrte chu a per nguai mai a; tin, ani chuan a lo chîl a.

³⁴Tin, a lût a, a eiin a in a. “Anchhe dawngnu kha va ngaihven ta ula, va phûm rawh u, lal fanu a ni si a,” a ti a.

³⁵Tin, phûm tûrin an va kal a; nimahsela, a luruh te, a kebâwr te, a kutphahbâwr te ngawt lo chu an va hmu ta lo va.

³⁶Chutichuan, an lo kal leh a, an rawn hrilh a. Tin, ani chuan, “Hei hi LALPAN a chhiahhlawh Tisbe mi Elija hmanga, ‘Jezreel kulh bulah uiin Jezebeli chu an la ei ang a;

³⁷Jezebeli ruang chu Jezreel khaw kulh bula huana êk dûr ang mai a la ni ang a; tichuan, “Hei chu Jezebeli a ni â!” an tih loh nân,’ tih thu a sawi kha a nih hi,” a ti a.