Read Mizo_Old_version BU KHATNA CHRONICLES 10 Bible Online

BU KHATNA CHRONICLES 10 - Mizo_Old_version bible

BU KHATNA CHRONICLES 10

¹Chutichuan, Philistia mite chuan Israel-hote chu an bei a; tin, Israel mite chu Philistia mite hmaah chuan an tlânchhia a, Gilboa tlângah chuan thahin an awm ta zul mai a.

²Tin, Philistia mite chuan Saula leh a fapate chu an ûm ta ngat ngat a; tin, Philistia mite chuan Saula fapa Jonathana te, Abinadaba te, Malkisua te chu an that a.

³Saula chu a chau ta êm êm mai a, thal kâp mite chuan an ûmpha a, an hliam ta a.

⁴Chutichuan, Saula chuan a râlthuam kengtu hnênah chuan, “I khandaih kha phawi la, mi han chhun tlang rawh; hêng serh tan lohte hian mi uankhum dah ang e,” a ti a. Nimahsela, a râlthuam kengtu chuan a ti duh lo va; a hlau êm êm si a. Chutichuan, Saula chuan a khandaih chu a la a, a bawh ta a.

⁵Tin, a râlthuam kengtu chuan Saula a thi tih a hriat chuan, ani pawh chuan a khandaih chu a bawh ve a, a thi ve ta a.

⁶Chutichuan, Saula leh a fapate pathum chu an thi ta a, an pafa za chuan an thi ta a ni.

⁷Tichuan, ruama awm Israel mi zawng zawngte chuan an tlânchhia tih leh, Saula leh a fapate chu an thi ta tih an hriat chuan, an khuate chu an chhuahsan a, an tlân bo ta a; tin, Philistia mite chuan an va luah ta a.

⁸Tin, heti hi a ni a, a tûkah chuan Philistia-hoten an râl thahte thuam hlihsak tûra an va kal chuan Gilboa tlânga Saula leh a fapate lo thi chu an va hmu a.

⁹Tin, a thuam an hlîp a, a lu leh a râlthuam chu an la a, an pathian lemte leh mite hnêna chanchin puan tûrin Philistia ramah chuan an thawn vêl a.

¹⁰Tin, a râlthuam chu an pathiante inah an dah a, a lu chu Dagona inah an târ a.

¹¹Tin, Jabes-gilead mi zawng zawngten Philistia mitena Saula an tih dân zawng zawng thu an lo hriat chuan,

¹²mi huaisenho zawng zawngte chu an thawk chhuak a, Saula ruang leh a fapate ruang chu an la a, Jabes khuaah an kalpui a, a ruhte chu Jabes khuaa sasaw hnuaiah an phûm a, ni sarih chaw an nghei a.

¹³Chutichuan, Saula chu LALPA thu pawm duh lova, LALPA chunga a bawhchhiat avâng leh, LALPA chu râwn lova ramhuaizâwl aienthiam aientîra a râwn avângin a thi a ni. Chu vâng chuan a ni, a tihhluma, ram pawh chu Jesaia fapa Davida chu a pêk tâk ni.