Read Mizo_Old_version BU KHATNA CHRONICLES 11 Bible Online

BU KHATNA CHRONICLES 11 - Mizo_Old_version bible

BU KHATNA CHRONICLES 11

¹Chutichuan, Israel-ho zawng zawng chu Hebron-a Davida hnênah an kal khâwm a, “Ngai teh, i thisen zawmpui kan ni a.

²Tûn hmaa Saula a lal lai khân Israel-te hruai chhuak leh hruai lûttu i ni ṭhîn a; tin, LALPA i Pathianin i hnênah, ‘Ka mi Israel-te chu i châwm ang a, ka mi Israel-te chungah hotuah i awm ang,’ a ti chia,” an ti a.

³Chutichuan, Israel-ho upa zawng zawng chu Hebron-ah lal hnênah chuan an kal a; tin, Davidan Hebron-ah chuan LALPA hmaah an hnênah thu a thlung a. Tin, LALPAN Samuela hmanga a sawi ang khân Davida chu Israel-te lal atân hriak an thih ta a.

⁴Tin, Davida leh Israel-ho zawng zawng chu Jerusalem-ah an kal a (chu chu Jebus a ni); tin, chutah chuan chumi rama mi, Jebus-hote chu an awm a.

⁵Tin, Jebus-a awmhote chuan Davida hnênah, “Hetah hian i lo lût tawp lo vang,” an ti a. Nimahsela, Davida chuan Zion kulh chu a la ta rêng rêng a; chu chu Davida khua tih a ni ta a.

⁶Tin, Davidan, “Tu pawh Jebus-ho han bei hmasa apiang chu sipai hotu berah a awm ang,” a ti a. Tichuan, Zeruii fapa Joaba chu a han chho hmasa a, hotu berah an siam ta a.

⁷Tin, Davida chu kulhah chuan a awm ta a; chuvângin, Davida khawpui an ti a ni.

⁸Tin, Milo aṭangin khawpui vêl kulh chu a siam ṭha a; tin, Joaban khawpui chhûng a siam ṭha a.

⁹Tichuan, Davida chu a lo ropui ta deuh deuh va; sipaihote LALPA chu a hnênah a awm avângin.

¹⁰Hêngte hi Davida sipai hmingthang, Israel zawng zawngte nêna ṭanga, Israel-te chungchâng thua LALPAN a sawi anga lala siam tûra a ram dinpuitu huaisen tak takte chu an ni.

¹¹Hêngte hi sipai huaisen, Davida hnêna awmte an ni: Hakmon mi fapa Jasobeama, sawmthum pâwl hotu, zathum chungah a fei leka ṭum khata thattu chu.

¹²Tin, a dawttu chu Aho mi Dodova fapa Eleazara, sipai huaisen pathumte zinga pakhat kha.

¹³Ani chu barli awm chûkna, Philistia mite indo tûra an infâwk khâwmna hmun Pas-dammim-ah khân Davida hnênah a awm a; tin, mipuite chu Philistia mite hmaah chuan an tlânchhe ta a.

¹⁴Tin, anni chu chumi hmunah chuan an ding a, an lo ṭang tlat a, Philistia mite chu an that a; tichuan, LALPAN ropui taka ngamsakin a chhandam a.

¹⁵Tin, sipai sawmthum zînga huaisen pathumte chu lungpuiah Adulam pûkah Davida hnênah an chhuk a; Philistia sipaiho chuan Rephaim ruamah ṭanhmun an khuar a.

¹⁶Chutih lai chuan Davida chu kulhbîngah a awm a; tin, Philistia sipaiho chu Bethlehem-ah an awm a.

¹⁷Tin, Davida chuan, “Bethlehem-a tuichhunchhuah tui, kulh kawngkhâr kianga mi kha in tûra mi pe han awm teh sela aw!” a ti a, a tui a hâl êm êm a.

¹⁸Tin, pathumte chuan Philistia sipaiho chu an tâwn tlang a, kulh kawngkhâr kianga mi Bethlehem-a tuichhunchhuah tui chu an va chawi a, Davida hnênah an rawn la a; nimahsela, Davida chuan a lo in duh lo va, LALPA tân a bun chhuak a.

¹⁹“Hei hi ka in loh tûrzia mai chu! Hêng thih huama inpehote thisen chu ka in dâwn em ni? Thih huama inpein an rawn la a ni si a,” a ti a. Chutichuan, a in duh ta lo va. Mi huaisen pathumte chuan chutiang chuan an ti a.

²⁰Tin, Joaba unau Abisaia chu pathumte zînga hotu ber a ni a; mi zathumte chungah a fei a lek a, anmahni chu a thah avângin pathumte zîngah chuan hmingṭhat a hlawh a.

²¹Pathumte zîngah chuan pahnihte ai chuan amah chu chawimawi tlâk a ni a, an hotuah an siam a, pathum hmasate zîngah erawh chuan a tel lo.

²²Tin, Kabzeel mi huai, thil nasa tak titu Jehoiada fapa Benaia chuan Moab mi Ariela fapate pahnih chu a that a; tin a zuk chhuk a, vûr tlâk hun laiin khuarkhurumah sakeibaknei a zuk that bawk a.

²³Tin, Aigupta mi, mi âwmkhauh pui, tawng ngaa sâng a that a; chu Aigupta mi chuan fei lian pui, puan tahtu themkawl ang hi a keng a. Tin, ani chuan tiang nên chuan a zuk pan a, Aigupta mi fei chu a pawh thlâksak a, ama feiin a chhun hlum ta a.

²⁴Jehoiada fapa Benaia chuan chutiang chuan a ti a, sipai huaisen pathumte zînga hmingṭhat a hlawh a.

²⁵Ngai teh u, mi sawmthumte ai chuan chawimawi tlâk a ni a, pathum hmasate zîngah erawh chuan a tel lo; tin, Davida chuan a vêngtu pâwl hotuah a dah a.

²⁶Sipaite zînga mi huaisen dangte chu hêngte hi an ni: Joaba unau Asahela te, Bethlehem khuaa mi Dodova fapa Elhanana te,

²⁷Haror mi Samotha te, Pelon mi Heleza te,

²⁸Teko mi Ikesa fapa Ira te, Anathoth mi Abiezera te,

²⁹Husath mi Sibekaia te, Aho mi Ilaia te,

³⁰Netophath mi Maharaia te, Netophath mi Baana fapa Heleda te,

³¹Benjamina thlah Gibea khuaa mi Ribaia fapa Ithaia te, Pirathon mi Benaia te,

³²Gaas luitêa mi Huraia te, Arbath mi Abiela te,

³³Baharum mi Azmavetha te, Saalbon mi Eliaba te,

³⁴Gizon mi Hasema fapate, Harar mi Sagea fapa Jonathana te,

³⁵Harar mi Sakara fapa Ahiama te, Ura fapa Eliphala te,

³⁶Mekerath mi Hephera te, Pelon mi Ahija te,

³⁷Karmel mi Hezroa te, Ezbaia fapa Naaraia te,

³⁸Nathana unaupa Joela te, Hagria fapa Mibhara te,

³⁹Amon mi Zeleka te, Zeruii fapa Joaba râlthuam kengtu Beeroth mi Naharaia te,

⁴⁰Ithra mi Ira te, Ithra mi Gareba te,

⁴¹Hit mi Uria te, Ahlaia fapa Zabada te,

⁴²Reuben mi Siza fapa Adina, Reuben mite zînga hotu, a hnêna mi sawmthumte nên,

⁴³Maaka fapa Hanana te, Mithna mi Josaphata te,

⁴⁴Asterath mi Uzia te, Aroer mi Hothama fapa Sama leh Jeiela te,

⁴⁵Simria fapa Jediaela te, a unaupa Tiz mi Joha te,

⁴⁶Mahav mi Eliela te, Elnaama fapate Jeribaia leh Josavia te, Moab mi Ithma te,

⁴⁷Mezoba mi Eliela te, Obeda te, Jaasiela te pawh.