Read Mizo_Old_version BU KHATNA CHRONICLES 12 Bible Online

BU KHATNA CHRONICLES 12 - Mizo_Old_version bible

BU KHATNA CHRONICLES 12

¹Tichuan, Kisa fapa Saula avânga Davida chu Ziglag-a a inkhung tlat laia a hnêna lo kalte chu hêngte hi an ni; anni chu indonaa amah puitu mi huaisente zînga mi an ni.

²Thalngul keng mi, ding lam leh vei lama virvawma lung vawm leh thalngula thal kah thiam an ni a; Benjamin mi Saula chite an ni.

³A puipa ber chu Ahiezera a ni a; tin, Gibeath mi Semaa fapa Joasa; tin, Azmavetha fapa Jeziela leh Peletha te; Beraka te, Anathoth mi Jehua te;

⁴sawmthum zînga mi huaisen, sawmthum hotu Gibeon mi Ismaia te; Jeremia te, Jahaziela te, Johanana te, Gederat mi Jozabada te;

⁵Eluzaia te, Jerimotha te, Bealia te, Semaria te, Harup mi Sephatia te;

⁶Kora mi Elkana te, Isia te, Azarela te, Joezera te, Jasobeama te;

⁷Gedor mi Jerohama fapa Joela leh Zebadia te an ni.

⁸Tin, Gad mite zînga mi, mi chak huaisen, indo thiam, phaw leh fei hman thiam ṭhenkhat chu thlalêra kulhah Davida hnênah khân an pakai a; an hmêlte chu sakeibaknei hmêl ang a ni a, tlânga sakhilâ anga zuanzâng an ni:

⁹a pakhatna chu Ezera a ni a, a dawttu chu Obadia, a dawt lehtu chu Eliaba,

¹⁰a dawt lehtu chu Mismana, a dawt lehtu chu Jeremia,

¹¹a dawt lehtu chu Ataia, a dawt lehtu chu Eliela,

¹²a dawt lehtu chu Johanana, a dawt lehtu chu Elzabada,

¹³a dawt lehtu chu Jeremia, a dawt lehtu chu Makbanaia.

¹⁴Chûng Gad mite chu sipai hotute an ni; an zînga chak lo ber pawh chu za hen a ni a, a chak ber chu sângkhat hen a ni.

¹⁵Chûngho chu an ni, thla khatnaa Jordan lui a kuang zawng zawng a liam laia va kal kaia, ruama chêngho zawng zawng chhak lam leh thlang lama tlânchhiattîrtute kha.

¹⁶Tin, Benjamin-ho leh Juda-ho zînga mi ṭhenkhat chu kulhah Davida hnênah an kal a.

¹⁷Tichuan, Davida chu anmahni hmuak tûrin a kal a, “Ṭha lam thua mi pui tûra ka hnêna lo kal in nih chuan, ka thinlungin a zawm tlat ang che u a; amaherawhchu, ka kutin pawi a khawih lo tih hre reng chung sia ka hmêlmate mi mantîr tuma lo kal in nih chuan, kan pi leh pute Pathian chuan chhinchhiahin, zilhhau che u rawh se,” a va ti a.

¹⁸Chutichuan, sawmthum chunga hotu Amasaia chungah chuan thlarau a lo thleng a, “David, i mite kan ni e; Jesaia fapa, i lama ṭang kan ni e! I chungah thlamuanna awm rawh se, nangmah puitute chungah pawh thlamuanna awm rawh se! I Pathian chuan a ṭanpui ṭhîn si chia,” a ti a. Tichuan, Davida chuan anmahni chu a la a, sipai pâwl hotuahte a siam ta a.

¹⁹Tin, Philistia-hoten Saula do tûra an thawh lai khân Davida pawh a tel ve a, Manase-ho zînga ṭhenkhat pawh Davida lamah an pakai a; amaherawhchu, Philistia hotute a pui ta chuang lo; “A pu Saula lamah a pakai ang a, kan lu kan hloh dah ang e,” tiin an inrâwn a, an hnar kîr leh ta a ni.

²⁰Tin, Ziglag khua a thlen chuan Manase-ho zînga sipai sâng hotu - Adna te, Jozabada te, Jediaela te, Mikaela te, Jozabada te, Elihua te, Zilethaia te chu a lamah an pakai a.

²¹Davidan rawlrâl pâwlho a bei chu an beihpui ve a; an vai chuan mi chak huaisen, sipai hotu an ni a.

²²Ni tin Davida lama ṭang tûrin an kal an kal a, Pathian sipaiho ang maia sipai pâwl ropui tak an lo ni ta a.

²³ LALPA thu anga Saula ram Davida luahtîr tûra Hebron khuaa Davida hnêna indona râlthuama inthuam kal zât chu hetiang a ni:

²⁴Juda thlah, indona râlthuama inthuam, phaw leh fei keng mi chu sângruk leh zariat an ni a;

²⁵Simeona thlah, indonaa mi chak huaisen chu sângsarih leh za;

²⁶Levia thlah sângli leh zaruk;

²⁷Jehoiada chu Arona thlah hruaitu a ni a, a hnênah sângthum leh zasarih an tel ve a;

²⁸Zadoka, tlangvâl chak huaisen, a chhûngkaw zînga mi, sipai hotu sawmhnih leh pahnih nên;

²⁹Benjamina thlahte zinga mi, Saula chite sângthum, tûn hma chuan a tam zâwkte chu Saula ho lama ṭang an ni ṭhîn a;

³⁰Ephraima thlahte zînga mi, mi chak huaisen, an chhûngkaw zînga mi hmingthang sînghnih leh zariat;

³¹Manase hnam zâtvete zînga mi, Davida lala siam tûra thla; chhuah lo kalte sîngkhat leh sângriat;

³²Isakara thlahte zînga mi, chûng lai hun thil chinchâng hre mi, Israel-tena an thiltih tûr ṭûl hre mi, hotu deuh deuh zahnih unau zawng zawng chu an thuhnuaia awm an ni a;

³³Zebulun-ho zînga mi, râl bei tlâk ṭhiau, indona hmanraw tinrêng nêna ṭan khawh thiam sîngnga, Davida tâna rilru nghet tak pu mi an ni a;

³⁴Naphtali-ho zînga mi, sipai hotu sangkhat leh fei keng mi sîngthum leh sângsarih nên;

³⁵Dan-ho zinga mi, râlthuama inthuam sa sînghnih leh sângriat leh zaruk;

³⁶Aser-ho zînga mi, râl bei tlâk ṭhiau ṭan khawh thiam sîngli;

³⁷Jordan râla Reuben-ho zînga mi te, Gad-ho zînga mi te, Manase hnam zâtve zînga mite, indona hmanrua tinrêngte nêna thawk nuai khat leh sînghnih.

³⁸Chûng zawng zawng chu indo mi, ṭan khawh thiam mi an ni a, Davida chu Israel-ho zawng zawng chunga lala siam tûrin rilru hmun khat puin Hebron-ah an kal a; tin, Israel dang zawng zawngte pawhin Davida chu lala siam tûrin rilru hmun khat an pu ṭheuh va.

³⁹Tin, Davida hnênah chuan ni thum ei leh bârin an awm a; an unauten an buatsaihsak vek a ni.

⁴⁰Chu chang pawh ni lovin, an laichîn unau, Isakar ram aṭang te, Zebulun ram aṭang te, Naphtali ram aṭang te lamin sabengtung te, sanghâwngsei te, sakawr te, sebâwngpatein ei tûr lam chhang te, theipui hlâwm te, grêp rah pho ro bâwr te, uain te, hriak te an phurhtîr a, bâwngpa te, berâmte tam tak an rawn keng bawk a; Israel ram chu lâwmnain a khat a.