Read Mizo_Old_version BU KHATNA CHRONICLES 13 Bible Online

BU KHATNA CHRONICLES 13 - Mizo_Old_version bible

BU KHATNA CHRONICLES 13

¹Tin, Davida chuan hotu zawng zawng, sâng hotute leh za hotute chu a râwn hlawm a.

²Tin, Davidan Israel pung khâwmho zawng zawng hnênah chuan, “Ṭha in tih zâwng a niha, LALPA kan Pathiaan remtih zâwng a nih bawk chuan, Israel ram zawng zawnga kan unau la awmte chu, dai vêl nei khuaa awm puithiamte leh Levi-hote nên kan hnêna rawn inkhâwm ve tûr hian i sâwm vêl ang u hmiang;

³tin, kan Pathian bâwm hi i la leh teh ang u, Saula lal lai khân kan ngaihven hauh lo mai a,” a ti a.

⁴Tichuan, pung khâwmho zawng zawng chuan chutianga tih chu an duh a, mi zawng zawng ngaiha thil dik a ni rêng a.

⁵Chutichuan, Davidan Aigupta lui Sihor aṭanga Hamath khaw luhna thlenga Israel mi zawng zawngte chu Kiriath-jearim khuaa Pathian bâwm chu la tûrin a khâwm vek a.

⁶Chutichuan, Davida leh Israel mi zawng zawng chu Judai rama Baala-a Kiriath-jearim an tihah chuan, cherub-ho chunga ṭhu LALPA hming chuanna thuthlung bâwm chu la tûrin an han chho va.

⁷Tin, Pathian bâwm chu Abinadaba in ata tawlailîr tharin an kalpui a, Uza leh Ahiovan tawlailîr chu an khalh a.

⁸Tin, Davida leh Israel mi zawng zawngte chuan hla sain, ṭingṭang te, perhkhuang te, khuangtê te, dârbenthek te, tawtawrâwt te nên, Pathian hmaah an lâm bûng bûng a.

⁹Tin, Kidona hruih an han thlen chuan, Uza chuan bâwm chu chelh tumin a han ban a, bâwngte chu an pai an pai avângin.

¹⁰Tin, LALPA thin chu Uza chungah a thawk ta thut mai a, bâwm a chelh avâng chuan a tihlum ta a; chutah chuan Pathian hmaah a thi ta a.

¹¹Tin, LALPAN Uza chunga kut a thlâk avângin Davida chu a thinur a; chumi hmun chu Perez-uza a vuah a; tûn thleng hian a la ni ta reng a.

¹²Tin, Davida chuan chumi ni chuan Pathian chu a hlau va, “Engtin nge Pathian bâwm chu ka hawn theih tâk ang?” a ti a.

¹³Chutichuan, Davida chuan bâwm chu Davida khuaah ama hnênah chuan a suan ta lo va, Git mi Obed-edoma inah a dah ta zâwk a.

¹⁴Tin, Pathian bâwm chu Git mi Obed-edoma inah, a chhûngte hnênah chuan thla thum a awm a; tichuan, Obed-edoma chhûngte leh a neih zawng zawng chu LALPAN mal a sâwm a.