Read Mizo_Old_version BU KHATNA CHRONICLES 14 Bible Online

BU KHATNA CHRONICLES 14 - Mizo_Old_version bible

BU KHATNA CHRONICLES 14

¹Tin, Tura lal Hiraman Davida hnênah mi a tîr a, sidar thingte a thawn a, lung chhertute, themthiamte a in sa tûrin a tîr bawk a.

²Tin, Davida chuan LALPAN Israel mite chunga lalah amah chu a tinghetin, a mi Israel-te avângin a ram chu a chawimawi a ni tih a hre ta a.

³Tin, Davida chuan Jerusalem-ah nupuite a neih belhchhah leh a, Davida chuan fanu leh fapate a nei leh a.

⁴Jerusalem-a a fa neihte chu hêngte hi an ni: Samua te, Sobaba te, Nathana te, Solomona te,

⁵Ibhara te, Elisua te, Elpeleta te,

⁶Noga te, Nephega te, Japhia te,

⁷Elisama te, Beeliada te, Elipheleta te.

⁸Tin, Philistia miten Davida chu Israel mi zawng zawngte lal atân hriak an thih tih an hriatin, Philistia mi zawng zawng chu Davida zawng tûrin an chho ta a; tin, Davida chuan a lo hria a, anmahni bei tûrin a kal ta a.

⁹Tin, Philistia mite chu Rephaim ruamah an inzâr a.

¹⁰Tin, Davida chuan, “Philistia mite bei tûrin ka han chho dâwn em? Ka kutah hian anniho chu i pe dâwn em?” tiin LALPA a râwn a. Tin, LALPA chuan Davida hnênah, “Han chho rawh; anniho chu i kutah ka pe dâwn a ni,” a ti a.

¹¹Tichuan, Baal-perazim-ah an chho va, chutah chuan Davidan anniho chu a hneh a, “LALPAN ka hmêlmate chu ka kut hmangin tuikhuah sah ang maiin min tihdarhsak ta,” a ti a. Chutichuan, chumi hmun hmingah chuan Baal-perazim an vuah a.

¹²Tin, chutah chuan an milemte an kalsan a, Davidan thu a pe a, an hâl ta a.

¹³Tin, Philistia-hote chu ruamah an inzâr leh a.

¹⁴Tin, Davidan Pathian a râwn leh a; tin, Pathianin a hnênah, “Um lovin kiansan la, thingtheihmu kûng zâwn lamah han bei zâwk rawh.

¹⁵Tin, heti hi a ni ang a, thingtheihmu lêra kal thâwm ang ri ṭhup ṭhup i hriat chuan che rawh, Philistia sipaite bei tûrin i hmaah Pathian a chhuak ta tihna a ni ang,” a ti a.

¹⁶Tin, Pathianin thu a pêk angin Davida chuan a ti a; Philistia sipaite chu Gibeon aṭanga Gezer thlengin an bei a.

¹⁷Tichuan, ram tinah Davida hming chu a lo thang ta a; LALPAN hnam tin amah a ṭihtîr ta a.